Wikipedia:Comunicáu de prensa

De Wikipedia
Saltar a navegación Saltar a la gueta
Logotipu de la Wikipedia.

La Wikipedia n’asturianu ta acabante d'algamar los cinco mil artículos, cifra asemeyada a la de les ediciones de Wikipedia en delles llingües minoritaries d'Europa. Anguaño, Wikipedia (http://ast.wikipedia.org) cunta con más de 300 wikipedistes qu'escribieren, iguaren y desendolcaren los más de 5.000 artículos de la enciclopedia llibre na so edición n'asturianu. D'ellos, una ventena collaboren d'un mou regular nel desenvolvimientu de la Wikipedia y la so cadarma temática. La cifra de "wikipedistes" foi medrando enforma dende que'l 2 d'agostu de 2004 entamara la Wikipedia, col so primer artículu sobro'l Zazaki (llingua de la etnia Zaza, de Turquía). Dende entós, desendolcóse un trabayu valoratible, pero qu'entá nun dexó de ser un proyeutu. El volume d'artículos y la calidá de bien d'ellos nun permiten inda considerar la Wikipedia n'asturianu como ferramienta de consulta básica, pero sí como un proyeutu que yá entamó a cuayar y que tien de medrar cola incorporación de nuevos "wikipedistes". Cualquiera pue colaborar con Wikipedia: creando nuevos artículos naquellos temes del so interés, iguando los que yá esisten, o trabayando na xera d'estructurar los conteníos de la enciclopedia llibre. La Wikipedia forma parte d'un enfotu mundial por desenvolver una enciclopedia d'usu xeneral, de distribución llibre (güeyar www.wikipedia.org) y de calidá, al traviés d'una rede de llibre participación de voluntarios por tol mundu. Les condiciones d'usu del conteníu de la Wikipedia tán baxo los términos de llicencia GFDL. Eso significa que cualquiera ye llibre d'utilizar los artículos, copialos, igualos y distribuyilos, cumpliendo namás que dos requisitos: mentar l'orixe de la información, y que les condiciones d'usu del nuevu trabayu seyan de la mesma llicencia GFDL, o compatible. El proyeutu Wikipedia ye dafechu internacional y multillingüe: hai más de 200 ediciones en llingües estremaes, que funcionen de manera autónoma y que, globalmente, contienen al rodiu de 2'5 millones d'artículos.