Netball

De Wikipedia
Imaxe d'una xugada d'un partíu de netball.

El netball ye un deporte de pelota xugáu por dos equipos de siete xugadores. Desarrollose, a partir de versiones primitives del baloncestu, n'Inglaterra dende la década de 1890. En 1960 formóse la International Netball Federation, qu'axunta, en 2011, a más de 60 equipos nacionales organizaos en cinco rexones.

El netball xuégase nún campu rectangular con aros de canasta elevaos nos dos estremos. Cada equipo tenta de conseguir tantos moviendo'l balón al traviés del campu y llanzándolu al aru. Los xugadores tienen posiciones específiques nel campu, que definen el so rol dientru l'equipu y restrinxen los sos movimientos a partes determinaes del campu. Un xugador nun puede tener nel so poder el balón más de trés segundos demientres se xuega; o lu pasa a otru o tira a canasta. Gana l'equipu que consigue más canastes nel partíu, que dura 60 minutos.

El netball ye mui popular nes naciones de la Commonwealth, especialmente na escuela, y ye xugáu sobre too por muyeres. Acordies colos datos de la INF hai más de 20 millones de prauticantes d'esti deporte en más de 80 países[1]. Les principales lligues son la Netball Superleague británica, la Suncorp Super Netball australiana y la ANZ Premiership neozelandesa. No que cinca a les competiciones internacionales, les más importantes son el campeonatu mundial, que se celebra cada cuatro años, los Xuegos de la Commonwealth y dos competiciones añales, las Quad Series y Fast5Series. En 1995 el Comité Olímpicu Internacional reconoció al netball como deporte, magar que nunca formó parte del programa deportivu d'unos Xuegos Olímpicos.

Referencies[editar | editar la fonte]

  1. International Federation of Netball Associations. «About IFNA». Archiváu dende l'orixinal, el 8 de marzu de 2011. Consultáu'l 22 d'abril de 2018.

Enllaces esternos[editar | editar la fonte]