Televisión Dixital Terrestre

Televisión Dixital Terrestre
Tipu	radiodifusión (es)
Parte de	televisión dixital

La Televisión Dixital Terrestre o TDT ye l'aplicación de les teunoloxíes del mediu dixital a la tresmision de conteníos al traviés d'una antena convencional (aérea) o de conesión per cable o satélite. Aplicando la teunoloxía dixital consíguense mayores posibilidaes, como proveer d'un mayor númberu de canales, meyor calidá d'imaxe o imaxe n'alta definición (HD o High Definition n'inglés) y meyor calidá de soníu (emplegando sistemes como AC3, Dolby Digital).

La TDT n'España

Nel añu 2000 entró en funcionamientu la primera plataforma comercial de Televisión Dixital Terrestre (TDT) n'España, Quiero TV; plataforma de pagu que nun algamó la rentabilidá esperada y cesó les sos emisiones el 30 de xunu de 2002. El 30 de payares de 2005 prodúxose el rellanzamientu del sistema al entamar les sos emisiones dixitales n'abiertu les cadenes qu'hasta esi momentu emitíen n'analóxico incorporando al mesmu tiempu nueves emisiones inauguraes ex profeso pa la ocasión, asina como nueves cadenes daes exclusivamente pa TDT.

La TDT permite una meyor calidá de receición y amplía la ufierta disponible tanto en númberu de canales como en versatilidá del sistema: emisión con soníu multicanal, múltiples señales de soníu, teletextu, EPG (guía electrónica de programes), canales de radio, servicios interactivos, imaxe panorámica, etc. A mediu plazu el sistema de televisión analóxica desapaecerá completamente lliberando frecuencies que permitirán aumentar la ufierta de canales, la so calidá y otros servicios en TDT. El sistema de radio dixital DAB tamién entamó les sos emisiones en 1998 pero aparenta, na práutica ser inviable y/o poco rentable, la so receición al nun existir nel mercáu bastantes receptores.

L'apagón analóxicu n'España ta previstu p'abril de 2010, dos años enantes de la fecha llímite impuesta pola Comisión Europea. Esa ye la fecha llímite pero va facese progresivamente en distintes partes del país. El primer municipiu en tenr l'apagón dixital fue el gallegu d'A Fonsagrada

Referencies

Enllaces esternos

Wikimedia Commons tien conteníu multimedia tocante a Televisión Dixital Terrestre.