Numberación romana

De Wikipedia
Saltar a: navegación, buscar
Tumba de Hegel, na qu'apaecen les feches de la so nacencia y muerte espresaes en numberales romanos.

El sistema numbéricu representáu polos numerales romanos orixinose na Antigua Roma, y foi la forma usada pa escribir los númberos en toa Europa hasta finales de la Edá Media. Nesti sistema los númberos represéntense por combinaciones de lletres del alfabetu llatinu. Los numberales romanos, tal y como los conocemos anguaño, básense en siete símbolos[1]:

Símbolu I V X L C D M
Valor 1 5 10 50 100 500 1,000


L'usu de los numberales romanos continuó bien de tiempu dempués de la desapaición del Imperiu romanu. Dende'l sieglu XIV pa en delantre esti sistema de numberación foi sustituyíu, na mayoría de los usos, pol más cenciellu de los numberales arábigos. Por embargu, esti procesu foi gradual ya incompletu, y l'usu de los numberales romanos, magar que p'asuntos d'importancia menor, continúa nel sieglu XXI.

Sistema numbéricu romanu[editar | editar la fonte]

Los númberos del 1 al 10 avecen a representase, en numberales romanos, como sigue:

I, II, III, IV, V, VI, VII, VIII, IX, X.

Los númberos fórmense combinando símbolos y sumando los sos valores, de forma que por exemplu II ye dos (dos "unos") y XIII ye trece (un "diez" y tres "unos"). Los símbolos colóquense d'izquierda a derecha por orden de valor, entamando pol mayor. Sicasí, hai dellos casos particulares[2] . Pa evitar repetir más de trés vegaes un símbolu consecutivamente (por exemplu, IIII o XXXX) utilízase la resta posicional de la forma que se recueye darréu[3][4]:

  • El símbolu I asitiáu delantre de V o X indica ún menos, de forma que cuatro ye IV (ún menos que cinco) y nueve ye IX (ún menos que diez).
  • El símbolu X asitiáu delantre de L o C indica diez menos, de forma que cuarenta ye XL (diez menos que cincuenta) y noventa ye XC (diez menos que cien).
  • El símbolu C asitiáu delantre de D o M indica cien menos, de forma que cuatrocientos ye CD (cien menos que quinientos) y novecientos ye CM (cien menos que mil)[5].

Asina, por exemplu, MCMIV ye 1904, porque M representa mil, CM novecientos y IV cuatro.

Formes alternatives de representación[editar | editar la fonte]

Un reló cola típica representación de les hores con numberales romanos (Bad Salzdetfurth, Alemaña).

La forma "estandarizada" de representación qu'acabamos de describir ye, más qu'una convención de representación universalmente aceptada, el vezu modernu. L'usu de los numberales na Roma antigua varió enforma, y tampoco hebo una estandarización nos tiempos medievales o modernos[6].

Les inscripciones romanes, especialmente les qu'apaecen en contestos oficiales, parecen tener preferencia pol usu de formes aditives como IIII o VIIII en llugar de formes qu'impliquen resta como IV y IX. Les dos formes de representar los numberales apaecen en documentos de la dómina romana, inclusu dientro del mesmu documentu, y hai tamién formes de "resta doble" como XIIX o inclusu IIXX en cuenta de XVIIII. Amás, delles veces nun s'utilicen los símbolos V y L, y vense formes como IIIIII o XXXXXX en cuenta de VI o LX[7].

Inscripción nel Arcu del Almirantazgu, en Londres. Usa MDCCCCX en cuenta de MCMX pa representar 1910.

Eses variaciones ya inconsistencies persistieron demientres la dómina medieval y na Edá Moderna, inclusu convirtiéndose na norma en dalgunos contestos. Asina, nos relós avézase a representar cuatro con IIII pero nueve con IX; los oríxenes d'esti vezu pueden rastrexase hasta'l sieglu XIV[8]. Esta práctica, sicasí, nun ye nin de lloñe universal; por exemplu, el famosu reló del Palaciu de Westminster de Londres, el Big Ben, usa la forma IV.

Referencies[editar | editar la fonte]

  1. Los símbolos alfabéticos pa númberos mayores, como Q pa representar 500.000, tienen sío usaos tamién con un ciertu gráu d'estandarización. Gordon, Arthur, E., Illustrated Introduction to Latin Epigraphy. Berkeley, 1982, University of California Press.
  2. Reddy, Indra K., Khan, Mansoor A. Essential Math and Calculations for Pharmacy Technicians. CRC Press, 2003.
  3. De la Cruz, M.L.P.; Torres, H.D. Number Smart Quest for Mastery: Teacher's Edition. Rex Bookstore, Inc., 2009.
  4. Martelli, Alex; Ascher, David. Python Cookbook. O'Reilly Media Inc., 2002.
  5. Trick question: How to spell 1999? Numerals: Maybe the Roman Empire fell because their computers couldn't handle calculations in Latin.. Artículu de Michael Stroh nel diariu The Baltimore Sun el 27 d'avientu de 1998.
  6. ¿Cuála ye la forma más afayaíza pa representar los numberales de la década de 1990?, artículu de Cecil Adams na web The Straight Dope (n'inglés).
  7. Kennedy, Benjamin Hall. The Revised Latin Primer. Longmans, Green & Co, 1923, Londres.
  8. Pickover, Clifford A., Wonders of Numbers: Adventures in Mathematics, Mind, and Meaning. Oxford University Press, 2003, p. 282. ISBN 9780195348002.