Nueva Francia
Nueva Francia (en francés Nouvelle-France) ye'l nome que recibió'l territoriu colonizáu por Francia n'América del Norte dende la esploración del golfu de San Llorienzo por Jacques Cartier, en 1534, y la cesión del territoriu a Gran Bretaña y España, en 1763, como resultáu de les cláusules del tratáu de París, que punxo fin a la Guerra de los Siete Años.
El territoriu, que tenía la consideración de virreinatu, taba formáu, nel so momentu de mayor estensión, 1712, por cinco colonies, caúna cola so propia alministración: Canadá, la más desarrollada, que taba sodividida nos distritos de Québec (alredor de l'actual ciudá de Québec), Trois-Rivières y Montreal; la badea de Hudson; Acadia, nel noreste; Terre-Neuve, na islla de Terranova; y Louisiana[1][2]. Estendíase dende Terranova a les Praeres Canadienses, y dende la badea de Hudson al golfu de Méxicu, ya incluyía tolos Grandes Llagos. Los ríos San Llorienzo y Mississipi, navegables, yeren víes de penetración de la influyencia francesa en bona parte del socontinente norteamericanu.
Nel sieglu XVI estes tierres yeren utilizaes como fonte de materies primes, como pieles, al traviés del comerciu coles poblaciones indíxenes. Nel sieglu XVII entamó la creación d'asentamientos permanentes en Acadia y Québec. En 1713, pol tratáu d'Utrecht, Francia cedió a Gran Bretaña los sos derechos sobre l'Acadia continental, la badea de Hudson y Terranova. Francia estableció la colonia de Islla Real, na islla del Cabu Bretón, na que construyó la Fortaleza de Louisburgu[3][4].
La población del territoriu creció de forma lenta pero continua. En 1754 la población d'orixe européu conformábenla unes 69.000 persones: 10.000 acadianos, 55.000 francocanadienses (Canadiens) y unos 4.000 colonos nes Luisianes superior ya inferior. Los británicos espulsaron a los acadianos nel contestu de la Guerra de los Siete Años: los sos descendientes espárdense anguaño poles Provincies Marítimes de Canadá, Maine y Louisiana, habiendo también pequeñes poblaciones de Chéticamp (Nueva Escocia) y les Islles de la Madalena. Dalgunos más volvieron pa Francia.
El tratáu de París, que finó la Guerra de los Siete Años, supunxo la perda del restu del territoriu francés n'América del Norte a manes d'España y Gran Bretaña: Francia namái conservó derechos de pesca alredor de Terranova. Gran Bretaña cedió, pa que fora posible desarrollar esos derechos pesqueros, les islles de Saint Pierre y Miquelon, que yeren de so de magar 1713. Gran Bretaña quedose con Canadá, Acadia y el territoriu de la Louisiana Francesa asitiáu al este del ríu Mississippi, sacante la illa d'Orléans. Esta, xunto col territoriu de la Louisiana asitiáu al oeste del Mississippi, pasó a ser de soberanía española. En 1800 España cedió la so porción de Louisiana a Francia al través del tratáu, secretu, de San Ildefonsu, y Napoleón Bonaparte vendió-yla a Estaos Xuníos en 1803 (Compra de Luisiana), poniendo fin a la presencia colonial francesa nel territoriu continental d'América del Norte.
Lo que yera Nueva Francia foi absorbíu por Estaos Xuníos y Canadá. Los únicos rescaldos de la presencia francesa son les islles de Saint Pierre y Miquelon, que son una coleutividá francesa d'ultramar. Sicasí, Québec sigue siendo de llingua francesa, y hai dellos pequeños núcleos de población de llingua francesa nos Estaos Xuníos, amás de numberosos rastros na toponimia.
Referencies
[editar | editar la fonte]- ↑ Francis, R. Douglas; Jones, Richard; Smith, Donald B. (2009) Cengage Learning: Journeys: A History of Canada. ISBN 978-0-17-644244-6.
- ↑ «La Nouvelle France: Le Territoire» (francés). Government of France.
- ↑ Johnston, Andrew John Bayly (2001). MSU Press: Control and Order in French Colonial Louisbourg, 1713–1758. ISBN 978-0-8701-3570-5.
- ↑ «History». Fortress of Louisbourg Association.