Organización territorial de Rusia

De Wikipedia
Saltar a navegación Saltar a la gueta

La Federación Rusa incorpora dellos tipos y niveles de subdivisiones territoriales.

Suxetos federales[editar | editar la fonte]

Artículu principal: Suxetos federales de Rusia
Suxetos federales de la Federación Rusa.

De magar el 18 de marzu de 2014 Rusia ye una federación compuesta por ochenta y cinco suxetos (rusu: субъе́кт(ы); treslliteración: subyekt(y)) federales, que son los miembros constituyentes de la Federación Rusa[1]. Dos d'estos suxetos, sicasí, la República de Crimea y la ciudá federal de Sebastopol, son reconocíos internacionalmente como parte d' Ucraína. Toos estos suxetos gocien de los mesmos derechos federales, nel sentíu en que tienen la mesma representación (dos delegaos cada unu) nel Conseyu de la Federación (la cámara alta del Parllamentu rusu). Sicasí, difieren nel grau d'autonomía qu'esfruten.

Hai seis tipos de suxetos federales: 22 repúbliques, 9 krais, 46 óblasts, 3 ciudaes federales, un óblast autónomu y 4 ókrugs autónomos. Los ókrugs autónomos son los únicos que tienen un estatus peculiar: magar que son suxetos federales, al tiempu son consideraos, alministrativamente, como subdivisiones alministratives d'otros oxetos federales (sacante l'ókrug autónomu de Chukotka).

L'anexión de Crimea en 2014[editar | editar la fonte]

Como parte de l'anexión de Crimea y el posterior establecimientu de la República de Crimea, una entidá independiente reconocida namái por Rusia, el 18 de marzu de 2014 firmose un tratáu ente Rusia y la República de Crimea, pola qu'esta y la ciudá de Sebastopol convertíense en suxetos federales de la Federación Rusa[2], colos estatus respectivos de república y ciudá federal. Nin les instituciones internacionales[3] nin la mayoría de los países reconocen esa integración de Crimea na Federación Rusa.

División alministrativa de los suxetos federales[editar | editar la fonte]

Primero de la promulgación de la constitución de 1993 la estructuración alministrativa del territoriu rusu regulábala un decretu del Presidium del Soviet Supremu de la Xunión de Repúbliques Socialistes Soviétiques de 17 d'agostu de 1982. La constitución de 1993, por embargu, nun consideró la regulación de las subdivisiones alministratives del territoriu como una responsabilidá del gobiernu federal nin como una responsabilidá conxunta del gobiernu colos suxetos; poro, los gobiernos de los suxetos federales interpretaron que yera una competencia esclusiva de so, y de resultes la forma d'organización territorial de los suxetos ye enforma variable. Magar qu'el resultáu final ye perdiferente nos distintos suxetos, en xeneral reconócense nellos trés tipos principales de subdivisiones alministratives: los distritos o raiones; ciudaes o asentamientos urbanos con relevancia propia; y formaciones alministrativo-territoriales zarraes.

Los ókrugs y ókrugs autónomos son unidaes intermedies, una y bones incluín a dellos de los distritos y ciudaes relevantes d'un suxetu federal. Los ókrugs autónomos, magar que tando embaxu la xurisdicción d'otru suxetu federal, son reconocíos como suxetos federales de propiu derechu. La esceición a esta regla ye'l ókrug autónomu de Chukotka, que nun ta subordináu alministrativamente a dengún otru suxetu federal. En xeneral los ókrugs son antiguos ókrugs autónomos que perdieran el so estatus de suxetu federal tres d'amiestase con otru suxetu federal.

Les unidaes alministratives más pequeñes inclúin, xeneralmente: conceyos rurales, nomaos selsoviets; ciudaes y asentamientos urbanos con relevancia distrital; y distritos urbanos.

Divisiones municipales[editar | editar la fonte]

Nel trescursu de la reforma municipal rusa de 2004-2005 tolos suxetos federales entamaron la racionalización de les estructures d'autogobiernu municipal, una facultá de los conceyos que ta garantizada na constitución rusa. La reforma encamentaba a tolos suxetos federales a tener una estructura xunificada d'órganos de gobiernu municipal pal 1 de xineru de 2005, y al añu siguiente entró en vigor la llei que dio estatus definitivu a les disposiciones de la reforma. Acordies con esa llei, en vigor dende'l 1 de xineru de 2006, les xunidaes de la división de los conceyos (les nomaes formaciones municipales) son les siguientes[4]:

  • Distritu municipal, que ye un grupu d'asentamientos urbanos y rurales, qu'inclúi, les más de les veces,el territoriu asitiáu ente ellos. Na práctica, los distritos municipales avecen a formase dientro les llendes de los distritos alministrativos (raions) preesistentes. Inclúi asentamientos urbanos, formaos por una ciudá o un asentamientu de tipu urbanu, conxuntamente colos pueblos axacentes, y asentamientos rurales, formaos por un pueblu o por varios aconceyaos.
  • Ókrug urbanu, que ye un asentamientu urbanu non incorporáu a un distritu municipal. Na práctica estos ókrugs urbanos avecen a formase dientro les llendes de les ciudaes de relevancia dientro del suxetu.
  • Territoriu intraurbanu de una ciudá federal, que ye una parte del territoriu d'una ciudá federal. En Moscú reciben el nome de formaciones municipales, y correspuenden a distritos; en San Petersburgu hai ókrugs municipales, ciudaes y asentamientos; y en Sebastopol hai ókrugs municipales y una ciudá.

Los territorios que nun formen parte de les formaciones municipales reciben el nome de territorios ente los asentamientos.

