Oliva Zafa Castillo

Oliva Zafa Castillo
Vida
Nacimientu	Sebares, 7 de xunetu de 1915
Nacionalidá	España
Muerte	La Bornaína, 28 de xunetu de 1938 (23 años)
Sepultura	La Bornaína
Causa de la muerte	muerte por disparo (es)

Oliva Zafa Castillo (7 de xunetu de 1915, Sebares – 28 de xunetu de 1938, La Bornaína), en dellos rexistros nomada como Oliva Faza Castillo, Oliva Zafa Suárez y Oliva Zafra Suárez, foi una republicana asturiana que morrió asesinada poles tropes franquistes mientres la Guerra civil española na matanza de la mina de La Bornaína.

Biografía

Nació en Sebares, el 7 de xunetu de 1915. Casó col maestru Laureano Argüelles Felgueroso, que yera l'alcalde socialista de Piloña. En xunetu de 1938, el so home foi deteníu polos nacionales y arrastráu per L'Infiestu atáu al rabu d'un caballu, para dempués ser rematáu en Llanulríu.

Panteón nel que reposen los restos mortales de Zafa y los mineros asesinaos na masacre de La Bornaína, allugáu na redoma del llugar nel que fueron asesinaos.

Zafa, para salvar la vida del so fíu, fuxó con otros mineros pelos montes escontra al Valle de Carrocera onde tenía unos familiares. Cuando los siete mineros y Zafa llegaron a El Rebollal, ocultáronse nel interior de la mina La Bornaína. Tando ellí abellugaos, un falanxista delatólos polo que al llugar llegó una amplia tropa franquista, qu'esperó a la salida de la bocamina a que Zafa y los mineros salieren al esterior. Para consiguir que lo fixeren, un grupu de relixosos convenció-yos con la promesa de que nada-yos pasaría. Finalmente, el 28 de xunetu de 1938, la fame fixo que Zafa y los mineros salieren al esterior de la mina. Mientres taben comiendo l'alimentu que-yos dexaron, una ametralladora empezó a dispara-yos. Dempués, solmenáron-yos el tiru de gracia a cada unu d'ellos.

Placa n'alcordanza de Safa y los mineros asesinaos na masacre de La Bornaína, instalada na bocamina.

Amás d'Oliva Zafa, con 23 años, na conocida como masacre de La Bornaína finaron Aquilino Suárez Fernández, de 25 años, Cándido Fernández Montes, de 22 años, Francisco Fernández Nava, de 31 años, Vicente Roces Menéndez, de 36 años, Jamino Fernández Suárez de 26 años, Amalio Fernández Rodríguez, de 22 años, y José García Iglesias, de 24 años. El cuerpu de toos ellos, menos el d'unu de los mineros, xaz nun panteón instaláu cerca de la entrada de la mina. El cuerpu del so maríu Laureano Argüelles Felgueroso foi treslladáu tamién a esi panteón xuntu al de Zafa.

Reconocencies

En 1977 instalóse una llábana na so alcordanza nel interior de la mina na que fueron asesinaos. Cada añu, realízase un homenaxe nel llugar de la masacre.

Enllaces esternos

• Datos: Q131311383