Minecraft

De Wikipedia
Saltar a: navegación, buscar

Minecraft ye un videoxuegu independiente de construcción, de la triba «mundiu abiertu» o sandbox creáu orixinalmente pol suecu Markus «Notch» Persson, y darréu desendolcáu pola so empresa, Mojang AB.[1] Llanzóse públicamente'l 17 de mayu de 2009 na so versión alfa, dempués de dellos cambeos foi llanzada la so versión completa'l 18 de payares de 2011.

Markus Persson, el ceador de Minecraft.

Un mes enantes del llanzamientu de la so versión completa, el 18 d'ochobre de 2011, estrenóse una versión p'Android, y el 17 de payares del mesmu añu llanzóse la versión pa iOS. El 9 de mayu de 2012 lllanzóse la versión del xuegu pa Xbox 360, Xbox Live Arcade y PS3. Toles versiones de Minecraft reciben anovamientos davezu dende'l so llanzamientu. El 11 de payares de 2014, Minecraft llanzó la so edición pal apartáu de PlayStation Vita, desendolcada por Mojang y 4J Studios, esta versión presenta los mesmos anovamientos y similares carauterístiques que les otres versiones de consola; amás, cunta col sistema de venta cruciada, ye dicir, qu'al mercar la versión de PlayStation 3 mércase tamién la de PlayStation Vita. Anguaño vendiéronse más de 54 millones de copies.[2]

En Minecraft los xugadores puen facer construcciones llibres per aciu cubos (bloques) con testures tridimensionales, del mesmu mou puen restolar pel entornu, consiguir recursos y crear oxetos con utilidaes estremaes, lluchar escontra creatures (llamaes mobs n'inglés) u otros xugadores, etc. Nel so llanzamientu comercial el xuegu tenía dos moos principales: sobrevivencia, nel que los xugadores tienen d'adquirir recursos pa caltener el so salú y fame; y creativu, onde los xugadores tienen accesu illimitáu a los recursos del xuegu, l'habilidá d'esnalar y nun riquen de caltener la so salú y fame. Independientemente d'estos moos de xuegu tamién pue definise la dificultá'l xuegu, siendo'l mou más sele'l pacíficu, qu'a diferencia de les demás dificultaes, nun dexa qu'apaezan creatures nel xuegu que puean interactuar col xugador. Tamién esiste un tercer mou de xuegu, l'abegosu (hardcore n'inglés), que ye paecíu al mou sobrevivencia, cola diferencia de qu'esti namái pue xugase na dificultá difícil y que'l xugador tien namái una vida, polo que cuando muerre fina la partida y el mundiu tien de desanciase.

El 15 de setiembre del 2014, Microsoft mercó Mojang AB (xunto con tolos sos títulos) pol valir de 2.500 millones de dólares, esti socesu provocó l'alloñamientu de Markus Persson de la compaña y la so salida.[2]

Xugabilidá[editar | editar la fonte]

Minecraft ye un xuegu de mundiu abiertu, polo que nun tien un oxetivu específicu, dexándo-y al xugador una gran llibertá tocante a la esbilla del so mou de xugar, magar d'ello'l xuegu tien llogros que puen algamase.[3][4] El mou de xuegu por defeutu ye en primer persona, magar que los xugadores tienen la posibilidá de camudalo a tercer persona.[5] El xuegu centrase nel asitiamientu y desanciu de bloques, siendo oxetos tridimensionales cúbicos, asitiaos sobro un patrón de rexáu fixu. Estos cubos o bloques representen principalmente estremaos elementos de la ñatura, como tierra, piedra, minerales, tueros d'un árbol, ente otros.[6] Los xugadores son llibres de movese pela so redolada y modificala per aciu la creación, recoleición y tresporte de los bloques que componen el xuegu, que namái puen asitiase respetando'l rexáu fixu del xuegu.[6][7]

