Romería viquinga de Catoira

De Wikipedia
Saltar a navegación Saltar a la gueta
Nave viquinga na Ría de Arousa.

La Romería viquinga de Catoira (oficialmente en gallegu, Romaría viquinga de Catoira) ye una fiesta profana que se celebra en Catoira, Galicia, España, nes redolaes del castellum honesti, les actuales Torres d'Oeste, cada primer domingu d'agostu dende 1961, recordando'l papel que tuvo Catoira na defensa de Galicia frente a los ataques normandos na gueta del tesoru de la ilesia compostelana, y u s'escenifiquen les invasiones viquingues asocedíes nel llugar fai alredor de mil años.[1]

Los vecinos de Catoira amarutanse de guerreros viquingos y de llabradores gallegos de la dómina pa representar la llucha. La fiesta empieza a les 10 de la mañana con música popular gallega poles cais de la villa. La fiesta en sí faise alredor de los restos de les torres y de la Capiya d'Oeste, na Ría de Arousa xuntu al ríu Ulla, u s'instala la feria medieval y ufiértense moxones y vinu del Ulla. El cénit del eventu asocede col desembarcu. Los vecinos que faen de normandos apuerten pola ría con un retruque d'un bote viquingu del sieglu XI pa tomar les torres. El restu de los vecinos faen d'habitantes de la villa, que van intentar lluchar escontra l'invasor. Los festexos siguen con una xinta popular (sardiñada, pulpu, empanada…), col son de fondu de les gaites. La fiesta remata cola verbena.[2]

Marcu hestóricu[editar | editar la fonte]

Torres d'Oeste.

Catoira foi dende l'antigüedá un llugar estratéxicu, la entrada pel mar hasta Compostela, polo que yá dende la Edá Media establecióse un importante complexu militar pa la defensa del sepulcru del apóstol de los ataques principalmente normandos y sarracenos, polo que se construyeron diverses torres de defensa no fondero de la ría, onde desagua'l ríu Ulla, les llamaes Torres d'Oeste. Foi'l rei d'Asturies, Alfonsu III, el que mandó irguir nel sieglu IX, amás de la Catedral de Santiago, la reconstrucción del ‘’Castellum Honesti’’ en Catoira. El castiellu convertióse n'unu de los más importantes d'Europa, y del que se caltienen solo, parte de dos de les grandes torres. L'edificiu siguió creciendo colos trabayos del rei de Galicia y Llión, Alfonsu V, que venció los normandos de Olaf Haraldson. Dempués de que nel sieglu XII la monarquía donara'l Castiellu a la mitra compostelana, los obispos Cresconio y Diego Peláez siguieron na fortificación de la ciudadela pa la defensa de Santiago. Amás, polo visto nel castiellu, nació Diego Xelmírez, primer arzobispu de Santiago, yá que'l so padre, el caballeru Xelmirio, fuera alcalde de la fortaleza nel sieglu XI. Les torres torgaron mientres sieglos l'ascensu pol Ulla de los exércitos normandu sarracenu; el diseñu final del sieglu XIII yera una cortil elíptica con siete torres (queden anguaño de pies, solu dos del sieglu XI; les ruines d'otros dos son del sieglu XII, siendo de dómina romana los restos d'otres que s'empobinen escontra l'interior). En mediu esistía una gran torre central. Na alta Edá Media lleguen a Jakobsland (nome qu'ellos-y daben a Galicia) los primeros grupos de pirates normandos atraíos poles noticies sobre les riqueces capitalines compostelana. Los viquingos escalen y quemen villes en tola mariña, y entren pola Ría de Arousa consiguiendo en 850, Iria Flavia, provocando la fuxida del obispu y del cabildru escontra Compostela. En 859 y 968 fíxose, sicasí, una bona defensa gallega dende'l ‘’Castellum Honesti’’ (Torres d'Oeste), consiguiendo detener l'ataque escandinavu y torgando qu'estos consiguieren Compostela.

Dempués de que'l Reinu de Galicia perdiera'l so poder llexislativu, pasando a depender de la Corona de Castiella y, especialmente, a partir del reináu de los Reis Católicos, Catoira entra nun períodu de progresiva decadencia. Les torres van sirvir de cantera pa les villes de la zona.

La fiesta[editar | editar la fonte]

Vecinos amarutaos na romería con una de les Torres d'Oeste no fondero.

La fiesta entamó celebrase en 1961. La primer etapa foi la del Atenéu d'Ullán ente 1961 y 1964. Tou empezó en 1959, cuando'l poeta y cura de Isorna, Faustino Rey Romero y el poeta catoirense, Baldomero Isorna Casal, fundaron l'Atenéu d'Ullán, un foru artístico y lliterario formáu por intelectuales de les tierres del Ulla. Esti grupu d'intelectuales son los que decidieron en 1960, nuna de les sos conxustes, que taría bien celebrar a manera de fiesta'l desembarcu del rei Ulfo. La primer Romería Viquinga tuvo llugar el 29 de xunetu de 1961, con una misa na Capiya de Santiago de les Torres d'Oeste, na memoria de Diego Gelmírez y demás defensores de la fortaleza. Amás, Pedro Montañés, coronáu con cañes d'árboles, representaba'l tarrecible viquingu Ulfo y saltaba a la tierra dende la so dorna pa dir al alcuentru del obispu Cresconio, representáu pol rei Romeru que, con solemnes pallabres, apoderaba al invasor, faciéndo-y arrodillarse sumisamente ante'l representante de la cristiandá. Dempués tenía llugar una xinta campestre col son d'una banda de gaiteros, amás d'un actu lliterariu nel que participaben escritores de la contorna y nel que se basa l'actual pregón de les fiestes. Pela nueche, nes almenes de les torres, encendíense cacharelas pa recordar la manera nel qu'antaño s'anunciaba l'arribada de pirates na ría.[3]

La segunda etapa entama en 1965 y dura hasta 1990, ye'l períodu d'afitamientu de la romería, d'esta vuelta patrocinada pola empresa local de Cerámica Domínguez del Noroeste S.A. y entamada polos sos trabayadores. En 1988 la fiesta foi declarada d'Interés Turísticu Nacional.

La tercera y última etapa principia en 1991, cuando ye'l mesmu Conceyu de Catoira ye quien toma les riendes de la fiesta. Ye'l períodu de proyección internacional, aniciando'l hermanamientu cola villa dinamarquesa de Frederikssund. En 2002 la fiesta foi declarada d'Interés Turísticu Internacional.[4]

Hermandaes de Catoira[editar | editar la fonte]

Veleros na ría de Frederikssund (Dinamarca).

La romería ye tamién importante pa Galicia pol intercambiu cultural sobre les invasiones normandes que se vinieron desenvolviendo en Catoira col so hermanamientu en 1993 cola villa dinamarquesa de Frederikssund y, un añu más tarde, en 1994, cola villa británica de Watchet, los trés enllazaos hestóricamente pol desembarcu viquingu.

Galería de semeyes[editar | editar la fonte]

Vease tamién[editar | editar la fonte]

  • Viquingos en Galicia
  • Torres d'Oeste

Referencies[editar | editar la fonte]