Nueva Holanda
Nueva Holanda (en neerlandés Nieuw-Holland, y en llatín Nova Hollandia) ye un nome históricu européu usáu pa denomar la islla-continente d'Australia. El términu foi usáu por primer vegada con esti significáu pol marín neerlandés Abel Tasman, y foi utilizáu, por un tiempu, na mayoría de los mapes europeos como equivalente al de "tierra meridional" o Terra Australis, inclusive dempués de que s'esplorara la costa completa d'Australia. El teniente James Cook reclamó la fastera oriental del continente australianu pa la Corona británica en 1770, dándo-y el nome de Nueva Gales del Sur. La conversión del asentamientu británicu de Sydney en colonia en 1788 foi siguida de la reclamación oficial británica de la costa oriental de la islla-continente como Nueva Gales del Sur, quedando'l nome de Nueva Holanda como denominación de la so fastera occidental. Esta Nueva Holanda nunca nun foi colonizada polos holandeses, que prefirieron asentase na so colonia del Cabu (África del Sur), en Guayana, nes Indies Orientales y Occidentales Holandeses o en Ceilán, y magar que'l términu de Nueva Holanda siguió tando n'usu, popular ya semioficial, pa referise a tol continente australianu polo menos hasta mediaos de la década de 1850, les autoridaes coloniales de Sydney redenominaron oficialmente'l continente, que pasó a llamase Australia de magar, en 1824.
Historia[editar | editar la fonte]
La Era Dorada de los descubrimientos neerlandeses (c. 1590s–1720s)[editar | editar la fonte]
El nome de Nueva Holanda foi aplicáu por primer vegada pa denomar les costes occidental y septentrional d'Australia en 1644 pol marín neerlandés Abel Tasman, más conocíu por tener descubierto lo qu'anguaño nómase Tasmania n'honor a elli y qu'elli denomó como tierra de Van Diemen. El capitan inglés William Dampier usó posteriormente esti nome na narración de dos de los sos viaxes a la zona: el primeru, nel que llegó al continente el 5 de xineru de 1688 y tuvo nelli hasta'l 12 de marzu[1]; y el segundu, en 1699[2]. Sicasí, nin los Países Baxos nin la Compañía Neerlandesa de les Indies orientales ficieron otra cosa que poné-y el nome al territoriu, que nun reclamaron como propiu, y magar qu'hebo munches espediciones neerlandeses nos dos sieglos que siguieron a la primera visita al continente en 1606, nun hebo dengún intentu d'establecer un asentamientu permanente n'elli. La mayoría de los esploradores de la dómina concluyeron que l'aparente falta d'agua y tierra fértil facíen el territoriu poco adecuáu pa ser colonizáu
Tres de la Era neerlandesa[editar | editar la fonte]
El 22 d'agostu de 1770, tres de percorrer en dirección norte toa la costa este d'Australia James Cook reclamó toa la costa oriental de Nueva Holanda, qu'acababa de finar d'esplorar, como territoriu británicu. A lo primeru nomó esa tierra como Nueva Gales, pero dempués revisolu y dió-y el nome de Nueva Gales del Sur. L'establecimientu d'un asentamientu permanente en Sydney en 1788 reafirmó la pretensión británica sobre lo que yá yera oficialmente como Nueva Gales del Sur[3]. La comisión encargada pol primer gobernador de la colonia, Arthur Philip, definió la llende de la colonia nel meridianu 135º este[4], tomando la llinia definida nel mapa Hollandia Nova—Terre Australe, ellaboráu por Melchisédech Thévenot y espublizáu en Relations de Divers Voyages Curieux (París, 1663)[5].
El términu Nueva Holanda yera usáu habitualmente pa referise namái a la parte del continente que nun pertenecía a la colonia británica, esto ye, a la metá occidental de la islla-continente. En 1804 el marinu británicu Matthew Flinders propunxo usarlos nomes Terra Australis o Australia pa denomar al continente completu y reservar el de Nueva Holanda pa la so fastera occidental. Elli siguió usando, na so correspondencia, el nome d'Australia demientres tentaba de consiguir apoyos pa la so propuesta. Asina, desplicó-y al naturalista Joseph Banks que...
