Partíu Carlista

De Wikipedia
Saltar a: navegación, buscar
Partíu Carlista
Partíu políticu Partíu Carlista
Añu fundación 1833 - 1971 - 1977 (llegalizáu)
Ideoloxía Socialismu autoxestionariu
Ideoloxía respeuto al Estáu español Confederalista
Ámbitu España
Secretariu Xeneral Federal J. M. Aragón Samanes
Web del partíu www.partidocarlista.com

El Partíu Carlista (PC) ye un partíu políticu, que caltien la continuidá hestórica de la organización política del llexitimismu español dende 1833. Nos nomaos Congresos del Pueblu Carlista, desendolcaos n'Arbonne (Iparralde), ente los años 1970 y 1972, el carlismu consolidó un fondu procesu d'anovación ideolóxica, política ya organizativa. Concretamente nel congresu de 1971 foi abandonada la denominación de "Comunión Tradicionalista" (oficializada nos años 1930) y recuperada la orixinal de la organización: Partíu Carlista.

Dende entós tien una llinia política d'esquierda tresformadora, socialista autoxestionaria y con-federalista. Entama añalmente los actos de Montejurra. El Partíu Carlista mantién una cadarma federal cola posibilidá de que se formen partíos carlistes soberanos nes nacionalidaes, asociaos al Partíu Carlista a nivel estatal, asina existe'l Partíu Carlista de Euskal Herria, Partíu Carlista de Cataluña, etc. La mocedá de los distintos partíos y agrupaciones carlistes xúntase nes denomaes Xuventúes Carlistes.

El secretariu xeneral del partíu ye Jesús María Aragón dende'l congresu federal de 2009. La so publicación oficial ye la revista El Federal (dende 1999, enantes yera'l boletín IM).

Hestoria[editar | editar la fonte]

Demientres el sieglu XIX el partíu optó en múltiples vegaes pola confrontación armada col Estáu lliberal. Dafechu, amás d'estremaes revueltes de curtiu recorríu, hebo tres guerres civiles ente carlistes y lliberales (la 1ª Guerra Carlista, 1833-1840; la 2ª Guerra Carlista, 1846-1849; la 3ª Guerra Carlista, 1872-1876). La so principal fuercia dende siempre tuvo n'Euskal Herria y nos Países Catalanes.

Na dómina de la Primer Restauración Borbónica el partíu participaría pacíficamente nel marcu llegal, abriendo periódicos, organizando círculos y comités llocales, y presentándose a los procesos electorales. Na nomada Acta de Loredan el tradicionalismu corporativu sería establecíu como la llínia ideolóxica del partíu. Una de les sos principales figures yera'l propagandista Juan Vázquez de Mella.

Nos años 1930 se fusiona col Partíu Integrista y con otros sectores conservadores na "Comunión Tradicionalista".

Nel añu 1937 tolos sos bienes, llocales y periódicos foron espropiados pol franquismu col Decretu d'Unificación.

Ente los años 1936 y 1975 el so titular dinásticu foi Xavier de Borbón-Parma.

De magar 1954 vien cellebrando de manera añal unos actos en Montejurra (Navarra).

De magar 1956 entama una evolución haza posiciones progresistes, empobinada polos sos bases universitaries, la Agrupación d'Estudiantes Tradicionalistes (AET), y proletaries, el Movimientu Obreru Tradicionalista (MOT).

Enlliaces esternos[editar | editar la fonte]