Mines de Llumeres

Coordenaes: 43°38′18″N 5°49′53″W / 43.63838144°N 5.83142217°O / 43.63838144; -5.83142217
De Wikipedia
Mines de Llumeres
mina
Llocalización
País España
Autonomía Principáu d'Asturies
Provincia provincia d'Asturies
Conceyu Gozón
Parroquia Bañugues
Coordenaes 43°38′18″N 5°49′53″W / 43.63838144°N 5.83142217°O / 43.63838144; -5.83142217
Mines de Llumeres alcuéntrase n'Asturies
Mines de Llumeres
Mines de Llumeres
Mines de Llumeres (Asturies)
Cambiar los datos en Wikidata

La mina de Llumeres ye una esplotación de mineral de fierro que s'asitia a la vera la ensenada de Llumeres, na parroquia de Bañugues, nel conceyu asturianu de Gozón. Anguaño abandonada, foi'l mayor de los xacimientos de fierro que s'esplotaron n'Asturies nos sieglos XIX-XX. Entá se caltienen dellos restos arquiteutónicos de la so actividá, que formen el Conxuntu Históricu Mines de Llumeres, incluyíu dende abril de 2009 nel Inventariu del Patrimoniu Cultural d'Asturies.

Dende una perspeutiva xeolóxica, el mineral d'esti xacimientu tenía un gran conteníu férricu, lo que fizo que fora explotao dende bien antiguo, como lo demuestra'l fechu de que s'atoparan restos de mineral d'esta procedencia nel castru xixonés de la Campa Torres. El xacimientu, d'otra banda, ye singular porque nelli s'atoparon casualmente, a finales de 2007, restos de la tamarugita, un mineral perescasu nel mundu y que nun s'atopara primero d'aquella en dengún otru llugar de la Europa continental.

Vista de les instalaciones del pozu na ensenada

Anque, como yá dixéramos, la riqueza mineral del llugar yera conocida dende vieyo, la so esplotación contemporánea nun escomenzó hasta 1859. Delles prospecciones amosaron que'l subsuelu de les parroquies d'Eres, Verdicio y Bañugues yera ricu en fierro, y nesi añu entamó la esplotación (principalmente d'hematites) de la mano de la Sociedad Compañía Minera de Gozón. La falta de capital obligó a la empresa, dos años dempués, a vender tol mineral que se sacara a la Sociedá Metalúrxica Duro Felguera, que se fizo cargu del xacimientu. Y ello porque, anque'l mineral yera de gran calidá, tanta qu'había que mezclalu con otros de menos resistencia pa que la mezcla fora reducible aína nel altu fornu, taba nun llugar enforma apartao de les fábriques que podíen procesalu y nun se podía llevar hasta elles de la forma avezada entós: en tren.

La nueva direición de la mina tuvo qu'enfrentase a esi problema, pal qu'atopó una solución provisional en 1906: facer un cai a la vera la mina. Dende esi puertu pequeños vapores de hasta 300 tonelaes, como'l Llumeres Alejandro, llevaben el mineral hasta los puertos de Xixón y L'Arena. D'ellí parte d'él colaba pa Inglaterra o Alemaña, y otra parte metíase en trenes que lu llevaben a la Fábrica de La Felguera, na que se procesaba. Sicasí, la precariedá del tresporte fizo que se siguiera buscando una solución definitiva. Descartada la construcción d'una llinia de ferrocarril, en 1919 decidióse sacar el mineral por un cable aereu. Per él circulaba, en calderos, hasta la estación de ferrocarril que se fizo n'El Regueral, en conceyu Carreño, a una distancia de 7,5 km. Dende ellí, yá en tren, el mineral viaxaba a Aboño, y dempués a Llangréu.

Yá yera fácil sacar el mineral, y la cantidá d'esti aumentó enforma (más d'un 40%) dempués de que, a entamos de la década de 1920, decidiérase ampliar la esplotación. Primero d'esi añu el mineral sacábase del cantil direutamente, pero pensóse en facer un pozu, ellí na mesma ensenada, que siguía la llinia Monte Merín-Rucao. Más tarde, nos años 40, completóse la rede de galeríes cola apertura, cerca de Les Cabañes (parroquia de Verdicio), del pozu Simancas, un pozu de 70 m de fondura del qu'anguaño malpenes queda, en mui mal estáu, la casa de máquines. Foron aquellos los meyores años de la mina de Llumeres. De 1920 a 1950 sacábase d'ella más del 40% del fierro que se producía n'Asturies, con un picu de producción de 86.000 tonelaes en 1950. La llegada de fierro d'otros países fizo que la esplotación fora cada vegada menos rentable y, finalmente, en 1967, la empresa decidió pesllala. Desmanteláronse entós el cable y el castillete, y zarráronse los pozos verticales y les salides al esterior del sistema de ventilación del pozu.

L'actividá paró, pero entá queden dellos restos. El primeru, de calter ecolóxicu: nun se recomienda'l bañu na playa de Llumeres, que tien de contino les sos agües tiñíes de colorao pola presencia de restos de partícules férriques en suspensión. D'otra banda, consérvense tamién una serie d'edificios que foron construyíos pola Duro Felguera y que entá nos falen de la importancia que tuvo el xacimientu. Bien d'ellos tán, dende abril de 2009, protexíos por una resolución de la Conseyería de Cultura y Turismu del Principáu d'Asturies. Nella (BOPA, 26/05/09) se declaren d'interés patrimonial los restos (almacén, oficines, aseos, casa de máquines -tirada, pese a ser un edificiu protexíu, en setiembre de 2008-, estación de clasificación del mineral, bocamina, cai y panadería) que se alluguen na ensenada de Llumeres, y s'establez tamién una zona de proteición, alredor d'ellos, de 15,40 ha. Fálase nella tamién, de dellos restos rellacionaos cola esplotación que habrán de ser, si así-yos parez a los conceyales, oxetu de proteición polos ayuntamientos de Gozón y Carreño: la casa de máquines del pozu Simancas; los restos que s'atopen nel Monte Merín; los restos de la esplotación que se caltienen na estación d'El Regueral; y el conxuntu de 64 viviendes pa obreros que promoviera la empresa en Bañugues.


Referencies[editar | editar la fonte]

Enllaces esternos[editar | editar la fonte]


Bibliografía[editar | editar la fonte]

  • Ortega, Marcos; Bartolomé, Paula; y Gómez, Benigno Minas de Llumeres: Recorriendo la historia, descubriendo un lugar. Xixón, CICEES, 2008.