Muséu del Traxe

De Wikipedia
Saltar a navegación Saltar a la gueta
Muséu del Traxe
Logo Museo del Traje.jpg
Museo del Traje.JPG
Llocalización
PaísBandera d'España España
AutonomíaBandera de la Comunidá de Madrid Comunidá de Madrid
ConceyuBandera de la Ciudá de Madrid Madrid
Historia y usu
Apertura1925
Arquiteutura
Superficie 30 875 Q25343
Visitantes añales 78 411
Web oficial
Cambiar los datos en Wikidata

El Muséu del Traxe ye un muséu nacional dependiente del Ministeriu d'Educación, Cultura ya Deporte allugáu na Avenida de Juan de Herrera númberu 2, na Ciudá Universitaria de Madrid (España). El so oxetivu básicu ye promover la conocencia de la evolución histórica de la indumentaria ya de los testimonios del patrimoniu etnolóxicu representativos de les cultures de los pueblos d'España.

Historia[editar | editar la fonte]

El Muséu, a pesar de ser una institución de recién creación, cuenta con una llarga ya interesante hestoria. El so orixe hai que buscalo na Esposición del Traxe Históricu, celebrada en 1925. Nel discursu inaugural d'esti eventu, el Conde de Romanones yá plantegó la idea de convertir la esposición temporal nuna permanente nel Muséu del Traxe. Dos años dempués creábase una Xunta de Patronatu del Muséu que tenía de faese cargu de los fondos de la Esposición, donaos o adquiríos pol Estáu, y formar con ellos el nuevu Muséu del Traxe Rexonal y Hestóricu (1927-1934).

En 1934, materialízase la idea de crear otra institución que recoyera estes coleiciones ya atesorara, amás, les tradiciones de los pueblos d'España. Esti nuevu muséu, el Muséu del Pueblu Español, amestó les coleiciones del Seminariu d'Etnografía ya Artes Populares de la Escuela Superior de Maxisteriu ya amplies series d'oxetos que los patronatos rexonales adquirieron ente 1934 ya 1936. Tres dellos cambeos de sede, les coleiciones treslládense, en 1983, al edificiu qu'anguaño ocupa; entós, sede del Muséu Español d'Arte Contemporáneo.

En 1993 el Muséu del Pueblu Español ya el Muséu Nacional d'Etnoloxía xúnense nuna sola institución, el Muséu Nacional d'Antropoloxía (1993-2004), anque siguieron funcionando de manera independiente.

Finalmente, en 2002, tres una reflexón xeneral sobre'l futuru del muséu, decidió potenciase la presencia pública de la coleición de traxes dende una perspeutiva moderna. En 2004, casi ochenta años dempués de la inauguración dle Muséu del Traxe Rexonal creóse'l Muséu del Traxe — Centru d'Investigación del Patrimoniu Etnolóxicu.

Colecciones[editar | editar la fonte]

  • Indumentaria histórica. El Muséu caltién escases pero significatives pieces de los sieglos XVI y XVII, de les que destaca un xubón femenín de finales del XVI. La coleición del sieglu XVIII tien escelentes exemplos del traxe masculín (chupes y chalecos, según la coleición de casaques femenines y prendes castices del maxismu). El sieglu XIX tien una representación más llindada en númberu d'oxetos, pero los diversos estilos del periodu tán representaos.
  • Indumentaria contemporánea. Na coleición de sieglu XX, con unes 4000 prendes, destaca en primer llugar Mariano Fortuny y Madrazo col so lliberador "Delphos". Del momentu nel que l'Alta cordura algamó la so máxima rellumanza, cuntamos con obres del maestru Cristóbal Balenciaga, con vistíos pa distintes hores del día ya los diseños de Pedro Rodríguez, Madame Rosina, Natalio Bernabéu, Manuel Pertegaz ya Elio Berhanyer, ente otros, qu'amuesen l'altu nivel de los alfayates españoles. De los creadores n'activu, el Muséu cunta con obres que fueron marcando enclinos, como'l singular vistíu metálicu de Paco Rabanne, ya la representación d'un gran númberu de diseñadores españoles actuales. Otres grandes obres que se caltienen son dalgunos de los vistíos que llució Audrey Hepburn na película Desayuno con diamantes, toos ellos diseñaos por Hubert de Givenchy.
  • Indumentaria popular. El muséu curia una importante coleición d'indumentaria tradicional popular procedente de toa España, formada por más de 5000 pieces. La coleición creció de manera significativa como un complementu indispensable de les series d'etnografía qu'allugaba'l Muséu del Pueblu Español.
  • Xoyería y complementos. La coleición de xoyes constitúi una de les más destacaes señes d'identidá del Muséu. Anque la mayoría de les pieces que la componen tán venceyaes con aspeutos tradicionales de la cultura española, tamién tienen cabida pieces representatives de les corrientes estétiques europees de los dos últimos sieglos. El muséu cunta amás con una estraordinaria coleición de complementos de moda. Destaquen los sombreros del sieglu XIX y principios del XX; les sombrielles d'encaxe; los guantes, que tomen dende'l sieglu XVII hasta güei; ya mención especial merez el calzáu, serie na que sobresalen los zapatos ya chineles femenines del sieglu XVIII. Dambes colecciones suman un total de 9000 pieces. El muséu ye una gran visita turística yá que dexa saber tou sobre la cultura y vestimienta d'España

