Ramón Álvarez Palomo

De Wikipedia
Saltar a navegación Saltar a la gueta
Ramón Álvarez Palomo
Vida
Nacimientu 7 de marzu de 1913
Nacionalidá Bandera d'España España
Fallecimientu

14 de payares de 2003

(90 años)
Estudios
Llingües castellán
Oficiu
Oficiu sindicalista
Miembru de Confederación Nacional del Trabayu
Cambiar los datos en Wikidata

Ramón Álvarez Palomo (7 de marzu de 1913 - 14 de payares de 2003) foi un históricu anarcosindicalista asturianu, foi figura clave de la Revolución de 1934 y miembru del Conseyu Soberanu d'Asturies y Lleón.

Nació en Xixón en 1913 y finó en Xixón el 14 de payares de 2003. Panaderu d'oficiu, esti líder sindical anarquista, entamó a trabayar a los 12 años, tres formase na escuela neutra d'Eleuterio Quintanilla. A los 15 años ingresó na CNT y a los 20 foi escoyíu secretariu xeneral de la CNT d'Asturies, Lleón y Palencia.

Revolucionariu[editar | editar la fonte]

Palomo foi cabezaleru de los movimientos revolucionarios de la CNT de 1933 polo que lu metieron presu, na cárcel fizo amistá con Buenaventura Durruti. Foi amnistiáu n'abril de 1934 y participó na Revolución Asturiana de 1934.

Ramón Álvarez Palomo foi secretariu del Comité Revolucionariu de Xixón, y tres la derrota de la "Comuna Asturiana" fuxó a Francia en 1935 onde taría fasta l'amnistía del Frente Popular. Col españíu de la Guerra Civil española ocupóse de la movilización pa la defensa de Xixón y formó parte del Conseyu Conceyeru Republicanu. Ramón Álvarez Palomo foi Conseyeru de Pesca del Conseyu Interprovincial d'Asturies y Lleón primero y del Conseyu Soberanu depués, en representación de la Federación de Grupos Anarquistas (FAI).

L'Exiliu[editar | editar la fonte]

Tres la ocupación d'Asturies pol exércitu franquista, en 1937, exíliase primero en Cataluña, (onde sedrá secretariu del ministru d'Instrucción Pública de la República, Segundo Blanco) y tres la ocupación d'esta a Francia. Tando en Francia entama la II Guerra Mundial, que pasa escondíu nuna zona ocupada polos alemanes y onde fizo contactos cola Resistencia francesa. En 1945 conoció a la que sedría la so segunda esposa, Aurora Molina Iturbe, fia d'un destacáu anarcosindicalista de la FAI. Pola casa del matrimoniu en París pasaben gran parte del anarcosindicalismu asturianu clandestín y encargábense de busca-yos trabayu y documentación.

Nesti periodu tien llugar una escisión dientro de la CNT, dando llugar a los que podíemos llamar una facción ortodoxa y otra posibilista. Esta última foi pola que tomó partíu Ramón y sedría Secretariu Xeneral ente payares de 1945 y avientu de 1947, nos plenos que tuvieron llugar en Toulouse.

A finales de los sesenta contribuyó, xunto con líderes de la UGT, a la creación del Fondo Unificado de Solidaridad Obrera (FUSOA), destináu a recoyer fondos nos centros de trabayu p'aidar a los obreros presos o despidíos. Tornó al estáu español delles veces enantes de la restauración democrática pa particiapa en Madrid en dellos conceyos del comité nacional de la CNT, él yera secretariu del subcomité en Francia.

Retornu a Asturies[editar | editar la fonte]

Ramón Álvarez Palomo tornó a Asturies per primer vegada en 1972 y, de forma definitiva, en 1976. En 1978 foi escoyíu otra vuelta secretariu rexonal de CNT. Nel V congresu del sindicatu foi ún de los más firmes opositores a la ortodoxia anarquista, defendida, ente otros, por José Luis García Rúa. Les discrepancies propiciaron la ruptura y l'apaición de la Confederación General del Trabajo, del que foi ún de los fundadores defendiendo la participación de los anarcosindicalistes na negociación colectiva y nes eleiciones sindicales pa los comités d'empresa. Álvarez Palomo foi direutor de dellos periódicos llibertarios.

Producción bibliográfica[editar | editar la fonte]

Álvarez Palomo foi autor de dellos llibros, ente ellos:

  • Eleuterio Quintanilla (vida y obra del maestro)
  • Avelino G. Mallada, alcalde anarquista
  • José María Martínez. Símbolo ejemplar del obrerismo militante
  • Historia negra de una crisis libertaria
  • Rebelión militar y revolución en Asturias


Predecesor:
Nun hubo
Bandera CNT-AIT.svg Secretariu Xeneral de la CNT nel exiliu (fación posibilista, posterior a la escisión)
1945 - 1947
Socesor:
Juan José Domenech