Orde de San Xuan de Xerusalén

De Wikipedia
Saltar a navegación Saltar a la gueta
Bandera de la Soberana Orde Militar de Malta.

La Orde de los Caballeros del Hospital de San Xuan de Xerusalén (en llatín: Ordo Fratrum Hospitalis Sancti Ioannis Hierosolymitani), tamién conocida como Orde de San Xuan, Orde de los Hospitalarios, Caballeros Hospitalarios, o simplemente Hospitalarios, ye la orden militar católica medieval que tuvo continuidá na Soberana Orde Militar de Malta, qu'entá ye anguaño un suxetu soberanu dientru del ordenamientu xurídicu internacional. La so sé estuvo nel reinu de Xerusalén y nes islles de Rodas y Malta, de la que tomó'l so nome actual.

Los Hospitalarios apaecieron a entamos del sieglu XII, una dómina de grandes reformes na vida monástica, como un grupu d'individuos asociaos con un hospital amalfitanu asitiáu nel barriu xerusalenín de Muristan, dedicáu a Xuan Bautista y fundáu alredor de 1023 por Gerard Thom p'atender a los peregrinos probes y enfermos qu'aportaran a Tierra Santa. Dellos autores, sicasí, consideren que la orden y l'hospital amalfitanos yeren un establecimientu y una orde distintes que les de Gerard Thom. En cualisquier casu, dempués de la conquista de Xerusalén en 1099, demientres la Primera Cruzada, la organización convirtiose nuna orde relixosa y militar de patronazgu papal encargada del curiáu y la defensa de Tierra Santa. Tres de la conquista d'estes tierres polos musulmanes, los caballeros instaláronse en Rodas, formando un estáu propiu, y dempués en Malta, formando un estáu vasallu del virreinatu español de Sicilia. Tamién participaron na colonización americana: a mediaos del sieglu XVII mercaron cuatro islles del Caribe, que cedieron a Francia na década de 1660.

La orde debilitose enforma na dómina de la Reforma protestante, cuando importantes miembros alemanes y holandeses de la orden convirtiéronse al protestantismu y separtáronse del troncu común católicu. La orden foi desanicida d'Inglaterra, Dinamarca, Suecia y los demás estaos del norte d'Europa, y sofrió daños tamién tres de la captura de Malta por Napoleón Bonaparte en 1798, qu'obligó a los sos miembros a espardese per Europa y Rusia. Coyó fuercia otra vuelta a entamos del sieglu XIX, y redirixó la so actividá hacia les causes relioses y humanitaries. En 1834 la orde, conocida yá como Soberana Orde Militar de Malta, instaló el so cuartel xeneral en Roma, au sigue anguaño.

Enllaces esternos[editar | editar la fonte]