Uviéu Filarmonía

De Wikipedia
Saltar a navegación Saltar a la gueta

Uviéu Filarmonía (en castiellán: Oviedo Filarmonía) ye una orquesta sifónica con sede nel Principáu d'Asturies, na so capital: Uviéu.Ye por tanto xunto cola OSPA una de les dos orquestes de la ciudá. Marzio Conti ye actualmente'l so direutor titular.

Historia[editar | editar la fonte]

La orquesta Uviéu Filarmonía presentóse nun conciertu nel Teatru Campoamor el día 6 de febreru de 1999, dirixida pol so primer titular, José Gómez, con un programa qu'incluyó la obertura de Los esclavos felices, d'Arriaga, el Conciertu d'Aranxuez, de Rodrigo (col guitarrista Ignacio Rodes), el Conciertu pa violín y orquesta en Mi Mayor, de Bach, maxistralmente interpretáu por Arcadi Futer, concertino de la formación naquel momentu y la Sinfonía Nᵘ35, de Mozart. Nesti primer conciertu la plantía orquestal yera de cuarenta y cuatro músicos, teniendo nos primeros atriles de cuerda a la prestixosa orquesta de cámara “Los virtuosos de Moscú”, xerme d'Uviéu Filarmonía y munchos de que los sos miembros siguen na actualidá dientro de la orquesta.

La plantía orquestal d'aquel momentu foise amontando pasu ente pasu hasta consiguir el tamañu actual, cincuenta y cinco músicos, ente los cualos hai venticinco que yá taben naquel primer conciertu y que siguen formando parte de la orquesta na actualidá.

Uviéu Filarmonía nació col nome d'Orquesta Sinfónica Ciudá d'Uviéu, por iniciativa del Conceyu d'Uviéu, que sigue sofitándola de magar, pa cubrir les necesidaes abiertes poles nuevu actividaes musicales qu'empezaben a asitiase na ciudá: apertura del Auditoriu Príncipe Felipe con un ciclu estable de conciertos, aumentu del númberu de títulos y funciones tantu del Festival de Teatru Llíricu Español, como de la Temporada d'Ópera d'Uviéu, Festival de Danza, etc.

Dende'l branu del añu 2004 hasta xunu de 2011 el so direutor titular foi l'austriacu Friedrich Haider, col qu'Uviéu Filarmonía asitióse tantu nel panorama nacional como internacional. So la so direición la orquesta presentaríase nel Auditoriu Nacional de Madrid en payares de 2005, interpretando'l Réquiem en Do menor de Cherubini (acompañaos del Coru de la Fundación Príncipe d'Asturies). La so xira per Xapón nel añu 2007 con Edita Gruberová foi tou un ésitu musical, con llenu absolutu en tolos sos conciertos. Con ella volvieron a Paris n'avientu de 2009 al teatru de los Campos Elíseos, con gran ésitu na so presentación francesa.

Amás d'estos finxos musicales no qu'a la proyeición esterior de la orquesta refierse, Uviéu Filarmonía realizó tamién conciertos y funciones d'ópera y zarzuela en Cantabria, Galicia, Castiella y Llión, Comunidad Valenciana ya Islles Baleares.

El sellu discográficu alemán FARAO CLASSICS ta anguaño editando les grabaciones qu'Uviéu *Filarmonía realizó ente los años 2005 y 2011, siendo'l so titular Friedrich Haider, qu'inclúi casi tola obra pa orquesta del compositor italianu Ermanno Wolf-Ferrari, que la so faceta operística ye más conocida que la sinfónica, que ta práuticamente inédita. En febreru de 2013 la so grabación del conciertu pa violín de Wolf Ferrari, con Benjamin Schmidt de solista, ganó'l prestixosu Premiu de la Crítica Discográfica Alemana, na categoría de música orquestal y conciertos instrumentales.

El so últimu proyeutu discográficu ye una grabación con obres del compositor francés Camille Saint-Saëns, dirixíu por Marzio Conti y cola collaboración del violinista Alexandre da Costa, pal prestixosu sellu WARNER CLASSIC INTERNATIONAL.

Actividaes[editar | editar la fonte]

Ye'l conxuntu titular y responsable del Festival de Teatru Llíricu Español que se lleva a cabu nel Teatru Campoamor y qu'adquirió un importante prestíu nel panorama nacional, tantu con producciones propies como cola collaboración con otros teatros españoles, como'l Teatru de la Zarzuela, el Arriaga de Bilbao, los teatros de la Canal, etc. Tamién participa na Temporada d'Ópera uvieína, en dos o tres títulos añales. Realiza un importante llabor didácticu al traviés de conciertos mañaneros pa escolares que se parten a lo llargo de too l'añu lectivu, en collaboración cola Conceyalía d'Educación del Conceyu d'Uviéu.

Dende va unos años ta presente como orquesta estable dientro del Ciclu de Conciertos del Auditoriu y de les Xornaes de Pianu Luis G. Iberni, entamaos pol Conceyu d'Uviéu, acompañando a solistes de prestíu internacional de la talla de Michael Nyman, Elina Garança, Mischa Maisky, Edita Gruberová, Natalia Gutman, Ainhoa Arteta, Midori, Bella Davidovich, Boris Belkin, Montserrat Caballé, Yuri Bashmet, y un llargu etcétera. Gracies a esta collaboración col Conceyu d'Uviéu, tien la posibilidá de trabayar con direutores de reconocíu prestíu internacional, como foi'l casu de Zubin Mehta, Rinaldo Alessandrini, Alberto Zedda, Arthur Fagen, Paul Goodwin, Julia Jones, #etc.

Uviéu Filarmonía tamién collabora tolos años con entidaes y asociaciones musicales de la ciudá, como ye la centenaria Sociedá Filarmónica y la Fundación Premios Llíricos Teatru Campoamor, creada en 2006 y que dende la primer edición de la gala d'entrega de los sos premios cuntó cola presencia d'Uviéu Filarmonía nel foso del Teatru Campoamor, cada añu con mayor espectación mediática.