Vovinam Viet Vo Dao
 Tixeres voladores del Vovinam Viet Vo Dao | |
| Tamién | A cencielles: Vovinam, Viet Vo Dao |
|---|---|
| Enfoque | Híbridu: golpes de puñu/pierna, agarres, llucha cuerpu a cuerpu, armes tradicionales |
| País d'orixe | Vietnam |
| Fundador | Nguyen Loc |
| Fecha de fundación | 1938 |
| Paternidá | Artes marciales tradicionales de Vietnam |
| Deporte olímpicu | Non |
 | |
Vovinam Viet Vo Dao (Artes marciales de Vietnam, Vía Marcial de Vietnam) o, a cencielles, Vovinam, o Viet Vo Dao, ye un arte marcial vietnamita creáu en Ḥanói en 1938 por Nguyen Loc (llamáu’l Maestru Fundador). Ye un arte célebre per dayures sobre too poles sos “tixeres” (pataes o valtos usando les piernes como tixeres) acrobátiques enforma espectaculares.
El Vovinam Viet Vo Dao prautícase con y ensin armes. Básase nel principiu duru y suave de les artes marciales. Entrénase’l cuerpu tanto como la mente. Aprovéchase la fuercia y reaición del oponente. El Vovinam inclúi téuniques de mano, coldu, pataes, proyeiciones, téuniques d'apalancar y d'escapar. Entrénense los ataques y les defenses, asina como les formes (kates) llamaes Quyen, el combate y la llucha tradicional..
Les téuniques de defensa personal abarquen defenses contra ataques ensin armes, como por casu estrangular dende atrás, asina como contra ataques con cuchiellu o con espada. Los estudiantes avanzaos aprienden a combinar les téuniques y a defendese contra oponentes armaos. Los instructores entrenen armes tradicionales como’l palu llargu, el palu curtiu, cuchiellu, espada y sable. D’esta miente les armes valen d'arbíes d'entrenamientu col envís d'algamar el máximu control del cuerpu y de la mente.
Etimoloxía[editar | editar la fonte]
En vietnamita, Võ significa arte marcial. Alcuéntrase en dambos términos: Vovinam que significa “arte marcial vietnamita”, y Viet Vo Dao que significa la vía (Đạo) del arte marcial vietnamita (o del pueblu vietnamita). Esta amestadura de dos nomes cuasi sinónimos pue abultar incongruente, pero hai una esplicación bien cenciella. Enantes de 1963 nun se falaba más que de Vovinam, hasta que nesi momentu’l Conseyu de los Maestros decide camudar el nome de Vovinam dándo-y más importancia a la vía filosófica. De mano camudaron el nome a Viet Vo Dao, pero n’homenax al maestru fundador decidieron caltener tamién el nome orixinal. Dempués, en tol mundu (sacantes Francia y unos pocos países europeos), los dos términos son inseparables. En Francia úsase dacuando’l términu Việt Võ Đạo por delles escueles de Võ Cổ Truyền (conxuntu de les distintes escueles tradicionales vietnamites) o pa definir a les artes marciales vietnamites en xeneral, lo que resulta en munchos tracamundios.
Historia[editar | editar la fonte]
Dende’l sieglu XI esistía una academia d'artes marciales na capital vietnamita Thang Long, l'actual Ḥanói. Daquella’l país salía de la dinastía Ly (1010-1225) y entraba na dinastía Tran (1225-1400). En 1284, el xeneral Tranhung Dao aconceyó a tolos dirixentes de les escueles d'artes marciales vietnamites pa informa-yos de l'amenaza d'invasión de los mongoles y pidi-yos que s’aunieren. En resultes d'esta xunta, toles téuniques pudieron codificase y presentase como un tou homoxeneu. La denomación d'esta homoxeneización marcial foi de primeres Vo Thuat (l'arte del combate de manes), siendo más tarde denomada Viet Vo Dao 越武道 , ello ye, "el camín vietnamita de les artes marciales ", siendo tamién posible la interpretación d'"el camín supremu de les artes marciales" darréu que viet 越, que deriva del nome "Vietnam", significa "supremo". La eficacia d'esti arte marcial dio a Vietnam una victoria renomada sobre los mongoles.
De la que’l Vietnam se dixebró en dellos estaos, creáronse estremaos estilos d'artes marciales. Cuando la rebelión de Tay Son (1771-1788), una guerra civil ente dellos estaos, desendolcáronse munchos conceutos marciales. La provincia de Binh Dinh, onde los rebeldes teníen les bases, ye inda güei un espaciu d'aconceyamientu ente artes marciales.
