Premiu Nel Amaro de Teatru Profesional en llingua asturiana o gallego-asturianu

De Wikipedia
Saltar a navegación Saltar a la gueta

El Premiu "Nel Amaro" de teatru profesional en llingua asturiana o gallego-asturianu ye un gallardón qu'entama'l Gobiernu d'Asturies p'ayudar a consolidar, arriquecer y prestixar estes dos llingües nel ámbitu del arte dramáticu.

Al premiu pueden presentase obres de compañíes profesionales que yá s'estrenaren n'asturianu o gallego-asturianu, tanto orixinales como versiones o adaptaciones de títulos n'otres llingües.

---Festival Nel Amaro---

Un xuráu formáu por espertos en teatru y llingua asturiana va escoyer d'ente los proyeutos presentaos los cuatro finalistes, que van representar les sos obres nel Festival "Nel Amaro" de teatru profesional en llingua asturiana, entamáu cola ayuda del Conceyu d'Uviéu a lo llargo de los vienres del mes de payares nel Teatru Filarmónica.

Depués de les actuaciones del Festival, el xuráu va decidir cuála ye la compañía o'l grupu teatral ganador, que va recibir como gallardón una pieza artística, amás del compromisu del Gobiernu del Principáu d'Asturies de velar pola promoción y difusión del espectáculu nos medios de comunicación y nos eventos entamaos pol mesmu Gobiernu.