Palaciu de Miranda

Coordenaes: 43°25′N 6°49′W / 43.41°N 6.81°O / 43.41; -6.81
De Wikipedia
Palaciu de Miranda
Bien d'Interés Cultural
palaciu y monumentu
Llocalización
País España
Autonomía Principáu d'Asturies
Provincia provincia d'Asturies
Conceyu Bual
Coordenaes 43°25′N 6°49′W / 43.41°N 6.81°O / 43.41; -6.81
Palaciu de Miranda alcuéntrase n'Asturies
Palaciu de Miranda
Palaciu de Miranda
Palaciu de Miranda (Asturies)
Patrimoniu
BIC RI-51-0004656[1]
Cambiar los datos en Wikidata

El Palaciu de Miranda ta asitiáu na llocalidá asturiana de Prelo, nel conceyu de Bual. La so construcción entamó, probablemente, nel sieglu XV, cuando foi construyida la torre.

El palaciu de Miranda ye un palaciu rural que se desarrolló a partir d'un nucleu orixinal que taba formáu pola so torre cuadrada, a la que se-y añadieron, col correr del tiempu, un cuerpu nes cares norte y oeste y otru na cara este. Dende esti últimu hai un corredor que comunica la construcción civil col coru de la ermita del conxuntu,.

La torre, que nun conserva de los sos vanos orixinales namái que la puerta d'entrada, tien trés plantes y desván, y perriba de too un teyáu a cuatro agües coronáu por un capitel que quiciás foi n'orixe una llinterna, anguaño cegada. La puerta d'entrada, con arcu de mediu puntu con doveles, ta na primer planta. El restu del palaciu tien dos plantes, y éntrase nelli tamién na primer planta, pela cara norte, aprovechando'l desnivel del tarrén. Pela cara sur hai otra entrada: una escalera de piedra lleva al visitante a un corredor sofitáu en columnes toscanes de granitu.

La organización espacial orixinal entá se conserva nel pisu d'abaxu, que ye au taba la corte, demientres que los pisos superiores foron tresformaos enforma una y bones el palaciu, dende hai dellos años, foi convertíu nun establecimientu hosteleru.

Tocántenes a los motivos decorativos del conxuntu, la fachada norte tien l'aleru dividíu en dos por un escudu d'armas, fecho en granitu y rematáu con un teyáu a dos agües. Nelli pue lleese la lleenda De los González de Prelo y Castrillón, estas armas y blasón son. Embaxu l'aleru de la torre, de madera, hai della decoración pictórica; y hai tamién una saetera avenerada nel pasadizu que comunica palaciu y capiella. Esta, que zarra l'antoxana del conxuntu, foi rematada en 1776 y ye de planta rectangular, cola portada nún de los sos llaos mayores; la lluz éntra-y per una ventana y cuatro saeteres, y remata la so fachada norte con una espadaña d'un güeyu. Dientro d'ella hai un retablu y delles escultures, que pueden fechase probablemente nel sieglu XVIII.

Bibliografía[editar | editar la fonte]

  • Cobo Arias, Florencio, Cores Rambaud, Miguel, Zarracina Valcarce, Matilde, Guía básica de monumentos asturianos. Uviéu, Serviciu de Publicaciones del Principáu d'Asturies, 1990.

Referencies[editar | editar la fonte]

Enllaces esternos[editar | editar la fonte]