La llei federal citada foi enmendada el 27 de mayu de 2014 pa incluyir nuevos tipos de divisiones municipales[5]. De magar esisten los ókrugs urbanos con divisiones intraurbanas, distritos intraurbanos que formen el nivel más baxu de la xerarquía alministrativa municipal. El ókrug urbanu de Chelyabinsky foi el primeru qu'organizó'l so territoriu, en xunu de 2014, acordies con esti nuevu modelu[6].

Otros tipos de subdivisiones[editar | editar la fonte]

Distritos federales[editar | editar la fonte]

Artículu principal: Distritos federales de Rusia

Tolos suxetos federales agrúpense en ocho distritos federales[7], caún alministráu por un representante unviáu pol presidente de Rusia. Estos unviaos faen d'enllaz ente los suxetos federales y el gobiernu federal, y son responsables de supervisar el cumplimientu de les lleis federales por parte de los suxetos federales.

Rexones económiques[editar | editar la fonte]

Los suxetos federales agrúpense, con un propósitu económicu y estadísticu, en doce rexones económiques[8]. Eses rexones, y les partes de so que comparten carauterístiques y tendencies económiques agrúpense, a la vez, en zones económiques y macrozones.

Distritos militares[editar | editar la fonte]

Los suxetos federales organícense, col propósitu de permitir a les Fuercies Armaes un manexu eficaz de les xunidaes militares, el so entrenamientu y otres cuestiones de calter operacional, en cinco distritos militares[9]. Caún ta embaxu'l mandu del comandante de distritu, que dirixe'l cuartel xeneral del distritu y ta a la so vegada subordináu al Estáu Mayor de les Fuercies Armaes de la Federación Rusa.

Referencies[editar | editar la fonte]

  1. Constitución de la Federación Rusa, artículu 65.
  2. Договор между Российской Федерацией и Республикой Крым о принятии в Российскую Федерацию Республики Крым и образовании в составе Российской Федерации новых субъектов. Tratáu ente la Federación Rusa y la República de Crimea sobre l'accesu a la Federación Rusa de la República de Crimea y sobre l'establecimientu de nuevos suxetos dientro la Federación Rusa (en rusu).
  3. Resolución 68/262 de l'Asamblea Xeneral de les Naciones Xuníes sobro la integridá territorial d'Ucraína (n'inglés).
  4. Государственная Дума Российской Федерации. Федеральный Закон №131-ФЗ от 6 октября 2003 г. «Об общих принципах организации местного самоуправления в Российской Федерации», в ред. Федерального Закона №243-ФЗ от 28 сентября 2010 г. Llei Federal 131-FZ del parllamentu de la Federación Rusa, de 6 d'ochobre de 2003. Sobre los principios xenerales de la organización del autogobiernu llocal na Federación Rusa.
  5. Федеральный Закон №136-ФЗ от 27 мая 2014 г. «О внесении изменений в статью 26.3 Федерального Закона "Об общих принципах организации законодательных (представительных) и исполнительных органов государственной власти субъектов Российской Федерации" и Федеральный Закон "Об общих принципах организации местного самоуправления в Российской Федерации"». Вступил в силу со дня официального опубликования. Опубликован: Официальный интернет-портал правовой информации http://www.pravo.gov.ru, 27 мая 2014 г. Llei Federal 136-FZ, de 27 de mayu de 2014. Enmendando l'artículu 26.3 de la llei federal "Sobre los principios xenerales de la organización de los cuerpos llexislativu (representativu) y executivu del poder estatal nos suxetos de la Federanción Rusa" y la llei federal "Sobre los principios xenerales d'organización del autogobiernu llocal na Federación Rusa".
  6. Законодательное Собрание Челябинской области. Закон №706-ЗО от 10 июня 2014 г. «О статусе и границах Челябинского городского округа и внутригородских районов в его составе». Вступил в силу со дня официального опубликования. Опубликован: "Южноуральская панорама", №87 (спецвыпуск №24), 14 июня 2014 г. Asamblea Llexislativa del Óblast de Chelyabinsk. Llei 706-ZO, de 10 de xunu de 2014. Sobre l'estatus y fronteres del ókrug urbanu de Chelyabinsky y los distritos urbanos que compriende.
  7. Президент Российской Федерации. Указ №849 от 13 мая 2000 г. «О полномочном представителе Президента Российской Федерации в федеральном округе». Вступил в силу 13 мая 2000 г. Опубликован: "Собрание законодательства РФ", №20, ст. 2112, 15 мая 2000 г. Presidente de la Federación Rusa. Decretu 849, de 13 de mayu de 2000.(President of the Russian Federation. Decree #849 of May 13, 2000 Sobre'l representante plenipotenciariu del Presidente de la Federación Rusa nún distritu federal.
  8. "Общероссийский классификатор экономических регионов" (ОК 024-95) введённый 1 января 1997 г., в ред. Изменения № 05/2001. Секция II. Экономические районы Clasificación de les rexones económiques ruses (OK 024-95) de 1 de xineru de 1997, tres d'aplicá-y les enmiendes 1/1998 a 5/2001.
  9. Президент Российской Федерации. Указ №900 от 27 июль 1998 г. «О военно-административном делении Российской Федерации», в ред. Указа №1144 от 20 сентябрь 2010 г. Вступил в силу 27 июль 1998 г.. Presidente de la Federación Rusa. Decretu 900, de 27 de xunetu de 1998. Sobre la división de l'alministración militar na Federación Rusa, tres de ser enmendáu pol Decretu 1144, de 20 de setiembre de 2010.