PlayStation 3

De Wikipedia
Ficha de softwarePlayStation 3
Desendolcador(es) Sony Interactive Entertainment
Sistema operativu Software de sistema de PlayStation 3 (es) Traducir
Tipu modelu y consola de videoxuegos
Parte de videoconsoles de séptima xeneración
Más información
Twitter PlayStation_jp
Facebook PlayStationJapan
Sitiu web Web oficial
Cambiar los datos en Wikidata

PlayStation 3 (conocida tamién como PS3) ye la tercer videoconsola de sobremesa aniciada por sony Computer Entertainment y la socesora de la PlayStation 2 como parte de la marca PlayStation. La PlayStation 3 compite anguaño escontra la Xbox 360 de Microsoft y la Wii de Nintendo como parte de les videoconsoles de séptima xeneración.

Una carauterística bultable qu'estrema a la PlayStation 3 de les so predecesores ye'l so serviciu amecíu de videoxuegos en llinia, la PlayStation Network, lo que contrasta cola anterior política de Sony d'esfotar nos desenrolladores de xuegos pa xugar en llinia. Otres carauterístiques importantes de la consola son les sos capacidaes sólides de multimedia, la conectividá cola PlayStation Portable y el so cimeru formatu de discu ópticu d'alta definición, Blu-ray Disc, como'l so cimeru preséu d'almacenamientu. La PS3 tamién da soporte al Blu-ray perfil 2.0, gracies a ello puédese interactuar de manera online con conteníos extras de películes y xuegos.

La PlayStatioin 3 foi asoleyada el 11 de payares de 2006 en Xapón, el 17 de payares de 2006 n'América del Norte, y el 23 de marzu de 2007 n'Europa y Australia. Dos variantes taben disponibles nel momentu del so llanzamientu: un modelu básicu con 20 GM de discu duru SATA 2,5" y un modelu profesional con discu duru de 60 GB y delles carauterístiques adicionales como doble númberu de puertos USB y retrocompatibilidá con xuegos de la so antecesora PlayStation 2. El modelu de 20 GB nun foi comercializáu n'Europa y Australia. Dende entós, a tolos modelos fixéron-yos delles revisiones nel so hardware p'amenorgar el coste d'aniciu y el preciu venta.

Historia[editar | editar la fonte]

Sony asoleyó oficialmente la PlayStation 3 pal públicu en 16 de mayu de 2005, durante la conferencia E3 de 2005. Nun llevaron una versión funcional del sistema per aciu de curties d'ellectricidá y problemes de hardware, nin nel Tokyo Game Show de setiembre de 2005, anque se fixeron demostraciones (como del xuegu Metal Gear Solid 4: Guns of the Patriots) amosando en dambos eventos el kit de desendolcu de software. Tamién s'amosaron secuencias de videu afitadas nes especificaciones albidraes. Sicasí, posteriormente espeyóse que les demostraciones de xuegos nun taben funcionando en tiempu real sobre la máquina y utilizaron estremaos trucos de post-producción.

Planeóse nun entamu que tuviera dos puertos HDMI, trés puertos Ethernet y seyes puertos USB, anque na E3 esto foi amenorgáu a un puertu HDMI, un puertu Ethernet y cuatro USB pa encurtiar costes de fabricación.

Tamién se dio anuncia de que habría dos configuraciones de la consola, de 60 GB y 20 GB, costando respeutivamente 599€/599$ y 499€/499$. Díxose ´que'l modelu de 60 GB sería l'únicu de los dos que tendría HDMI, WiFi y un acabáu en cromu na parte del llector Blu-ray. La fecha de llanzamientu foi albidrada pal 11 de payares de 2006 en Xapón y pal 17 de payares de 2006 n'América del Norte y Europa.

El 6 de setiembre de 2006 Sony anunció que'l llanzamientu de PlayStation 3 n'Europa y Oceanía sería atrasiáu hasta marzu de 2007 per aciu de la falta de diodos pal llector de Blu-ray.

