Primer Guerra Mundial

De Wikipedia
(Redirixío dende Primera Guerra Mundial)
Saltar a navegación Saltar a la gueta
Wikipedia:Wikipedia:Llista d'artículos que toa Wikipedia tien que tener/Archivu
Wikipedia:Correxir
Wikipedia:Artículos destacaos
Delles imáxenes de la Primer Guerra Mundial.

La Primer Guerra Mundial, tamién conocida como Gran Guerra o la Guerra de Guerres, foi una guerra mundial aniciada n'Europa que duró ente'l 28 de xunetu de 1914 y el 11 de payares de 1918. Descrita na dómina como "la guerra que va finar con toles guerres"[1], provocó la movilización de más de 70 millones de militares, 60 millones d'ellos europeos, no que foi una de les mayores guerres na historia[2][3]. Estímase que nueve millones de combatientes y siete millones de civiles morrieron como resultáu direutu de la guerra, a los qu'habría que sumar la influyencia que tuvo na mortandá de la pandemia de gripe de 1918, que causó ente 50 y 100 millones de muertos en tol mundu[4]. La perda de vides humanas foi pergrande de resultes de l'aplicación nel campu de batalla de les nueves teunoloxíes d'armamentu, y tamién pol estancamientu tácticu causáu pol enfotu na sangrina guerra de trincheres. Foi ún de los conflictos bélicos más mortíferos de la historia, y el so resultáu precipitó cambios políticos perimportantes, como'l ciclu revolucionariu de 1917-23, en varies de les naciones que participaran nella. Les rivalidaes ente naciones que quedaron ensin resolver cuando esta guerra finó contribuyeron al españíu de la Segunda Guerra Mundial unos venti años dempués de la so fin[5].

El 28 de xunu de 2014 Gavrilo Princip, un nacionalista serbobosniu, asesinó al heriede del tronu del Imperiu austrohúngaru, l'archiduque Franz Ferdinand, en Sarayevu, provocando la nomada Crisis de xunetu. Nesi contestu, Austria-Hungría dió-y un ultimátum a Serbia el 23 de xunetu; la negativa serbia a satisfacer les piticiones austriacas ficieron que dambos países entamaran los sos preparativos pa la guerra.

Les redes d'aliances ente les distintes naciones del continente fizo que lo que yera un conflictu bilateral nos Balcanes convirtiérase nuna guerra qu'implicó a la mayoría d'Europa. En 1914 les grandes potencies europees agrupábense en dos coaliciones: la Triple Entente, formada por Francia, Rusia y Gran Bretaña, y la Triple Alianza, formada por Alemaña, Austria-Hungría ya Italia (esta yera de naturaleza defensiva, lo que permitió a Italia mantenese al marxe de la guerra en 1914)[6]. Rusia decidió respaldar a Serbia, y el 25 de xunetu dio órdenes pa entamar la preparación pa la guerra, y dempués de qu'Austria-Hungría bombardeara la capital serbia, Belgráu, el 28 de xunetu, aprobó la movilización de les tropes de los distritos militares averaos a Austria[7]. La orde de movilización xeneral diose'l día 30 de xunetu, y foi respondida, al día siguiente, por Alemaña y Austria-Hungría, que ficieron lo mesmo, al tiempu qu'Alemaña desixió a Rusia la so desmovilización nel plazu de 12 hores[8]. Como Rusia refugó facelo Alemaña declaró-y la guerra el 1 d'agostu en sofitu d'Austria-Hungría, que declaró la guerra a Rusia el 6 d'agostu. Francia, pela so banda, ordenó la movilización xeneral, pa sofitar a Rusia, el 2 d'agostu[9].

