Ras Algethi

De Wikipedia
Saltar a navegación Saltar a la gueta
Ras Algethi
Ras Algethi A/B
Constelación Hércules
Ascensión reuta α 17h 14min 38,80s
Declinación δ +14º 23’ 25,0’’
Distancia 382 años lluz
Magnitú visual +3,48 / +5,4
Magnitú absoluta -2,04 / ?
Lluminosidá 17.000 (bolométrica) / 140 soles
Temperatura 3300 / ? K
Radiu 400 / ? soles
Tipu espectral M5IIvar / G5III + F2V
Velocidá radial -33,1 km/s
Otros nomes HD 156014 / 156015
HR 6406 / 6407
HIP 84345

Ras Algethi o Rasalgethi (α Herculis / α Her / 64 Herculis) ye una estrella de magnitú aparente +3,31 na constelación d'Hércules. Alcuéntrase a 382 años lluz de distancia del Sistema Solar.

Nome[editar | editar la fonte]

El nome de Ras Algethi, procedente del árabe Ar-Rās al-Jāthīyy (الرأس الجاثي), significa «la cabeza del arrodillado». Sicasí, ente los nómades esta estrella yera conocida por Al-Kalb ar-Rāʽi (الكلب الراعي), «el perru del pastor», títulu que compartía con Ras Alhague (α Ophiuchi).

Los chinos llamaben a α Herculis Ti Tso, «l'asientu del emperador», según Tsin. Per otra parte, esta estrella y delles cercanes a ella —incluyendo a ι Herculis y κ Herculis— constituyíen el asterismo Ho, una de les midíes utilizaes en China.[1]

Carauterístiques físiques[editar | editar la fonte]

Ras Algethi ye un sistema estelar quíntuple, que la so estrella principal, Ras Algethi A (HR 6406),[2] ye una superxigante o xigante colorada lluminosa de tipu espectral M5II. La so lluminosidá, nel espectru visible, ye 475 vegaes mayor que la del Sol, pero si inclúyese la enerxía que la estrella emite como radiación infrarroxo, la so lluminosidá xube hasta 17.000 soles. El so radiu, 400 vegaes más grande qu'el del Sol, ye de 1,9 UA; asitiada nel centru del Sistema Solar, la estrella estenderíase más allá de la órbita de Marte. Ye, amás, una variable irregular que'l so rellumu varia del orde d'una magnitú en periodos que van de meses a años.[3] Estudios fechos per aciu interferometría amuesen que tien dos compañeres bien cercanes; la primera puédese resolver namái n'ocasiones y ta dixebrada 0,02 segundos d'arcu d'ella, ente que la segunda tardienta 10 años en orbitarla.[4]

Ras Algethi B (HR 6407)[5] ta asitiada a 550 UA y emplega más de 3000 años en completar la órbita en redol a Ras Algethi A. De la mesma ye una estrella binaria, formada por una xigante mariella de tipu G5III y una nana blancu-mariella de tipu F2V. Separaes ente sí 0,4 UA —aprosimao la distancia de Mercuriu al Sol—, tarden 52 díes en completar la órbita. Una nube de gas n'espansión, creada pol fuerte vientu estelar que sopla dende la superxigante colorada, envolubra a esta binaria.[3]

Hai tamién dos compañeres más de magnitúes aparentes 11,1 y 15,5 a distancies respeutives de 79 segundos d'arcu y 19 segundos d'arcu, pero que paecen ser compañeres óptiques.[4]

Ver tamién[editar | editar la fonte]

Referencies[editar | editar la fonte]

  1. Allen, Richard Hinckley (1889). «Hercules», en Courier Dover Publications: Star Names — Their Lore and Meaning (n'inglés), 563. ISBN 0-486-21079-0. Consultáu'l 8 d'ochobre de 2010.
  2. Ras Algethi A (SIMBAD)
  3. 3,0 3,1 Ras Algethi (Jim Kaler, Stars)
  4. 4,0 4,1 The Webb Deep-Sky Society
  5. Ras Algethi B (SIMBAD)