Ente 1858 y 1884 tuvo llugar la colonización francesa de Vietnam. Les artes marciales tornáronse daquella, pero siguieron desendolcándose en secretu.
El maestru Nguyen Loc nació’l 8 d'abril de 1912, en Huu Bang-Thach That, provincia de Son Tây, nel norte de Vietnam. Dende bien mozu dedicóse al estudiu del arte marcial y de la filosofía vietnamita.
Aconseyáu pol so maestru viaxó per tol país p'atropar los conocimientos de tolos maestros y los escritos marciales, asoleyando munchos documentos inoraos.
En 1938, dempués de llargu tiempu dedicáu al estudiu y al entrenamientu, el maestru Nguyen Loc entamó la codificación y estructuración de les téuniques del Vovinam (abreviatura de Vo Viet Nam, arte marcial vietnamita). Creó’l movimientu del Vovinam colos sos discípulos, ufriendo al pueblu vietnamita l'accesu a les téuniques y a los finxos filosóficos antiguos.
En 1939, el maestru presentó oficialmente’l Vovinam con una demostración nel gran teatru d'Hanoi. Dende esi día’l Vovinam ensamó per tol país, como un gran movimientu d'educación marcial.
El 4 d'abril de 1960 morrió’l maestru Nguyen Loc en Saigón.
En febreru de 1964 creóse’l Conseyu de los Maestros. El maestru Le Sang foi escoyíu como Maestru Patriarca, y el maestru Tran Huy Phong foi nomáu Direutor Téunicu. Establecióse un plan de desarrollu aprobáu polos miembros de la xunta xeneral.
Dos años dempués el Vovinam Viet Vo Dao entró nel programa d'educación nacional.
En 1966, el maestru Tran Huy Phong creó’l centru Hoa Lu en Saigón. Nesti gran centro formáronse grandes maestros, qu'anguaño son cabezaleros del movimientu del Vovinam Viet Vo Dao en tol mundu.
De 1986 a 1990 el maestru Tran Huy Pong llevó la responsabilidá cimera del Vovinam Viet Vo Dao como Patriarca. En 1990 arrenunció pa dedicase namái a la investigación téunica y espiritual.
El 13 d'avientu de 1997 morrió’l maestru Tran Huy Pong en Saigón. Arrodiáu per tolos sos alumnos, dexó de cabezaleru al maestru Tran Nguyen Dao, al que dexó tamién toles sos obres escrites y llibros antiguos.
El Vovinam ensamó primero pa Francia, la metrópolis que colonizó Vietnam nel sieglu XIX. En Francia hai güei un bon piñu d'escueles. Dempués l'espardimientu aportó a los Estaos Xuníos per aciu de los maestros que fuxeron de la unificación del Vietnam en manes comunistes en 1975. D’estos dos biltos ensamó per dayures.
Carauterístiques téuniques[editar | editar la fonte]
El Vovinam Viet Vo Dao ye un arte marcial percompletu qu'inclúi una gran variedá de téuniques:
- Téuniques d'ataque, de defensa personal, y de contrataque, onde’l deprendimientu faise con un compañeru.
- Los Quyen, que permiten revisar les téuniques en solitariu y aguapeceles (asemeyaos a los “kates” xaponeses o a los “pumses” coreanos).
- Los Song Luyen, que son combates apautaos (como quyens prauticaos en pareya).
Pie/puñu
La mayor parte del programa compónse de téuniques de puños (Don tay), pataes (Da), cantos de la mano, coldazos (Cho), rodiyazos (Goi), barríos, bloqueos, ataques (Chien luoc), contrataques, defensa personal, llaves, valtos…
Tixeres (Don chan)
Una de les particularidaes del Vovinam Viet Vo Dao ye la tixera, que consiste n’atacar a un o a más adversarios enganchándolos o cutiéndolos coles piernes. Hai nel programa 21 tixeres, que son téuniques tan espectaculares como eficaces. Apriéndense pasu ente pasu, (entámase per tixeres a les piernes y va subiéndose a poco y a poco según avanza’l programa).
Llucha (Vat)
La llucha ye un conxuntu de téuniques prauticaes a nivel altu nel Vovinam Viet Vo Dao. Hai 3 Song Luyen de Llucha qu'agrupen 28 téuniques.
