Saltar al conteníu

Pilar Claudín

De Wikipedia
Pilar Claudín
Vida
Nacimientu 1923[1]
Muerte Ciudá de Méxicu, 2002[1] (78/79 años)
Miembru de Mocedaes Socialistes Unificaes
Creencies
Partíu políticu Unión de Muchachas (es) Traducir [2]
Cambiar los datos en Wikidata

Pilar Claudín Pontes (1923 – 2002, Ciudá de Méxicu) foi una comunista española antifranquista.

Biografía

[editar | editar la fonte]

Fía d'un topógrafu, el so hermanu foi'l dirixente comunista Fernando Claudín. La familia treslladóse a Madrid nos empiezos de la década de los años 1930.[3] Ella, que tenía trece años cuando empezó la guerra civil española, foi treslladada a València y dempués a Barcelona. Ellí afilióse a la Xunión de Moces y a les Mocedaes Socialistes Unificaes (JSU, poles sos sigles en castellanu), collaborando na retaguardia. Al acabar la guerra fuxó a Francia onde foi retenida nun campu de concentración col so padre, y en siendo separaos, foi devuelta a España. El restu de la familia pudo exiliase en Méxicu. Ella permaneció n'España. Otros hermanos de so fueron encarcelaos. Empezó a repartir la revista del Partíu Comunista d'España (PCE) Mundo Obrero.[4] En payares de 1946, con dieciséis años, foi detenida na cai de Francisco Silvela, en Madrid, nuna imprenta clandestina onde s'editaba dicha revista. Foi detenida xunto a otros diecisiete collacios. En pasando polos cuartones de la Dirección Xeneral de Seguridá (DGS) foi treslladada a la cárcel de muyeres de Ventas.[5] El so espediente sumarísimu tien el númberu 138.610.

Foi treslladada a la prisión de Segovia. Nella foi una de les preses de la fuelga de fame que se fixo en 1949. Foi la primer presa a la que preguntó una periodista chilena, sosprendida pola so edá. La periodista taba faciendo una visita protocolaria. Al intervenir dempués d'ella Mercedes Gómez Otero y ser castigada, empecipióse un motín del que Claudín foi considerada una de les cabezaleres. Nel motín y la fuelga tamién tuvieron María Salvo, Antonia García Díaz y Josefina Amalia Villa ente otres.[6] Compartió celda con María Salvo y Juana Doña que la recuerden nes sos memories.[7][8]

El 21 de mayu de 1953 concediéron-y la llibertá condicional. Casó con Antonio Pérez García, qu'acababa tamién de salir de la cárcel. Xuntos treslladáronse a Rumanía, Checoslovaquia y darréu a la Xunión Soviética, tamién a Cuba, onde vivieron la invasión de Badea de Cochinos. El so destín final foi Méxicu, onde'l so maríu, conocíu como Mario Zapata, realizó trabayos pal periódicu El Día y Canal 11[4] y foi collaborador de la revista del Partíu Comunista Mexicanu (PCM). Él finó en 1980.[4] Ella, tres la so muerte, foi la editora d'una compilación de los sos escritos, Burgos 1940-53. Cárcel de la dictadura franquista.[9]

Claudín morrió en Ciudá de Méxicu en xunetu de 2002. Les sos cenices fueron treslladaes a España.[10]

Reconocencies

[editar | editar la fonte]
  • Mariángeles Comesaña, investigadora mexicana, escribió un llibru sobro la vida de Claudín que permanez inéditu.[10]
  • En 2002 foi homenaxada xunto a otros ex-presos de la dictadura franquista nel Teatru Liceu de Barcelona.[4]
  • Ye una de les nueve muyeres biografiaes pol historiador Carlos Fernández Rodríguez nel so llibru La lucha es tu vida. Retrato de nueve mujeres combatientes republicanas.[11]

Referencies

[editar | editar la fonte]
  1. ↑ 1,0 1,1 URL de la referencia: https://www.jornada.com.mx/2002/07/22/02an1cul.php?printver=0.
  2. ↑ 2,0 2,1 URL de la referencia: https://www.jornada.com.mx/2002/04/22/048n1con.php?printver=1.
  3. ↑ «Claudín Pontes, Fernando» (castellanu). Fundación Pablo Iglesias (2022-11-16). Consultáu'l 2025-01-20.
  4. ↑ 4,0 4,1 4,2 4,3 «La Jornada Virtu@l». www.jornada.com.mx (22-04-2002). Consultáu'l 2025-01-14.
  5. ↑ «La Jornada Virtu@l». www.jornada.com.mx (23-07-2002). Consultáu'l 2025-01-14.
  6. ↑ Sombría, Santiago Vega (2011). «Lucha tras las rejas franquistas. La prisión central de mujeres de Segovia» (en castellanu). Studia Historica. Historia Contemporánea 29:  páxs. 281–314. ISSN 2444-7080. https://revistas.usal.es/uno/index.php/0213-2087/article/view/8612. Consultáu'l 2025-01-14. 
  7. ↑ (2004) El daño y la memoria: las prisiones de Maria Salvo.
  8. ↑ (2013-10-04) Desde la noche y la niebla: (Mujeres en las cárceles franquistas) (en castellanu).
  9. ↑ (1983) Burgos, 1940-53.
  10. ↑ 10,0 10,1 «La Jornada Virtu@l». www.jornada.com.mx (22-07-2002). Consultáu'l 2025-01-14.
  11. ↑ «La lucha es tu vida» (castellanu). Carlosfr.com - Web del historiador y escritor Carlos Fernandez. Consultáu'l 2025-01-14.

Enllaces esternos

[editar | editar la fonte]
Sacáu de «https://ast.wikipedia.org/w/index.php?title=Pilar_Claudín&oldid=4356512»