La estratexa alemana pa desarrollar una guerra en dos frentes, escontra Francia y Rusia, pasaba por concentrar el so exércitu nel oeste, pa derrotar a Francia en cuatro selmanes, y dempués esviar les sos tropes al este primero de que Rusia acabara de completar la so movilización; foi lo que se conoció posteriormente como plan Schlieffen[10]. El 2 d'agostu Alemaña desixió-y a Bélxica que-y permitiera pasar llibremente los sos exércitos pol so territoriu, y el refugu belga llevó a la invasión del país na madrugada del 3 d'agostu y la declaración simultánea de guerra a Francia. El gobiernu belga invocó les cláusules del tratáu de Londres de 1839, y acordies con elli Gran Bretaña declaró-y la guerra a Alemaña en 4 d'agostu[11]. El 12 d'agostu Gran Bretaña y Francia declararon la guerra a Austria-Hungría, y el 23 d'agostu Xapón púnxose del lláu de la Entente, porque vio na guerra la oportunidá d'aumentar, capturando les posesiones alemanes en China y nel océanu Pacíficu, la so esfera d'influyencia. La guerra espardiose polos imperios coloniales de les potencies en llucha, faciendo del conflictu una confrontacion global. La Entente y los sos aliaos entamaron a ser conocíos como Potencies Aliaes, mentantu que l'alianza d'Austria-Hungría y Alemaña entamó a ser conocida como Potencies Centrales.

L'avance alemán en territoriu francés foi frenáu na batalla del Marne, y al final 2014 el Frente Occidental convirtiose nuna guerra de gastadura, na que se construyeron llínies de trincheres que camudaron perpoco hasta 1917. Nel Frente Oriental hebo munchos más avances territoriales: Serbia foi derrotada en 1915, y Rumanía xuntose coles Potencies Aliaes en 1916 namái pa ser derrotada al añu siguiente. En payares de 1914 l'Imperiu otomanu incorporose a la guerra nel bandu de les Potencies Centrales, lo que fizo qu'hobiera guerra nel Cáucasu, Mesopotamia y la península del Sinaí. en 1915 Italia xuntose colos aliaos, y Bulgaria coles Potencies Centrales. L'agudización de la guerra somarina por parte d'Alemaña llevó al hundimientu de siete barcos mercantes estauxunidenses, al tiempu que se conoció qu'Alemaña taba intentando que Méxicu-y declarara la guerra a los Estaos Xuníos. Esti país decidió, nesi contestu, declará-y la guerra a Alemaña el 6 d'abril de 1917.

En Rusia, la Revolución de Febreru de 1917 depuso al zar y sustituyolu por un gobiernu provisional. Sicasí, el descontentu popular pol coste de la guerra desembocó na Revolución d'Ochobre, la creación de la República Socialista Soviética y la firma pol nuevu gobiernu del tratáu de Brest-Litovsk, que punxo fin a la participación rusa na guerra. Esto permitió a Alemaña treslladar gran cantidá de tropes al Frente Occidental pa llanzar la so ofensiva de marzu de 1918. Esta, a lo primero, foi esitosa, pero los aliaos consiguieron resistir, ya inclusu ganar terrenu, na nomada Ofensiva de los Cien Díes[12]. La primera de les Potencies Centrales en capitular foi Bulgaria, que robló'l armisticiu de Salónica'l 29 de setiembre de 1918. Siguiolu l'Imperiu otomanu el 30 d'ochobre, que formó l'armisticiu de Mudros. El 4 de payares l'Imperiu austrohúngaru robló l'armisticiu de Villa Giusti. Ensin aliaos, con una revolución españando y colos militares convencíos de la inutilidá de siguir lluchando, el káiser Guillermu abdicó'l 9 de payares, y el nuevu gobiernu robló, dos díes dempués, l'armisticiu del 11 de payares de 1918.