Armes (Vu khi)
Nel programa téunicu hai 15 armes, ente les que destaquen el palu (Con), la espada (Kiem) y l'alabarda (Dai Dao). Hai tamién defenses contra fusil, contra pistola y contra machete.
Téuniques especiales
- Dam lao: golpe col puñu de revés a la vidaya, que recuerda al “swing” del boxéu inglés.
- Da canh: patada alta en diagonal solmenada col esterior del pie y con un llau de la cara como oxetivu.
- Don chan (ver enriba): son téuniques feches con dambes piernes al envís de golpiar, estrangular o valtar a un oponente, enganchándolu y xirando’l cuerpu. Hai 21 d'estes téuniques.
Sistema de graos, colores y vistimienta[editar | editar la fonte]
Vistimienta[editar | editar la fonte]
Ente 1938 y 1964 nun hubo un uniforme oficial. En 1964, el primer Conseyu de Maestros xuntóse pa codificar el Vovinam. Adoptóse’l color azul como color oficial pa la vistimienta del Vovinam Viet Vo Dao. Un desendolcu dixebráu de la "Federación de Viet Vo Dao" de 1973 a 1990 optó pol color negru.
Los maestros de Vovinam xuntáronse nel veranu de 1990. Esta xunta tenía la finalidá de crear una organización estructurada pal Vovinam Viet Vo Dao fuera del Vietnam. Una de les decisiones foi que la vistimienta del Vovinam Viet Vo Dao tenía que volver ser azul per dayures.
Cintos[editar | editar la fonte]
Los adultos entamen con un cintu azul claro, el mesmu color de la vistimienta. Desa son "Vo Sinh", estudiantes aspirantes. Na vieya escuela del Vovinam tenía dos tires azul marino enantes d'algamar el cintu azul marino ensembre. Pero recién, delles escueles de Vovinam cambiaron baxo la direición del maestru Le Sang y nun lleven esi cintu azul claro con una o dos tires.
Dempués del azul claro vien el cintu azul escuro. El prauticante ye entós un "Mon Sinh", un estudiante.
Azul ye pol mar y pola esperanza (la de tener ésitu en deprender Vovinam).
Colos siguientes 3 esámenes añádense tires marielles al cintu azul. A la tercer tira mariella sígue-y el cintu mariellu. L’estudiante algamó’l nivel d'instructor.
Mariellu vien simbólicamente del color de la piel. Simboliza la interiorización del arte marcial y la filosofía “bien dientro’l pelleyu”.
N’otres artes marciales esti cintu ye negru. Poro, un estudiante de Vovinam que lleve un cintu mariellu ta autorizáu pa llevar un cintu negru. Esto fai más fácil la comparanza con otres artes marciales, por exemplu n’exhibiciones públiques. Una persona que lleve un cintu mariellu con una o más tires ta considerada un instructor.
Dempués de muncha xera, van añadiéndose hasta 3 tires encarnaes al cintu mariellu. Esto correspuende respeutivamente al 1er, 2u y 3er Dang (Dan).
L’esame que sigue a la tercer tira encarnada ye l'esame pa maestru. Si se pasa con ésitu da’l derechu de llevar un cintu encarnáu con un borde mariellu tou alredor.
Encarnáu vien del sangre y de la llama intenso. L’estudiante interiorizó inda más el Vovinam Viet Vo Dao.
Del 5u al 10u Dang amuésense con un cintu encarnáu dafechu, con un númberu de 1 a 6 tires blanques. [ [Image:white vovinam 16x16.png|left]] Blancu, que ye’l color del infinitu, de los güesos, el símbolu de la fondura d'espíritu. El cintu blancu representa al maestru que peralgamó la maestría del Vovinam Viet Vo Dao. A tolo llargo del cintu blancu, unes fines tires azules, marielles y encarnaes simbolicen tamién la totalidá del Vovinam Viet Vo Dao. Ye’l cintu reserváu pal “Patriarca”.
Plaques de nome[editar | editar la fonte]
Con cada cambéu de color del cintu cambia tamién el color de la placa del nome. Los estudiantes de cintu azul principien con un testu mariellu sobre placa azul. Col cintu mariellu la placa del Nome cambia a testu encarnáu sobre fondu mariellu. El cintu encarnáu va con una placa de nome encarnada col testu en mariellu. El patriarca lleva una placa de nome blanca col testu encarnáu; ésta lleva tamién fines llinies n’azul, mariellu y encarnáu nos bordes cimeru y baxeru.
