Primer guerra chechena
| Primer guerra chechena | ||
|---|---|---|
Parte de conflicto ruso-checheno (es)  | ||
 | ||
| Fecha | 11 avientu 1994 → 31 agostu 1996 | |
| Llugar | República de Chechenia, República d'Ingusetia, Krai de Stávropol y República de Daguestán | |
| [editar datos en Wikidata] | ||
 | Esti artículu o seición necesita un ameyoramientu no que cinca a la redaición, la gramática o la ortografía. |
 | Esti artículu necesita wikificase. |
La Primer Guerra Chechena foi un conflictu bélicu ente la Federación Rusa y la República Chechena d'Ichkeria que se desendolcó ente avientu de 1994 y agostu de 1996.
L'Orixe del conflictu
[editar | editar la fonte]En 1991 la Xunión Soviética disuélvese convirtiéndose Rusia nuna nación independiente, darréu la comunidá internacional entendió que la propia Rusia yera la heredera y socesora de l'antigua nación comunista magar que perdió influencies y poder de calter políticu y militar enforma.
Nesti nuevu estáu que surdía, La Federeación Rusa, los propios rusos configuraben el 80% de la población atopándo en delles rexones del país diferencies de calter relixosu y étnicu con dalgunes minories qu'apurrieron tensiones y rocees qu'en dellos llugares desendolcáron en conflictos bélicos.
El 31 de marzu de 1992 apruébase en Moscú una llei qu'establez de forma bien nidia cuales son les competencies de caún de los estremaos territorios que constituíen la cadarma de la República Federal Rusa. De 88 suxetos federales 86 roblaron el tratáu qu'axustaba les sos competencies na nación. Munches d'estes pequeñes repúbliques algamaron asina muncha autonomía política y económica altraviés de ventaxes fiscales y dellos privilexos.
Pero dos pequeñes repúbliques, Tartastán (bayurosa en petroleu) y Chechenia nun quixieron roblar esa llei promulgada dende Moscú. Asina, pa refugar un conflictu armáu, Boris Yeltsin tras dures negociaciones, pliégase a les exixencies de Mintimer Shaeymiev, presidente de Tartastán, dando-yos una autonomía que degún territoriu algamara. Los tártaros, pueblu musulmán conquistáu polos rusos en sieglu XVI pactaba la so rellación con Rusia. Quedaba na primavera de 1994 namás que Chechenia ensin cuadrar dientru l'estáu.
La independencia chechena
[editar | editar la fonte]Por embargu, mientres Moscú intentaba configurar les estructures básiques de la nueva nación que surdía, Dudayev, el cabezaleru del movimientu independentista chechenu facíase col sofitu total de la población chechena tras facese col control del gobiernu de la pequeña república caucásica y tras echar a los miembros del gobiernu interín que taba puestu pol presidente rusu. En payares de 1991, Yeltsin unvia tropes a Grozni pero son refugaes polos soldaos del propiu Dudayev.
Dudayev dirixe'l partíu pro-independencia "Congresu del Pueblu Chechenu". Coles sos fuercies y los miembros de la milicia caltién les sos posiciones independentistes. Sepártase entós la República Chechena y Ingusetia en dos, los segundos amestaránse a la Federación Rusa mientres que los primeros siguirán les idees de Dudayev.
N'agostu de 1994 entamen los primeros enfrentamientos bélicos. Delles milicies pro-ruses col sofitu de Rusia intenten derrocar a Dudayev pero nun son a elles pesie el bon armamentu que-yos apurrieren dende Moscú. En payares de 1994 Rusia invade Chechenia.
La guerra
[editar | editar la fonte]Yeltsin atalantaba que la guerra diba ser rápida consiguiendo la rendición de la república rebelde en poques selmanes. Por embargo Rusia somorguióse nuna llamuergona de la que nun foi a salir. Les condiciones xeográfiques de Chechenia, tol sur forma parte del cordal caucásico, la presencia de poblaciones civiles nos llugares de combate y dellos problemes táuticos impidieron la victoria rápida qu'esperaben los rusos.
Los chechenos formaben pequeños batallones móviles onde los nativos xugaben un papel bien importante pues conocíen el terrenu y a la xente de les aldees. Asina, cola guerra de guerrilles sometieron al exércitu rusu a delles y humildantes derrotes militares que bien ceo somorguióse nuna fondera desmoralización nun siendo la mayoría de los combatientes soldaos profesionales.
Rusia camudó en xineru de 1995 les formes de plantegase la guerra. Entamó a usar l'artillería con bombardeos que provocaron la muerte de milenta persones na población chechena. Nes primeres selmanes del bombardéu de Grozni muerren 25.000 civiles. L'exitu d'esta mena d'estratexa militar fizo que s'aplicara nel restu'l territoriu.
N'avientu de 1994 los rusos cerquen la ciudá de Grozni, durante munchos díes sométenla a un bombardéu sistemáticu que nun se recordaba dende la detruición de Dresde. Unos díes enantes d'Añu Nuevu de 1995 l'exércitu asalta la capital chechena sofriendo delles y famoses derrotes que-yos provoquen ente 1.000 y 2.000 soldaos rusos muertos, munchos d'ellos xovenes reclutes non profesionales. Asina, delles divisiones militares como la 131-Maikop desapaecen totalmente nos enfrentamientos na estación central de ferrocarril. Ente les baxes del exércitu rusu tamién tropezamos con xente como'l xeneral Viktor Vorobiov.
Pese a les primeres derrotes, la bayurosa cantidá de soldaos rusos y el bon equipamientu militar permitieron tomar la ciudá'l 6 de marzu de 1995. Neses selmanes de llucha calcúlase que morrieron ente 27.000 y 35.000 civiles chechenos munchos d'ellos neños.
Grozni quedara en manes de Moscú, la guerrá entós entamó a desendolcase nel sur de la pequeña república. Foi ellí onde s'agospiaron los rebeldes chechenos, no que ye'l cordal caucásicu. Como l'exércitu rusu avanzaba sobro les pequeñes aldees del sur afeutando de forma direuta a la población civil les lluches que se desendolcaben, los chechenos dexaron de lluchar nes ciudaes y pueblos. Asina, entamaron a facer secuestros masivos ente la población rusa, como por exemplu l'aición fecha nel hospital de Budyonnovsk con 1.200 rehenes, y a lluchar sólamente nes montañes refugando l'enfrentamientu nos nucleos urbanos.
Estes nueves táutiques de guerra impidieron que les tropes ruses fueren a controlar la totalidá del territoriu chechenu, amás, la táutica de los secuestros masivos causo una fondera medrana ente la sociedá civil rusa lo que fizo que los pegollos del poder políticu de Moscú entamaren a tremar. Yeltsin axoráu por nun ser quien a ganar una guerra escontra una pequeña república rebelde y axorizáu pola posibilidá de perder les eleiciones presidenciales de 1996 decidió entós finar cola guerra ofreciendo-yos un tratáu de paz a los chechenos qu'estos roblaron. Asina Chechenia convertíase cuasi nun estáu independiente onde Rusia nun podía intervenir.
En 1999 Rusia valtia esti alcuerdu de paz colo qu'entamará la Segunda guerra chechena.
Referencies
[editar | editar la fonte]Enllaces esternos
[editar | editar la fonte]
Wikimedia Commons acueye conteníu multimedia sobre Primer guerra chechena.
Datos: Q29269- Multimedia: First Chechen War