La propiedá del nome Australia o Terra Australis, que yo aplico a tol territoriu de lo que tien venío conociéndose como Nueva Holanda, debe sometese a la aprobación del Almirantazgu y de los espertos en xeografía. A mí paréceme de poco sentíu que la Nueva Gales del Sur del capitán Cook deba ser incluyida na Nueva Holanda de los neerlandeses, y por eso yo vuelvo llamala col so nome orixinal, Terra Australis o Gran Tierra del Sur, que yera pol que la conocíen incluso los neerlandeses nel sieglu XVII. Y ello porque: aparentemente nun foi hasta un tiempu dempués del segundu viaxe de Tasman qu'entamó aplicase'l nome de Nueva Holanda; pasó bien de tiempu hasta que sustituyó nos mapes neerlandeses al de T’Zuydt Landt [Gran Tierra del Sur]; y nun tien sentíu aplicar el nome pa denomar tierres de les qu'entá nun se tenía conocimientu de la so esistencia. Nueva Gales del Sur, poro, tien que caltener la so denominación estremada de la de Nueva Holanda, y esto obliga, una y bones agora persábese que dambes formen parte d'una misma masa de territoriu, a poné-y un nome xeneral. Y, nel mio entendimientu, nun hai dengún menos oxetable per toles partes que'l que yo propongo[6][7].
La so suxerencia foi inicialmente refugada, pero'l nuevu nome foi aprobáu pol gobiernu británicu en 1824. En 1825 la llende occidental de la colonia moviose al meridianu 129º este y en 1826, pa evitar un posible asentamientu francés, con reclamación posterior del territoriu, los británicos decidieron establecer, nel suroeste de Nueva Holanda, l'asentamientu d'Albany, col envís de protexer la ruta marítima hacia Nueva Gales del Sur. El gobernador Ralph Darling punxo a Edmund Lockyer al mandu de la espedición cola orde de que, si encontraba franceses endayuri ficiera desembarcar los sos soldaos pa facé-yos saber que "tol territoriu de Nueva Holanda pertenez al gobiernu de la Corona británica"[8]. En 1828 establecióse un nuevu asentamientu (l'actual Perth), nesti casu a la vera'l ríu Swan, y de magar entamó a llamáse-y a toa la parte occidental del continente Swan River Colony (Colonia del ríu Swan). Sicasí, el nome de Nueva Holanda foi utilizáu inda pa denomar al continente completu cuando Charles Fremantle, el 9 de mayu de 1829, tomó formalmente posesión, en nome del rei Xurde IV, de "toles tierres de Nueva Holanda que nun tán incluyíes nel territoriu de Nueva Gales del Sur". Esti territoriu, en 1832, foi renombráu como Western Australia (Australia occidental).
Pese a esta declaración, tovía en 1837, na correspondencia oficial ente'l gobiernu de Londres y el de la colonia de Nueva Gales del Sur, usábase'l términu Nueva Holanda pa referise al conxuntu del continente[9][10].Nos Países Baxos, pela so banda, siguió llamándose Nieuw Holland al continente hasta finales del sieglu XIX; el so nome actual ye Australië. El caberu restu del vieyu nome del continente persiste en taxonomía; munches especies australianes catalogaes en sieglos pasaos tienen como nome específicu novaehollandiae o novae-hollandiae. Asina, el nome científicu del emú ye Dromaius novaehollandiae.
Referencies[editar | editar la fonte]
- ↑ Abbott, JHM, William Dampier, pp. 55-62, Sydney, 1911.
- ↑ Dampier W, A Voyage to New Holland: The English Voyage of Discovery to the South Seas in 1699 (editáu con una introducción de James Spencer). Alan Sutton, Gloucester, 1981. ISBN 0-904387-75-5.
- ↑ Wharton WJL, "Preface" en Captain Cook's Journal. Wimbledon Park, 1893.
- ↑ «Instrucciones del gobernador Phillip (25 d'abril de 1787)». Documenting a Democracy. National Archives of Australia. Consultáu'l 4 d'avientu de 2022.
- ↑ Sir Joseph Banks, 'Draft of proposed Introduction to Captn Flinders Voyages', payares de 1811; Biblioteca Estatal de Nueva Gales del Sur, The Papers of Sir Joseph Banks, Series 70.16. Citáu en King RJ, "Terra Australis, New Holland and New South Wales: the Treaty of Tordesillas and Australia", The Globe no.47, 1998, p.35.
- ↑ Flinders to Banks, Isle of France (Mauritius), 23 March 1804, Royal Greenwich Observatory, Herstmonceux-Board of Longitude Papers, RGO 14/51: 18 f.172).
- ↑ «Carta de Matthew Flinders axuntada orixinalmente a un mapa de 'New Holland' (Australia)». Universidá de Cambridge. Consultáu'l 4 d'avientu de 2022.
- ↑ «King George's Sound Settlement». State Records. Autoridá de los Archivos Estatales de Nueva Gales del Sur. Consultáu'l 4 d'avientu de 2022.
- ↑ Scott, Ernest Cambridge University Press: The Naming of Australia, in The Life of Captain Matthew Flinders. ISBN 9781108040617.
- ↑ Richards, J., The Secret War: A True History of Queensland's Native Police, p. 49. 2008