Naos (estrella)

De Wikipedia
Saltar a navegación Saltar a la gueta
Artículu revisáu
Naos
Zeta Puppis.png
Constelación Puppis
Ascensión reuta α 08h 03min 35,1s
Declinación δ -40º 00’ 11,6’’
Distancia 900 años lluz (aprox)
Magnitú visual +2,21
Magnitú absoluta -5,96
Lluminosidá 550.000 soles (bolométrica)
Temperatura 42.000 K
Masa 22,5 - 40 soles
Radiu 14 soles
Tipu espectral O5Ia
Velocidá radial -24,0 km/s
Otros nomes HD 66811 / HR 3165
HIP 39429 / SAO 198752

Naos ye'l nome que recibe la estrella ζ Puppis (ζ Pup / HD 66811) de magnitú aparente +2,21,[1] la más brillosa de la constelación de Puppis y la 66 del cielu nocherniegu.[2] El so nome remanez del griegu ναύς, que significa «barcu». Otru nome pol que ye conocida esta estrella ye Suhail Hadar, d'orixe árabe.

Carauterístiques físiques[editar | editar la fonte]

Naos ye una superxigante azul de tipu espectral O5Ia —tamién catalogada como O4I— esceicionalmente caliente con una temperatura superficial de 42.000 K. Ye una estrella bien masiva que la so masa ye 22,5 vegaes mayor que la del Sol[3] —cifra que pue aumentar hasta 40 mases solares según otres fontes—.[4] Ye una de les estrelles más lluminoses de la Vía Lláctea; considerando que la mayor parte de la radiación emitida atópase nel rangu del ultravioleta, ye 550.000 vegaes más lluminosa que'l Sol. El so radiu ye 14 vegaes más grande qu'el radiu solar.[3]

Evolución[editar | editar la fonte]

Anque enantes considerábase que Naos taba asitiada a 1400 años lluz del Sistema Solar, estudios de recién revisen esta distancia a 900 años lluz.[3] L'analís retrospectivu de la trayeutoria de Naos amuesa que foi espulsada del cúmulu estelar Trumpler 10 fai unos 2,5 millones d'años. Anguaño alcuéntrase visualmente a 8,5º del mesmu, equivalente a una separtación real de 400 ~ años lluz.

La so temperatura efectivo y gravedá superficial indiquen que Naos ta fora de la denomada «edá cero de la secuencia principal» (ZAMS).[3] Como otres estrelles de les sos carauterístiques, dende la so superficie sopla un fuerte vientu estelar de 2300 km/s, lo que fai que Naos pierda l'equivalente a una millonésima de la masa solar cada añu. Esta perda de masa ye 10 millones de vegaes superior a la qu'esperimenta'l Sol per mediu del vientu solar. L'estáu evolutivu y el vientu solar alteriaron la composición química superficial de Naos; el so conteníu de heliu ye doble que'l normal y probablemente tamién tea arriquecida en nitróxenu. Xira sobre sigo mesma a gran velocidá, siendo la so velocidá de rotación de 220 km/s, 100 vegaes mayor que la del Sol.[4] Una estrella d'estes carauterístiques, con una masa entendida ente 22 y 40 mases solares, va terminar la so vida españando como una espectacular supernova, dexando como remanente una estrella de neutrones o un furacu prietu.

Ver tamién[editar | editar la fonte]

Referencies[editar | editar la fonte]

Enllaces esternos[editar | editar la fonte]