Rho Cassiopeiae

De Wikipedia
Saltar a navegación Saltar a la gueta
Artículu revisáu
Rho Cassiopeiae
Constelación Cassiopeia
Ascensión reuta α 23h 54min 23,0s
Declinación δ +57º 29’ 58’’
Distancia 10.100 ± 1600 años lluz
Magnitú visual +4,52
Magnitú absoluta -7,48
Lluminosidá 550.000 soles (bolométrica)
Temperatura 7300 K
Masa 40 soles (aprox)
Radiu 450 soles
Tipu espectral G2Ia0y
Velocidá radial -43,1 km/s

Rho Cassiopeiae (ρ Cas / 7 Cassiopeiae / HD 224014) ye una estrella hiperxigante na constelación de Cassiopeia. Ta asitiada al suroeste de Caph (β Cassiopeiae), al noroeste de Schedar (α Cassiopeiae) y al este de M52 y NGC 7635. Alcuéntrase bien alloñada, a unos 10.000 años lluz del Sistema Solar, pero a pesar de la distancia ye visible a simple vista.

Carauterístiques físiques[editar | editar la fonte]

Rho Cassiopeiae ye una hiperxigante mariella de tipu espectral G2Ia. Esta clase d'estrelles son oxetos particularmente raros de los que namái hai siete conocíos na Vía Lláctea. Con una temperatura superficial de 7300 K, la lluminosidá de Rho Cassiopeiae, la mayor parte como lluz visible, ye de 550.000 soles. El so radiu, unes 450 vegaes mayor qu'el del Sol, equival a 2,15 UA. Asitiada nel centru del sistema solar, los cuatro primeros planetes, incluyida la Tierra, quedaríen englobaos dientro de la mesma estrella. Ye una de les estrelles conocíes de mayor tamañu.

Variabilidá[editar | editar la fonte]

Rho Cassiopeiae ye una estrella de lluminosidá variable. La so variabilidá nun ye bien conocida y ye considerada una variable irregular o semirregular. La so magnitú aparente habitual ye +4,52, pero en 1946 baxó hasta magnitú 6. Lo mesmo asocedió en 2000-2001, cuando produció unu de los mayores estallíos conocíos, espulsando un 3% de la masa solar, l'equivalente a 10.000 vegaes la masa de la Tierra. Paez que sufre estes erupciones cada 50 años aprosimao —datos previos suxuren erupciones en 1893 y 1945—. Cuando camuda la so lluminosidá, tamién el so tipu espectral cimbla ente F8 y K5, anque en 1946 llegó a M5.

Tres la erupción de 2000, l'atmósfera de la estrella tuvo pulsiando de forma estraña. Les sos capes esteriores paecen tar colapsando de nuevu, como asocedió enantes del so postreru estallíu. Los astrónomos piensen qu'una erupción entá mayor puede ser inminente. Ello ye que espérase qu'esplote como supernova nun futuru cercanu.

Ver tamién[editar | editar la fonte]

Referencies[editar | editar la fonte]