La Primer Guerra Mundial supunxo un cambeu importantísimo, a nivel políticu, cultural, económicu y social, a nivel mundial. De resultes de la guerra dexaron d'esistir cuatro imperios (alemán, austrohúngaru, otomanu ya rusu), y de la so ruptura surdieron un gran númberu de naciones y, con elles, nuevos problemes de nacionalismu ya irredentismu qu'habíen desembocar, dos décades dempués, nún nuevu conflictu. Tres de la firma de los trataos que finaron la guerra hebo revoluciones y revueltes per ende, na mayoría de los casos de naturaleza socialista o anticolonial. Les cuatro potencies aliaes (Gran Bretaña, Francia, Estaos Xuníos ya Italia) impunxeron dures condiciones a los imperios derrotaos nuna serie de trataos roblaos na Conferencia de Paz de París de 1919. Impulsaron tamién, nún intentu d'evitar otra guerra mundial que foi finalmente fallíu por munches y variaes razones, la formación de una Sociedá de Naciones. La firma del tratáu de Versalles, y cómo esti afectó a Alemaña, favoreció ente más razones l'ascensu del Partíu Nazi alemán, qu'habría provocar la Segunda Guerra Mundial. D'otra banda, los trataos de paz y la implementación de dellos acuerdos secretos roblaos demientres la guerra ente los aliaos camudaron les fronteres en munches partes d'Europa, Asia y Oriente Próximu, con repercusiones polítiques qu'entá pueden sintise anguaño[13].

L'orixe de la guerra

La guerra xestose nes rocees ente les grandes potencies europees. Los bandos cabezaleros foron les Potencies Aliaes, d'un llau, y les Potencies Centrales d'otru. Pero ye perdifícil desplicar por qué s'anició la guerra, y nun hai una sola causa, sinon munches entremezclaes.

La chispa qu'oficialmente dio aniciu a la guerra foi l'asesinatu el 28 de xunu de 1914 en Sarajevo del príncipe herederu del tronu austro-húngaru, Franz Ferdinand, archiduque d'Austria. L'estudiante serbo-bosniu Gavrilo Princip matolos a tiros a él y a la so muyer, la condesa Sophie Reichsgräfin Chotek, nun atentáu mui complicáu del cual nunca nun se supo bien la hestoria (hebo una conspiración de delles persones, y un collaciu de Princip tirara una bomba a la comitiva, que feriera a otres persones; Princip disparó un ratu dempués, cuandu ya paecía que l'atentáu fallara).

Pero esti atentáu foi namás que'l detonante nuna situación que ya yera perdifícil. Ente les braeres razones taben:

  • Un fortísimu nacionalismu. Yera una época na qu'Europa taba convulsa poles tensiones nacionalistes ya imperialistes de dellos países.
  • Conflictos anteriores ensin resolver. Hebía tremendes disputes coloniales y lluches pola supremacía.
  • Un sistema d'aliances mui complicáu y delicáu. Enantes de la guerra, la Entente Cordiale agrupó a Francia y Gran Bretaña, y llueu amestóse Rusia na Triple Entente; la Triple Alianza formábenla Alemaña, Austria-Hungría ya Italia, anque llueu Italia lluchó coles potencies aliaes. Estes aliances respondíen a múltiples disputes coloniales y tratos pa resolveles.
  • Retrasos nes comunicaciones diplomátiques. Les comunicaciones de la época nun yeren tan rápides como anguaño; dizse que la falta de comunicación y la llercia tuvieron un papel perimportante na cascada de declaraciones de guerra que siguió al asesinatu de Sarajevo.
  • La carrera d'armes. Esto tuvo tamién influencia nes decisiones de los gobernantes, temerosos de perder la so preponderancia en delles estayes militares.
  • Planes militares ríxidos. Dizse que los mandos militares nun fueron pa facer un análisis esautu de la situación y esto llevó a munches decisiones enquivocaes (por exemplu, al principiu tol mundu creyía que la guerra diba ser curtia y por eso llanzáronse a ella).

L'españíu de la guerra

Aliances militares europees en 1915. Les Potencies Centrales tan pintaes n'encarnáu, les Potencies Aliaes en verde y los países neutrales en mariellu. Les fronteres de los Balcanes nun tan bien pintaes; les que salen equí son les de la situación en 1911.

