Ría de Tinamayor

Coordenaes: 43°23′36″N 4°30′45″W / 43.393323°N 4.512634°O / 43.393323; -4.512634
De Wikipedia
(Redirixío dende Tinamayor)
Ría de Tinamayor
Situación
País España
Autonomía Principáu d'Asturies
Tipu ría
Parte de Mar Cantábricu
Coordenaes 43°23′36″N 4°30′45″W / 43.393323°N 4.512634°O / 43.393323; -4.512634
Ría de Tinamayor alcuéntrase n'Asturies
Ría de Tinamayor
Ría de Tinamayor
Ría de Tinamayor (Asturies)
Datos
Cambiar los datos en Wikidata

La ría de Tinamayor o tamién llamada Tina, ye un estuariu asitiáu ente les comunidaes autónomes de Cantabria y Asturies, ente les llocalidaes d'Unquera y Pechón, en Cantabria y el conceyu de Ribedeva n'Asturies, au desagua'l ríu Deva al mar Cantábricu. Tien una superficie de 82 hectárees y un perímetru de 14,4 quilómetros, con una superficie intermareal del 50%. La ría despéllase al mar al traviés d'una estrecha canal d'agua ente dos montes de pindios abilaos; ellí esiste una sablera, mientres que'l so tramu entemediu ta cubiertu per praos y carrizales y el so tramu interior por árboles y arbustos esvalixaos.

Al fondu de la ría ábrese, tres la llocalidá d'Unquera, l'escobiu de la Hermida, mediu más común p'aportar a la contorna cántabra de Liébana. L'autovía del Cantábricu traviesa la ría pela so parte interior.

Pel llau d'Asturies ta'l cabu de Santumedé, u esiste un faru del mesmu nome. N'otru llugar del cabu queden les ruines d'un monesteriu del sieglu XVIII.[1] Al pie de la boca de la ría esisten una serie de cueves, una d'elles ye la cueva de les Arenes, al este, na parte cántabra.[2]

La marxe drecha de la ría ocúpenla les calzaes d'aceleración y desaceleración pa entrar y salir de l'autovía del Cantábricu y la industria d'Unquera, esistiendo una fábrica de conserves con muelle propiu.[3]

Historia[editar | editar la fonte]

Vista de Tinamayor na so salida al mar, na sablera del Pedreru, na llocalidá de Pechón.

Anque'l tráficu marítimu ye güei escasu, tradicionalmente esta ría sirvió pa establecer conexones marítimes con distintos llugares d'España y Europa. A esta ría llegaben dende'l valle de Somorrostro, en Bizkaia, los minerales que s'embarcaben remontando un tramu del ríu Deva hasta un muelle, a partir del cual tresportábense en carru hasta les ferreríes de la zona interior. Los primeros datos sobro les ferreríes del llugar apaecen nel sieglu XVI, anque probablemente yá esistíen nel XV.[4]

Nes feches cercanes a 1900 tuvo la importancia de ser el puertu que conectaba la zona con otros de Bélxica y Alemaña, amás d'embarcar mercancíes pa les fábriques de la Real Compañía Asturiana de Mines, principalmente calamina y sulfuru de cinc.[5][6] Dos aduanes podíen utilizar la ría pa embarcar xéneros, frutes y productos: la de Llanes y la de San Vicente de la Barquera.[7]

Bibliografía[editar | editar la fonte]

  • Directiva Marco del Agua Cantabria: Evaluación del estado de las masas de agua transición (estuarios) de Cantabria . Tomu I. Carauterización de las masas de agua de los estuarios; anejo 1: Fichas descriptivas de los estuarios.

Referencies[editar | editar la fonte]

  1. Fernández Álvarez, Florentino; Guía para visitar los santuarios marianos de Asturias, p.197. Ed. Encuentros (1990). ISBN 978-84-7490-252-5.
  2. VVAA; Revista Trabajos de Geología, nº 25, p. 27. Ed. Universidá d'Uviéu.
  3. Bar Cendón, Antonio; De la montaña a Cantabria: la construcción de una comunidad autónoma, p.141. Ed. Universidá de Cantabria (1995). ISBN 978-84-8102-112-7.
  4. Ceballos Cuerno, Carmen; Arozas y ferrones: las ferrerías de Cantabria en el Antiguo Régimen, pp 23-24. Ed. Universidá de Cantabria (2001). ISBN 978-84-8102-278-0.
  5. VVAA; Boletín de la Real sociedad geográfica, vol. 30-31 (Madrid, 1891).
  6. VVAA; Boletín de la Real sociedad geográfica, vol. 36-37 (Madrid, 1894).
  7. Aranceles de aduanas, para la península e Islas Baleares, p.22. Ed. Imprenta Nacional (1865).

Enllaces esternos[editar | editar la fonte]