Neutru de materia
El neutru de materia ye un fenómenu llingüísticu nel asturianu y otres llingües que se manifiesta cuando un sustantivu incontable (o de materia) precede un axetivu neutru, representáu pola terminación -o. Foi Ramón Menéndez Pidal quien, a finales del sieglu XIX, notó per primer vegada esta concordancia "anómala" nos axetivos. María Josefa Canellada foi la primera n'emplegar el términu "neutro" pa describilo na so obra El habla de Cabranes, términu que tamién usaría Jesús Neira nel so trabayu sobro Ḷḷena y lluéu Dámaso Alonso bautizólo como "neutru de materia".[1][2][3] Magar el so nome, que'l mesmu Alonso consideró "no totalmente adecuado", nun se trata d'un tercer xéneru neutru nel sen tradicional, ya que los sustantivos afeutados caltienen el so xéneru masculín o femenín al traviés d'artículos, demostrativos, cuantificadores y axetivos prenominales.[1][2][4]
Esti fenómenu documéntase estensamente nel centru-oriente d'Asturies y Cantabria hasta'l ríu Nervión. Hai rexistros d'esti fenómenu na Cordelera Cantábrica, dende "Las Encartaciones" (Biskaia) y el nordeste de Burgos hasta l'oriente d'Asturies.[1] Hestóricamente, rexístrase en documentos del sieglu XVIII, como los Libros de los Expósitos del Real Hespiciu d'Uviéu, lo que demuestra'l so usu ya espansión en dómines pasaes.[2]
Carauterístiques
[editar | editar la fonte]El neutru de materia ye una concordancia de base semántica, non léxica. La so función principal ye indicar la categorización o interpretación de los sustantivos como continuos (non contables o incontables) o discontinuos (contables).
Morfoloxía
[editar | editar la fonte]Los sustantivos incontables amuesan una concordancia en -o colos axetivos y pronomes, que s'opón a los morfemes del masculín (-u/-os) y femenín (-a/-es) contables.[1] Esta distinción morfolóxica de númberu (singular/plural/incontable) considérase una de las principales figures morfolóxiques n'asturianu.[5] L'axetivu neutru nunca nun pue manifestase en posición prenominal, ya que l'axetivu prepuestu debe concordar en xéneru col sustantivu. Poro, l'axetivu neutru manifiéstase en posición posnominal, marcáu pola terminación -u nel masculín y -a pal femenín.[6][5] Los sustantivos que s'acomuñen con el neutru de materia son aquellos que designen sustancies incontables, como la fariña, l'agua, el llechi, la piedra, la sidra, etc. Estos sustantivos pueden ser masculinos o femeninos, pero na concordanza colos axetivos y pronomes neutros, nun se manifiesta'l xéneru,
Posición sintáutica
[editar | editar la fonte]La concordancia neutra nunca nun se manifiesta n'elementos que preceden al nome (como lo pan o esto pan), sino únicamente n'lementos pronominales o axetivos que remiten a un nome previamente introducíu, normalmente nel predicáu de la oración o n'oraciones posteriores.[1][5] Los axetivos y participios pospuestos al nome son los que "pierden" la concordancia de xéneru a favor de la terminación neutra.[1][4] Amás, la concordancia ye más frecuente nos pronomes que nos axetivos, y dientro de los axetivos, esprésase con mayor regularidá en posiciones predicatives (como atributu o predicativu) que n'alxuntos.[1]
Númberu
[editar | editar la fonte]El fenómenu solo apaez cuando'l sustantivu ta en singular, si ta en plural compórtase como'l restu de los sustantivos contables.[4][6]
Tipos de sustantivos
[editar | editar la fonte]Anque se-y llama "de materia", nun afeuta exclusivamente a sustantivos de materia.[4] Sicasí, los sustantivos que son oxetu la concordancia neutra suelen tener un caráuter continuu, indetermináu en cuanto al númberu d'unidades componentes, y remiten na so mayoría a tipos de testil o texíu (como bayeta, sarga, estameña, llana), así como a agua, ropa y sangre.[2] Nuevos términos como gasolina o nocilla tamién adopten esti tratamientu, evidenciando la vitalidá actual del fenómenu.[4]
Valires semánticos
[editar | editar la fonte]Relaciónase cola denotación de non-individualización, ausencia d'espresión de xéneru y númberu, y comportamientos sintáuticos paralelos a los nomes continuos.[1] Cuando un axetivu neutru apaez pospuestu, xenera una llectura xenérica.[5]
Orixe
[editar | editar la fonte]Esisten dos teoríes principales sobro l'orixe del neutru de materia. La primera, defendida por Menéndez Pidal y Dámaso Alonso, postula que'l fenómenu deriva de la conservación del xéneru neutru de dellos sustantivos del llatín (como LAC, OLEUM, LIGNUM).[2][4] Alonso, amás, propuso una hipótesis de colonización suditaliana, señalando paralelismos con fenómenos asemeyaos nesa fastera d'Italia.[3][4] Sicasí, esta teoría enfrenta crítiques, como'l fecho de que la mayoría de los nomes de materia del llatín yeren masculinos o femeninos, non neutros, y que fenómenos similares alcuéntrense fuera de les árees propuestes, indicando posibles evoluciones llingüístiques espontánees.[1][4]
Otra teoría, defendida pol dialectólogu y miembru del Real Institutu d'Estudios Asturianos, Jesús Neira, propón que'l neutru de materia ye una creación o reorganización del xéneru nel periodu protorrománicu, non una pervivencia direuta del neutru del llatín.[2][4] Neira argumenta que'l so orixe sitúase nos pronomes y demostrativos neutros, que conservaron la distinción llatina de xéneru y espandiéronse analóxicamente al paradigma nominal.[1] Esta espansión dióse de drecha a esquierda na cadarma sintáutica: de los pronomes a los predicativos, lluéu a los atributos, y finalmente a los alxuntos pospuestos al nome.[1]
Referencies
[editar | editar la fonte]- 1 2 3 4 5 6 7 8 9 10 11 Fernández-Ordóñez, Inés (2007). escritu en Madrid. Puigvert Ocal, Alicia; Delgado Cobos, Inmaculada. eds (en castellán). El "neutro de materia" en Asturias y Cantabria. Análisis gramatical y nuevos datos. Ediciones del Orto. páxs. 395-434Ex admiratione et amicitia. Homenaje a Ramón Santiago.
- 1 2 3 4 5 6 Menéndez Fernández, Claudia Elena (2020). «El «neutro de materia» en los Libros de los Expósitos del Real Hospicio de Uviéu (s. XVIII)». Verba.
- 1 2 García González, Francisco (1985). «Algo más sobre el "neutro de materia"» (n'asturianu). Lletres Asturianes (17): páxs. 31-36. ISSN 0212-0534.
- 1 2 3 4 5 6 7 8 9 Fernández Juncal, Carmen (2000). Neutro de materia y metafonía en el oriente de Cantabria (PDF) (en castellán), Ediciones Universidad de Salamanca. ISBN 84-7800-100-X.
- 1 2 3 4 Burner, Matthew (en castellán, PDF). La Sintaxis del Neutro de Materia en Asturiano: Especificidad, Genericidad y la Posicion del Adjetivo. University of Central Florida. https://stars.library.ucf.edu/cgi/viewcontent.cgi?article=2357&context=etd.
- 1 2 Burner, Matthew (2017). «El neutro de materia en asturiano: Un acercamiento sintáctico al fenómeno en cuanto a la especificidad, genericidad y la posición del adjetivo». Revista De Filoloxía Asturiana (Ediciones Trabe) 16 (16): páxs. 49-62. doi:.