Dempués del atentáu de Sarajevo, Austria-Hungría echó-y la culpa al gobiernu de Serbia (lo que yera en parte verdá, anque indireutamente). Plantegó-y a Serbia un ultimátum de 10 puntos el 23 de xunetu de 1914. Serbia aceutó cuasi tolos puntos el día 25, pero Austria-Hungría dixo que nun yera bastante. Rusia pidió-yos entós a los austro-húngaros que camudaren los términos del ultimátum, y que si atacaben Serbia, Rusia entraría na guerra axudando a Serbia.

Austria-Hungría declaró-y la guerra a Serbia el 28 de xunetu, y Rusia movilizóse énte Austria-Hungría. Entós Alemaña alvirtió a Rusia de que diba axudar a Austria-Hungría, y dempués de delles xestiones diplomátiques ensin ésitu Alemaña declaró-y la guerra a Rusia el 1 d'agostu.

Francia movilizóse esi mesmu día, y Alemaña declaró-y la guerra el día 3. Alemaña, pa atacar Francia, decidió cruzar Bélxica violando un tratáu de neutralidá anterior; esto fizo que Gran Bretaña-y declarara la guerra a Alemaña el día 4. Col tiempu, y por motivos estremaos, foron xuniéndose a la guerra nel bandu aliáu Italia, Xapón (23 d'agostu de 1914), Estaos Xuníos (6 d'abril de 1917)... y nel bandu de les potencies centrales l'Imperiu otomanu y Bulgaria.

Los frentes

Hebo dellos frentes. En principiu, lluchose sobre too nel frente occidental o franco-belga y nel oriental o rusu. Pero la guerra foi evolucionando per munchos otros llugares.

El frente occidental

Soldaos británicos remanando una ametrallaora Vickers y llevando mázcares antigás na Primera Batalla del Somme, xunetu de 1916.

Nel frente occidental, los alemanes cuntaben con ganar rápido la guerra a los franceses con pocos soldaos, y que les batalles más grandes diben dase dempués nel frente rusu. Esto taba nel nomáu Plan Schlieffen. Los franceses iguaron el Plan XVII, nel qu'esperaben un ataque frontal (que nun yera lo que taba previsto nel Plan Schlieffen). Los alemanes ganaron a los franceses na Batalla de Charleroi (21 d'agostu). Pero na Primera Batalla del Marne los franceses ficieron replegase a los alemanes, y con esto terminóse'l plan Schlieffen y la idea d'una victoria rápida.

Les fuercies equilibráronse, y entrose na guerra de posiciones. Los soldaos entamen a lluchar en cárcoves, poniendo alambraes y mines. Yera cuasi imposible ganar una destes batalles contra una defensa tala, y los exércitos calteníen les posiciones. L'emplegu masivu de teunoloxíes comu'l alambre d'espinos, artillería, ametralladores, gases venenosos... fizo la guerra particularmente dura y sangrienta, y les defenses más fuertes que los ataques.

El frente oriental

Soldaos rusos esperando un ataque alemán nuna llinia de cárcoves.

L'exércitu rusu yera descomanáu en cuanto al númberu de soldaos (8 millones en 1914), pero la realidá ye que los soldaos yeren campesinos ensin formación militar afayaíza, ensin bones armes y con mandos mediocres. Na Batalla de Tanenberg (del 26 al 30 d'agostu de 1914) los alemanes interceutaren los mensaxes de los rusos, que diben ensin cifrar, y sabíen lo que diben facer les sos tropes. El I y el II exércitu rusos alcontráronse col VIII exércitu alemán. Nesa batalla el II exércitu rusu foi práuticamente elimináu. En total hebo alredor de 50.000 muertos, 30.000 d'ellos rusos, y otros 95.000 soldaos rusos fechos presos. Paul von Hindenburg ya Erich Luddendorff algamaron perimportantes victories contra los rusos, nesta batalla y na de Mazure (del 6 al 15 de setiembre de 1914). En 1915 los alemanes echaron a los rusos de Polonia, no que se llamó Gran Retirada.

La marcha de la guerra, xunto con otros munchos factores, influyó na Revolución Bolxevique de 1917. Dempués de la revolución, los rusos firmaron la paz de Brest-Litovsk el 3 de marzu de 1918.

