Pancraciu

Reproducción en bronce d'una figura romana en mármol del sieglu III aC que representa’l pancraciu griegu.

El pancraciu (del griegu παγκράτιον, pankration, pan: too y kratos: fuercia, “toles fuercies”; llatín Pancratium) ye una forma violenta de llucha qu'apaeció l' 648 aC na 33 olimpiada, como una combinación de llucha y boxéu, convertiéndose nún de los deportes más populares nos Xuegos de l'antigua Grecia. Permitíase de too: golpes, mordiscos, pataes, estrangulamientos, meter los deos nos güeyos; esto ye, cualesquier forma de mancar al adversariu. El combate terminaba cuando ún de los lluchadores abandonaba; de cutiu entrambos, ganador y perdedor, acababen con una oreya tayada, dalgún miembru toyíu o, como poco, col cuerpu bien frayáu. A vegaes la llucha finaba cola muerte d'ún de los combatientes.

Taba consideráu ún de los exercicios más duros y abegosos pola violencia que riquía; poro, nun se prauticaba muncho nel ximnasiu. Considerábase perxudicial pa la salú y a los rapazos dexábenlos prauticalu camudáu pa que fuera menos duru.

N’Esparta’l pankration foi torgáu, pasando’l nome a toa llucha non controlada nin regulada.

El pancraciu introdúxose nes olimpiaes dende la númberu 33, pero yá esistía enantes magar que nun algamara desendolcu abondu. El so aniciu taría na llucha ente dos persones propia de les tribus ensin civilizar, y primero apaeció n’Esparta. La lleenda convierte nel so inventor a Teséu na so llucha contra’l Minotauru. El mesmu Hércules foi supuestamente campeón de pancraciu.

Tres la so introducción nes olimpiaes el pancraciu estendióse a otros xuegos per toa Grecia. Na época del Imperiu Romanu llegó a Italia. Pa rapazos introdúxose na edición 145 de les olimpiaes, y el primer ganador foi Faédimus de Troas. Apaecen tamién ganadores de los Xuegos Píticos (Olaides de Tebas el primeru conocíu, olimpiada 108) y de los Xuegos Ístmicos (onde nun apaez el pancraciu pa rapazos hasta’l tiempu de Domicianu masque ensin dulda yá se prauticaba enantes).

Filóstratu consideraba’l pancraciu como’l más guapu de tolos xuegos atléticos, yá que prestaba ver xuntos el boxéu y la llucha nuna mesma exhibición.

En Roma’l pankration apeas per primer vegada nunos xuegos organizaos por Calígula y fíxose mui popular. Inda yera un espectáculu na dómina de Xustinianu I.

A los que prauticaben esti deporte llamábenlos pancratistae (pancratistes)