Polu celeste

De Wikipedia
Saltar a navegación Saltar a la gueta
Los polos celestes norte y sur y l'ecuador celeste.

Los polos celestes, norte y sur, son los dos puntos imaxinarios nos que la exa de rotación de la Tierra corta la esfera celeste, una esfera ideal, ensin radiu definíu, concéntrica col globu terrestre, na qu'aparentemente muévense los astros. Dexa representar les direiciones nes que s'atopen los oxetos celestes.[1][2]

Proyeición estereográfica de la esfera celeste colos elementos más importantes.

De nueche, les estrelles paecen xirar d'este a oeste. La trayeutoria que describe cada estrella ye circular, con centru n'unu de los polos celestes (norte o sur, dependiendo del hemisferiu au s'atope l'observador). Esti movimientu, aparente, débese al movimientu de rotación de la Tierra.

Los polos celestes son los polos del sistema de coordenaes ecuatoriales; esto ye, son los puntos que tienen declinaciones +90° y -90°, norte y sur, respeutivamente.

Movimientu aparente de la esfera celeste[editar | editar la fonte]

El movimientu de la esfera celeste ye aparente y ta determináu pol movimientu de rotación del nuesu planeta sobro la so propia exa. La rotación de la Tierra, en dirección oeste–este, produz el movimientu aparente de la esfera celeste, en sen este-oeste. Esti movimientu podemos notalu de día, pol desplazamientu del Sol nel cielu, y nes nueches, pol desplazamientu de les estrelles. Dambos fáense en sen este-oeste. La velocidá cola que xira la esfera celeste ye de 15°/hora, polo que cada 24 hores completa un xiru de 360°.[3]

Polu sur celeste
Polu sur celeste
Serie de tomes au pue acolumbrase la rotación de la exa terrestre con rellación al polu sur celeste. Vense nidiamente les Ñubes de Magallanes y la Cruz del Sur. Cerca del final del videu pue acolumbrase'l surdimientu de la Lluna qu'alluma la escena.

Efeutu de la precesión de los equinoccios[editar | editar la fonte]

Por efectu de la precesión de los equinocios, los polos celestes muévense con rellación a les estrelles, y, arriendes d'ello, la estrella polar (esto ye, la estrella qu'apaez más cercana al polu) de cada hemisferiu nun ye la mesma al traviés de los años, a diferencia de la Estrella del Norte. Anguaño, la estrella polar del hemisferiu norte ye l'asitiada nel «estremu de la cola» de la Osa Menor, llamada «Polaris» o α Ursae Minoris, que ta allonxada del polu menos d'un grau. Inda se-y va dir averando más y dende l'añu 2100 nun va tar d'él a más de 28'. A partir d'esi momentu'l polu tará alloñándose de Polaris, la que nun volverá ser la polar hasta unos 25 780 años dempués.

Escontra l'añu 1930, el polu celeste pasó xunto a una estrella de magnitú 11, que recibió per unos años el nome de «Polarísima». Anguaño'l polu allónxase d'ella a razón de 20” per añu.

El periodu del movimientu de precesión ye de 25 780 años y mengua secularmente. Per otra parte, los polos de la eclíptica, alredor de los que muévense los polos celestes, nun son invariables, pos el planu de la eclíptica bazcuya amodo por cuenta de les perturbaciones que sufre la Tierra per parte d'otros planetes.

Observación del cielu nos polos[editar | editar la fonte]

Por cuenta de que los polos xeográficos tán asitiaos xusto debaxo de los polos celestes, la zona de la esfera celeste visible ye cortada pela llinia del ecuador celeste, faciendo que pueda vese namái la metá d'esti. Poro, puede vese tol sector de la esfera correspondiente al hemisferiu nel que ta'l polu hasta l'ecuador, ente que l'hemisferiu opuestu ye dafechu invisible. Amás, asina como nenguna estrella que s'atopa nel hemisferiu opuestu ye visible en nengún momentu del añu, nel hemisferiu correspondiente, toles estrelles son circumpolares; esto ye, nun se despinten en nengún momentu de la nueche nin del añu. Esto namái asocede al tar asitiáu exautamente sobro'l polu, yá que si tase asitiáu en distintu llugar, por mui cerca del polu que se tea, esto daría llugar a que, namái per un día y por unos segundos, dalguna estrella del hemisferiu opuestu sía visible, ente qu'al empar, dalguna del hemisferiu correspondiente suma baxu l'horizonte.

Ver tamién[editar | editar la fonte]

Referencies[editar | editar la fonte]

  1. Jim Kaler Professor Emeritus of Astronomy, University of Illinois. «Measuring the sky. A quick guide to the Celestial Sphere» (inglés). Consultáu'l 10 de marzu de 2014.
  2. Danilo González Díaz. «Movimientos de la Tierra. Cursos de Extensión en Ciencias Espaciales Instituto de Física Facultad de Ciencias Exactas y Naturales Universidad de Antioquia» (español). Archiváu dende l'orixinal, el 10 de marzu de 2014. Consultáu'l 10 de marzu de 2014.
  3. (2013) Instituto Nacional de Astrofísica Óptica y Electrónica: Elementos de Astronomía Observacional - La Esfera Celeste.