L'edificiu[editar | editar la fonte]

Foi construyíu ente 1971 ya 1973 ya inauguráu en 1975 como Muséu Español d'Arte Contemporáneo (MEAC). Los sos autores, los arquiteutos Jaime López de Asiaín y Ángel Díaz Domínguez, siguieron pa la so construcción los encamientos del Congresu d'Arquiteutura de Museos del añu 1968. El proyeutu foi galardonáu col Premiu Nacional d'Arquiteutura de 1969. Tres el tresformamientu del MEAC nel Muséu Reina Sofía ya en 1992 el so treslláu a la so sede actual, l'edificiu quedó casi ensin usu. Na so rehabilitación gastáronse 21 millones d'euros.

Los espacios públicos del Muséu concéntrense na planta baxa, en redol al patiu central, en direuta unión visual colos xardinos esteriores (tienda, cafetería y futura sala d'esposiciones temporales), ya na planta principal, versátil ya multifuncional, au s'alluguen la biblioteca, l'auditoriu, aules, talleres infantiles, servicios internos ya una gran sala d'esposiciones.

Accesibilidá[editar | editar la fonte]

Puede aportase al Centru en tresporte públicu; tien na so proximidá, a unos 500 metros de distancia, dos estaciones de Metro (Ciudá Universitaria -llinia 6- y Moncloa -llinies 3 y 6-) ya dellos autobuses de la EMT Madrid que cubren la zona (llinies 46, 83, 133, F, G, I, O). Tantu les estaciones de metro como la mayoría de los autobuses atópense dotaos de sistemes d'accesibilidá ya places especiales pa minusválidos. Pela so parte, l'accesu al Muséu dende la cai realízase ensin nengún tipu de desnivel ya cuenta con ascensores que comuniquen direutamente les zones públiques de la planta 1ª col esterior.

Actividaes del muséu[editar | editar la fonte]

Nos sos años d'esistencia'l Muséu del Traxe pretendió consagrase ya destacar por un ricu ya heterogéneo volume d'actividaes empobinaes a afondar na hestoria del traxe ya los sos valores estéticos, téunicos, sociales ya culturales, respondiendo a les demandes de la sociedá actual.

Esto inclúi la organización d'esposiciones temporales, actividaes d'espardimientu escolar, talleres de divulgación, animaciones, ciclos de conferencies ya congresos.[1] Ye'l casu, por citar dalgún exemplu, de los “Alcuentros con ...”, nos que los diseñadores caltienen nel Muséu un diálogu personal ya informal col públicu, el “Modelu del mes”, curties conferencies na que s'interpreta una pieza escoyida dientro de la mesma sala d'esposición, o los “Domingos en familia”, talleres nos que se fomenta l'aprendizaxe ya la participación en familia.

Participa davezu nes actividaes programaes nel marcu de la Selmana de la Ciencia entamada pola Comunidá de Madrid.[2]

Situación actual[editar | editar la fonte]

La Universidá Complutense, propietaria del suelu, manifestó'l so deséu de recuperalo cuando acabe l'actual conveniu de cesión en 2013, lo qu'obliga al muséu a buscar una nueva sede. La Universidá axusta'l preciu que va pagar pol edificiu.

El llunes 28 d'abril de 2008 roblábase l'alcuerdu ente'l Ministeriu de Cultura ya el Conceyu de Madrid pa la creación d'un nuevu Centru Nacional de la Moda con sede nel Mataderu de Madrid. Primeramente yá se fixera pública la decisión de treslladar los fondos del denomináu CIPE (Centru d'Interpretación del Patrimoniu Etnolóxicu, venceyáu al Muséu del Traxe) a una nueva sede en Teruel.

El 11 de mayu de 2008 l'Asociación d'Amigos del Muséu del Traxe ellaboró un comunicáu nel qu'amuesa la so esmolición pol futuru del Muséu del Traxe, y pon en marcha una iniciativa de recoyida de firmes.

Referencies[editar | editar la fonte]

  1. «Puntadas con hilo». Actividades escolares para ESO, Bachillerato y Ciclos formativos. Consultáu'l 24 d'avientu de 2015.
  2. «La ciencia al servicio de la moda». Semana de la Ciencia 2014. Consultáu'l 24 d'avientu de 2015.

Enllaces esternos[editar | editar la fonte]