El 22 de setiembre de 2006, nel Tokyo Game Show, Sony anunció qu'incluiría un puertu HDMI nel sistema 20 GB pero non el WiFi y l'acabáu en cromu. Tamién dixo que'l preciu de llanzamientu de los modelos de 20 GB xaponeses sería amenorgáu más del 20%. Durante l'actu, Sony presentó 27 videoxuegos pa PS3 aviaos pa funcionar na versión final del hardware.

Ken Kutaragi, ex-responsable de la estaya de videoxuegos de Sony, camentáu'l pá de la PlayStation, albidró-y una vida de diez años a la PlayStation 3: "Queremos que los nuesos productos tengan un ciclo de vida de diez años, ye esa la razón de la so gran potencia, dalgo que ya amosamos con PlayStation. Poro, PlayStation 3 espérase qu'avague diez años nel mercáu, si esti respuende bien". Ken Kuratagi dio esta rempuesta cuando foi entrugáu pola PS4: "Nun pueo espicular sobre cuándo podríamos sacar una nueva consola dempués de PlayStation 3. Pero'l mio mensaxe ye que cuando formas parte de la familia de productos PlayStation, tórnaste nun miembru de la gran familia Sony".

Nel Tokyo Game Show de 2006 diose anuncia por primer vegada que'l modelu de 20 GB de PlayStation 3 cuntaría col HDMI necesariu pa usar 1080p y con una merma de preciu en Xapón averada a los 10.000 yenes, qu'equivalen a unos 80 euros, mientres que n'Estaos Xuníos y Europa nun se fairía cambéu nel preciu inicial.

Llanzamientu[editar | editar la fonte]

La PlayStation 3 (entós llamada PLAYSTATION 3) salió al mercáu el 11 de payares de 2006 en Xapón. Según Media Create vendiéronse 81.639 sistemes de PS3 en 24 hores durante la so introducción en Xapón.

Poco dempués del so llanzamientu en Xapón, la PS3 foi puesta nel mercáu en Norteamérica el 17 de payares de 2006. Presentáronse dalgunos informes de violencia en tornu a la lliberación de la PS3, dalgunes persones usaron armes pa la obtención d'una consola.

El 24 de xineru de 2007 Sony dio anuncia de que la PlayStation 3 saldría a la venta'l 23 de marzu de 2007 n'Europa, Australia, Oriente Mediu, Sudamérica, África y Nueva Zelanda. El sistema vendió cerca de 600.000 unidaes nos dos primeros díes. El 7 de marzu de 2007 la PlayStation 3 de 60 GB púnxose a la venta en Singapur con un preciu de 799 dólares. La consola foi llanzada en Corea del Sur el 16 de xunu de 2007 nuna sola versión equipada con discu duru de 80 GB y IPTV. Más sero las ventas fóronse ralentizando, por aciu, en parte, del so eleváu preciu, motiváu ente otres coses pola inclusión del llector Blu-ray.

Modelu orixinal[editar | editar la fonte]

Hai cinco modelos orixinales de hardware de la PlayStation 3 que son mentaos davezu pol tamañu de la so unidá de discu duru: "20", "40", "60", "80", "160".

El modelu de 20 GB namás foi distibuyío n'Estaos Xuníos, onde ya se dexó d'aniciar per aciu de les sos baxes ventes, po lo que nun llegó a Europa. El modelu inclúi un discu duru SATA 2,5 " de 20 GB y amás, un conector HDMI 1.3 qu'enantes se podía atopar solo nel modelu estándar.

Amás de toles carauterístiques del modelu de 20 GB, el modelu de 60 GB tien un Wi-Fi IEEE 802.11 b/g internu, dellos llectores de tarxetas de memoria (SD/MultiMediaCard, CompactFlash Type I/Type II, Microdrive, Memory Stick/PRO/Duo), y un acabáu en cromu. En términos de hardware, el modelu de 80 GB asoleyáu en Corea del Sur ye idénticu al modelu de 60 GB lliberáu nes fasteres PAL, salvo la diferencia de tamañu de discu duru. Igual que'l de Corea del Sur y los modelos europeos, en Norteamérica'l modelu de 80 GB tampoco tien el CPU "Emotion Engine" utilizáu na PlayStation 2. Sicasí, tovía caltién el "sintetizador gráficu" GPU. Por aciu de la retirada del "Emotion Engine", el nivel de compatibilidá amenorgó. Los modelos de 40 GB, 80 GB y 160 GB, namás disponen de dos puertos USB enverde los cuatro puertos disponibles n'otros modelos, tamién prescinden del llector de tarxetes flash, soporte SACD o cualesquier compatibilidá colos xuegos de PlayStation 2.