Otros frentes

Hebo dellos otros frentes. Na Batalla de los Dardanelos o Batalla de Gallipoli, en 1915, los británicos y los franceses intentaron conquistar la capital otomana ensin conseguilo. Lawrence de Arabia lluchó n'África col envís de dar sofitu a les tribus árabes pa que llucharen énte los otomanos; n'Africa hebo munches otres batalles y estratexes, desendolcándose tou un frente de la guerra nes colonies y xugando coles influyencies de los respeutivos países.

Camudamientos na guerra

El bloquéu naval de la Entente contra Alemaña taba dando munchos problemes a los alemanes, y esti país entamó la guerra submarina ensin restricciones, hundiendo barcos de mercancíes y civiles, cosa qu'enantes nun se facía de cutio. Los Estaos Xuníos nun entraren na guerra, que consideraben un problema internu europeu. Pero dellos ataques submarinos contra barcos d' Estaos Xuníos ficieron al presidente Woodrow Wilson declarar la guerra a Alemaña'l 6 d'abril de 1917. Austria-Hungría nun quiso firmar una paz aparte colos Estaos Xuníos, polo que estos tamién declararon la guerra a esta potencia.

Los alemanes camentaron que diben ganar la guerra entantes de que los Estaos Xuníos tuvieren tiempu d'aportar a Europa con toles tropes necesaries pa ser un problema. Luddendorff iguó planes pa una gran ofensiva na primavera de 1918 nel frente occidental; tenía l'envís d'entamar maniobres de distraición pa separtar los exércitos británicu y francés. Pero dexó les meyores fuercies en Rusia (pa controlar el territoriu conquistáu) y namás que traxo una pequeña parte de les fuercies del Este pal Oeste.

La operación emtamó'l 21 de marzu de 1918, y diba munchu tiempu que nun s'emplegaba nenguna táutica na guerra. Con táutiques d'infiltración y poca artillería, los alemanes golpiaron puntos febles de mandu y lloxística de los franceses y británicos. Avanzaron 60 km.

Cañones superpesaos Krupp pudieron acercase y bombardear París. Los alemanes creyíen que diben ganar la guerra llueu, pero nun foi asina. Ente marzu y abril morrieron 270.000 soldaos alemanes. Dempués de delles ofensives alemanes, los aliaos ficieron retirase a los alemanes na Segunda Batalla del Marne, qu'entamara con un ataque alemán.

La moral n'Alemaña taba mui baxa y había munchos problemas internos.

La victoria de la Entente

La que se llamó ofensiva de los cien díes entamose el 8 d'agostu de 1918. Na Batalla d'Amiens participaron 414 tanques y 120.000 soldaos aliaos. Na Segunda Batalla del Somme los aliaos (ente ellos 130.000 soldaos de los Estaos Xuníos) algamaron una victoria perimportante, faciendo retirase 55 km a los alemanes. El 2 de setiembre taben na mesma posición qu'enantes d' entamar la guerra, anque los aliaos teníen munchos problemes colos tanques, que fallaben y nun podíen pasar.

Luddendorff viose implicáu en dellos problemas políticos n'Alemaña, y foi destituíu pol Kaiser el 26 d'ochobre. Los sucesos internos empobinaron Alemaña a camudar les sos formes de gobiernu de manera importante; acabaron cola abdicación del Kaiser (cuasi pola fuercia) y traxeron la República de Weimar.

Bulgaria firmó l'armisticiu el 29 de setiembre de 1918. El 30 d'ochobre rindióse l'imperiu otomanu. El 3 de payares foi Austria-Hungría la que pidió un armisticiu; l'imperiu desmembróse col fin de la monarquía d'Habsburgu y Austria ya Hungría firmaron armisticios separtaos. Nel 11 de payares de 1918, a les 23:00, Alemaña firmó l'crmisticiu y entamó a retirar los sos soldaos del frente occidental.

