Plan 9 del espaciu esterior

De Uiquipedia
Saltar a: navegación, buscar

Plan 9 del espaciu esterior (Plan 9 from outer space) ye una película de ciencia ficción y horror considerada una de les peores películes enxamás filmadas. Dio sonadía al so director, Edward D. Wood Jr., como'l peor director de cine. Anguaño considérase una película de cultu polos sos innumberables erros nos efectos especiales, guión y personaxes. Ente los actores resalta la participación de Béla Lugosi.

Edward D. Wood Jr. tres la muerte del so amigu Béla Lugosi escribió'l guión d'esta película en menos de 2 selmanes afaciéndolo pa poder incluyir les últimes escenes rodaes por Lugosi (5 minutos de metraje).

La película ye un burdo intentu de xustificar les escenes de Lugosi nuna trama ensin sentíu. Los estraterrestres faen alitar a los muertos, pero Lugosi alita como daqué paecíu a un vampiru, lleva capa. Per otru llau esti vampiru, en delles escenes tapa la cara cola capa, yá que nun ye Lugosi, sinón un doble que lu reemplaza, yá que Bela finó mientres la filmación.

Argumentu[editar | editar la fonte]

Unos estraterrestres lleguen al planeta Tierra. Coles sos armes eléctriques son capaces de devolver a la vida a los muertos pa, d'esta forma, xenerar caos y miéu, asina pasen desapercibíos mientres los humanos centren la so atención nos muertos vivientes.

Erros de la película[editar | editar la fonte]

Magar la so ínfima calidá cinematográfica, y al marxe del enorme desconocimientu que de la puesta n'escena tenía'l so artífiz, son reseñables dellos erros:

En delles escenes d'ovnis queda claro que los ovnis muévense con filos, llegándose a ver dacuando los filos prietos que suxeten les naves. El llume nótase dafechu artificial, con solombres bien marcaes y poco naturales. Los decoraos son dafechu amateurs, les puertes de les naves espaciales y aviones nun son puertes, son cortines.

Cuando l'azafata de vuelu entra a la cabina del pilotu y diz-y que llame per radiu pa preguntar pola so muyer, la cortina quédase-y engabitada nel costazu quedando semiabierta, nel viniente cambéu de cámara, la cortina yá ta cerrada.

Na mesma escena cuando'l copilotu ta intentando quedar cola azafata y ésta refúgalu, ponse a escribir nuna llibreta mirando abaxo, la cámara camuda y yá nun ta mirando abaxo, ta mirando a l'azafata.

Munches de les escenes el personaxe que fai Lugosi nun tán interpretaes por él sinón por un doble. Como'l director nun tenía abondes escenes de Lugosi pa completar la película faía que'l doble tapara la cara cola capa. D'esta forma'l personaxe podia interactuar con otros personaxes anque Lugosi yá tuviera muertu na realidá. Por casu, na escena en que la Sra. Trent ta na cama y entra'l muertu que se supon ye Lugosi, realmente nun ye él.