Slim[editar | editar la fonte]

Por mor d'espiculaciones o rumores d'un modelu Slim, Sony dio anuncia oficialmente de la PlayStation 3 Slim el 18 d'agostu de 2009 na conferencia de prensa de la Sony Gamescom. La PS3 Slim ye un 33% más pequeña, un 36% más llixera (ye decir que les sos dimensiones amenorgaron a 290 mm d'alty y anchu, y 65 mm de grosor, y el so peso amenorgó a 3,2 kg) y el so consumu d'enerxía ye menor en comparanza colos modelos anteriores. Amás dispón d'un discu duru de 120 GB (más sero saldría otru modelu con 320 GB) y presenta les mismes carauterístiques y funciones de los modelos anteriores PS3, ye decir: llector de Blue-Ray, dos puertos USB, Wi-Fi, Bluetooth y HDMI. El so preciu nel mercáu européu foi de 299 euros y salió a la venta'l 1 de setiembre de 2009. Col llanzamientu de la PlayStation 3 Slim tamién se dio anuncia per aciu d'un comunicáu de prensa na páxina SCEI del cambiu de nome de PLAYSTATION 3 a PlayStation 3 y un nuevu logu "PS3".

Comparanza de los equipos[editar | editar la fonte]

Tolos paquetes a la venta inclúin un control Sixaxis o Dualshock 3 y un pequeñu cable USB (pa cargar la batería del mandu Dualshock).

Hardware y accesorios[editar | editar la fonte]

Hardware[editar | editar la fonte]

La PlayStation 3 tien una forma convexa del so llau izquierdu cuando ta na posición vertical y tien un guapu acabáu negru col logotipu de PlayStation 3 nel llau izquierdu. El diseñador de la carcasa Teivu Goto dixo que la fonte d'inspiración del logotipu foi'l logu de la película Spider-Man, producida por Sony Pictures, lo cual Ken Kutaragi s'enfotó n'emplegar dicha fonte de lletra nel logu.

La PlayStation 3 tien una ranura slot-in onde s'inxerten los discos, nesta parte ye onde s'alluga'l llector ópticu Blu-Ray cuya velocidá de carga ye 2x, la unidá ye compabible con estremaos formatos de discos: DVD, CD, SACD, Blu-ray, ente otros soportes ópticos. Tolos modelos de la PS3 tienen discos duros SATA 2,5.

La consola usa un microprocesador central diseñáu por IBM y Toshiba col nome de Cell. Ta conformao por siete nucleos conocíos como "Synergistic Processing Elements" (davezu abreviáu SPE) y cuerre a una velocidá de 3,2 GHz con 256 GFLOPS de poder. El procesador gráficu foi diseñao por Nvidia col nome de RSX (basáu na GeForce 7800 GTX) del que pueden salir resoluciones de 480i, 576i SD hasta 1080p HD, amás dispón de 256 MB de memoria XDR y 256 MB de memoria videu GDDR3 pal RSX.

El sistema tien Bluetooth 2.0, Wi-Fi, Ethernet, USB 2.0 y HDMI.

Accesorios[editar | editar la fonte]

La consola tien dellos accesorios como'l controlador Sixaxis, Dualshock 3 y Move, tecláu, auriculares, cable HDMI, sintonizador/grabador de TDT PlayTV y la cámara web PlayStation Eye, compatibilidá con PlayStation Move (control de movimientu y control de navegación). Los accesorios de PlayStation 2 son compatibles con PlayStation 3 pola mor de la conservación de la so arquiteutura. El mandu tamién tien un sensor de movimientu.


Referencies[editar | editar la fonte]

Enllaces esternos[editar | editar la fonte]