O Arietis

De Wikipedia
Saltar a navegación Saltar a la gueta
U Arietis
O Arietis
Constelación Aries
Ascensión reuta α 03h 11min 02,9s
Declinación δ +14º 47’ 58’’
Distancia 2530 años lluz (aprox)
Magnitú visual +7,2 a +15,8 (variable)
Magnitú absoluta +1,26
Lluminosidá 8400 soles (aprox)
Temperatura 2280 K (aprox)
Radiu 610 soles
Tipu espectral M5.5y (mediu)
Velocidá radial -37 km/s

O Arietis (O Ari / HD 19737 / GCRV 1753)[1] ye una estrella variable na constelación d'Aries. Alcuéntrase aprosimao a 2530 años lluz del Sistema Solar.[2]

O Arietis ye una estrella Mira rica en oxíxenu de tipu espectral variable ente M4 y M9.5IIIe. El so rellumu bazcuya ente magnitú +7,2 y +15,8 a lo llargo d'un periodu de 371,1 díes.[3] El so diámetru angular, midíu en banda K, ye de 6,11 milisegundos d'arcu,[4] ente que per aciu tapecimientu llunar llogróse un valor llixeramente cimeru, de 7,3 ± 0,3 milisegundos d'arcu; dambes midíes fueron realizaes cerca del mínimu. Coles mesmes, reparáronse discrepancies ente midíes llevaes a cabu en distintes rexones del espectru infrarroxu, que pueden esplicase pola presencia d'una fina capa d'agua caliente —ente 1500 y 2000 K— cerca de la fotosfera de la estrella.[2] El diámetru d'O Arietis ye 610 ~ vegaes más grande qu'el del Sol, rellumando con una lluminosidá 8400 ± 3500 vegaes mayor que la lluminosidá solar. La temperatura efectivo envalorada, 2280 ± 80 K, ye más baxa de lo que cabría esperar pa una variable Mira (~ 3000 K).[2]

Como ye característicu nesta clase de variables, esiste perda de masa estelar, que nel casu d'O Arietis ye del orde de 57 × 10-8 vegaes la masa solar per añu. Piénsase que la so proxenitora yera una estrella de la secuencia principal de 1,3 mases solares.[2]

Ver tamién[editar | editar la fonte]

Referencies[editar | editar la fonte]