Palaciu de los Menéndez Pola

Palaciu de los Menéndez Pola
	Bien d'Interés Cultural
	palaciu y monumentu
Llocalización
País	España
Autonomía	Principáu d'Asturies
Provincia	provincia d'Asturies
Conceyu	Gozón
Coordenaes	43°37′00″N 5°47′19″W / 43.61656°N 5.78856°O
	Palaciu de los Menéndez Pola Palaciu de los Menéndez Pola (Asturies)
Arquiteutura
Estilu	barrocu
Patrimoniu
BIC	RI-51-0007076

El palaciu de la familia Pola asítiase na contorna de la ilesia parroquial de Santa María de Lluanco y ta declaráu como Bien d'Interés Cultural con categoría de Monumentu'l 2 de mayu de 1991.

Construyíu pelos sieglos XVII y XVIII, constitúi la meyor amuesa d'arquiteutura nobiliaria d'esta villa y, según Germán Ramallo Asensio ^[2] ún de los más fermosos exemplos de l'arquiteutura civil asturiana «pola perfeuta interrellación qu'esiste ente adautación al tipu tradicional, aceutación de normes populares y, por últimu, supeditación al estilu barrocu». Pela so parte, Juan C. Soto Boullosa ^[3], añade a estos aspeutos «el so valir testimonial, espresivu d'un tipu de vivienda que recueye na so proyeición arquiteutónica la necesidá de distinción específica d'una nobleza consciente de la so importancia como clas social. Nesti sen, la so rellación cola ilesia inmediata ye significativa, como tamién lo ye l'atopase coles pequeñes construcciones que s'allinien al otru llau de la cai».

La edificación estructúrase en planta rectangular en tornu a un pequeñu y cuadráu patiu central –arrodiáu de corredores sosteníos por columnes toscanes de piedra– y dos torres que flanqueén la fachada principal. Cuenta con dos pisos nel cuerpu central y trés nes torres.

Les fachaes interiores son austeres, sacante la oeste, que mira al xardín y s'abre en galería con cubierta de madera y columnes toscanes sobre pilares.

La fachada principal, pola contra, recibe un ricu tratamientu decorativu. Orientada a la cai, fusiona soluciones populares, como los salientes aleros, el corredor de la torre izquierda y los guardillones sobre la cubierta del cuerpu central, con elementos barrocos como la distinguida puerta d'accesu, con dintel sobre pilastres de fuste acanaláu, y los trés balcones de saliente voladizu asitiaos sobre ella, a los que flanqueén dos escudos d'armes: el de la derecha coles de la familia Menéndez de la Pola, y el de la izquierda coles de los Pola, Valdés y Fernández Quevedo de Heres, ente otres.

Referencies

Galería

Escudu de la familia Pola, Valdés y Fernández Quevedo.
Escudu de la familia Pola.
Puerta principal del palaciu.
Vista llateral del palaciu, dende'l xardín.

[d3fc6247b3d6fa1e4294aedd838caf26b60db9cf-1] «base de datos de monumentos de Wiki Loves Monuments» (13 payares 2017).

[2] L'arquiteutura civil asturiana, Salinas (1978)

[3] «Concejo de Gozón», Liño 1, rev. Departamentu d'Arte de la Facultá de Xeografía y Historia, Universidá d'Uviéu

[1]

[2]

[3]