Formalmente, la guerra siguió hasta'l Tratáu de Versalles, el 28 de xunu de 1919.

Consecuencies de la guerra

La I Guerra Mundial foi la primer "guerra total" na que les baxes civiles masives considerábense parte normal de la guerra (por exemplu, nos bombardeos). Aparte d'efeutos importantes nos gobiernos (dándo-yos nuevos poderes a munchos gobiernos col envís de ganar la guerra) los efeutos na población foron perimportantes. Por exemplu, la marcha de munchos homes a la guerra fizo que les muyeres tuvieren que trabayar en puestos que nunca nun ocuparen; dempués d'esto, fízose más fuerte la llucha pol drechu al votu pa les muyeres.

Políticamente, les potencies perdedores sofrieron mui duramente la derrota. El Tratáu de Versalles resultó mui difícil d'aceutar pa los alemanes, por exemplu. Munchos cuidaron que dempués de guerra tala diba haber una paz duradera, pero nun foi así; la situación quedara mal resuelta en munches estayes.

Teunolóxicamente, dizse que la Gran Guerra foi una guerra con táutiques del sieglu XIX fecha con teunoloxía del sieglu XX. Aparte de lo dicho enriba sobre les ferramientes de la guerra de cárcoves (de les que, n' especial, la artillería causó un númberu de muertos y feríos tremendu, y les armes químiques -gas mostaza, cloru, fosgenu- tuvieron un efeutu sicolóxicu mui fuerte) desendolcose por primera vegada l'emplegu de l'aviación na guerra. Tamién l'emplegu de submarinos foi perimportante na Primera Batalla del Atlánticu. Los tanques, emplegaos polos británicos, inauguraron l'emplegu d'armamentu mecanizáu que diba dominar el sieglu XX.

Cinca'l númberu de muertos y feríos, ye cuasi imposible poner a tol mundu d'alcuerdu y dar cifres precises (cambien muncho según l'autor). Pero dalgunos cálculos dicen que esta guerra mató a 16 millones de persones (7 millones de civiles y 9 de militares). El 56% de los muertos seríen de la Entente, y el 44% restante de les potencies centrales. El númberu de feríos podría superar los 22 millones.

Enllaces esternos

Referencies

  1. http://news.bbc.co.uk/2/hi/special_report/1998/10/98/world_war_i/198172.stm The war to end all wars, BBC News, 10 de payares de 1998.
  2. Keegan, J, The First World War, p. 8. Hutchinson, 1998. ISBN 978-0-09-180178-6.
  3. Bade, K.J., Brown A., Migration in European history: The making of Europe, pp. 167-8. ISBN 978-0-631-18939-8.
  4. Williams, R., Dual threat: the Spanish influenza and World War. University of Tennessee thesis, pp. 4-10.
  5. Wilmott, H.P., World War I, p. 307. New York, Dorling Kindersley, 2003. ISBN 978-0-7894-9627-0.
  6. Seymour, C., The diplomatic background of the war, pp. 35, 147. Yale University Press, 1916.
  7. Lieven, D., Towars the flame: empire, war and the end of the Tsarist Russia, p. 326. Penguin, 2016. ISBN 978-0-141399744
  8. Martel G., The month that changed the world: July 1914. 2014.
  9. https://www.loc.gov/law/help/digitized-books/world-war-i-declarations/ww1-gazettes/France-doc-3-OCR-SPLIT.pdf Declaración francesa de guerra, recoyida nel Journal Officiel de la République Française, pp. 7053-4 (2 d'agostu de 1914).
  10. Zuber, T., Inventing the Schlieffen plan: German war planning, 1871-1914, pp. 46-9. 2011.
  11. Evans, D., The First World War, p. 12. Londres, Hodder Arnold, 2004. ISBN 978-0-340-88489-8.
  12. Sheffield, G., Forgotten victory, p. 251. 2002. ISBN 978-0747271574.
  13. Gerwath, R., The vanquished: why the First World War failed to end, 1917-1923, p. 3323-3342. Penguin, 2016. ISBN 978-0141976372.