Al entamu del xuegu, el xugador alcuéntrase nun mundiu xeneráu per aciu d'un algoritmu, lo que fai qu'esti sía infinitu y enxamás se xeneren dos mundios iguales.[8] El xugador ye llibre de movese pel tarrén, constituyíu por estremaos biomes, ente los que s'alcuentren ermos, sabanes, selves, océanos, viesques, tundres, etc.[8][9][10] El xuegu tien el so propiu ciclu de tiempu de día y nueche, siendo qu'un día nel xuegu equival a 20 minutos na realidá.[6]

El xuegu tamién inclúi animales y personaxes non xugables, denomaos nel so conxuntu como creatures (mobs n'inglés). Estes creatures puen ser pacífiques, como los gochos, caballos, pites, oveyes, etc. de los que'l xugador pue consiguir alimentu y recursos cenciellamente; pero tamién apaecen nel xuegu creatures fosqueres, como muertos vivies, arañes xigantes, cadarmes, etc., que namái apaecen na nueche o en zones escures. Ente estes creatures alcuéntrense tamién, los crípers, qu'españen al tar cierca'l xugador, creatures neutrales como los Homes d'Ender, que puen recoyer bloques y teletresportase, ya incluso Xefes (bosses n'inglés) como'l Wither. Tamién hai animales que puen trallase como'l llobu y creatures que puen invocase como'l gólem y gólem de ñeve

El mapeáu nun se xenera por completu simultáneamente, sinón que ta dividíu en chunks («cachos» traducíu lliteralmente al asturianu, pero ensin adautación oficial) de 16 × 16 bloques n'horizontal (según el valor afitáu nos axustes). Los chunks cercanos al xugador cárguense na memoria. A midida qu'esti muévese, xenérense y amiéstense chunks nuevos al mapa.[11]

Moos de xuegu[editar | editar la fonte]

Sobrevivencia[editar | editar la fonte]

El mou sobrevivencia (survival n'inglés), básase na vida real al empar d'un poco de fantasía y trátase de la sobrevivencia d'alimentase y al ataque de les múltiples creatures que xurden na escuridá o de nueche. La aguantadera máxima que tienen los personaxes ye de 10 corazones, (20 puntos de salú).

Abegosu[editar | editar la fonte]

El mou abegosu (hardcore n'inglés), ye idénticu al mou sobrevivencia y a la dificultá en difícil, cola esceición de que tres la muerte del xugador desaníciase'l mundiu xeneráu

Creativu[editar | editar la fonte]

El mou creativu (creative n'inglés), céntrase dafechu nel aspeutu de la construcción llibre. Los xugadores tienen un suministru illimitáu de tolos bloques y oxetos del xuegu, que puen asitiar y desaniciar nel intre. Amás, nun son atacaos poles creatures polo que nun puen recibir dañu, (inda puen morrer cayendo al vaciu) y puen esnalar llibremente pel mundiu. Nesti mou nun puen rompese bloques con una espada de cualesquier material, (esto sirve pa nun destruyir l'entornu cuando'l xugador golpia o ataca).

Los mos de xuegu puen camudase per aciu los comandos /gamemode survival (pa sobrevivencia) /gamemode creative (pa creativu) o simplemente /gamemode 1 y /gamemode 0.

Nes primeres versiones preliminares de Minecraft, l'únicu mou de xuegu disponible yera similar al creativu actual. En particular, la versión clásica (que yá nun recibe anovamientos) entá pue xugase de baldre dende'l restolador.[1]

Venturiega[editar | editar la fonte]

El mou venturiega (adventure n'inglés), ta destináu a los xugadores que se dediquen a crear mapes pa usuarios que deseyen xugar en llinia o solos, esti mou de xuegu básase nos criterios de darréu qu'afeuten al xugador en distintos sentíos:

  • El xugador namái pue romper un bloque si tien la ferramienta afayadiza.
  • En delles versiones la dificultá nun pue camudase.
  • El xugador tien de dir per un camín predefiníu pol ceador del mapa (opcional).

Espeutador[editar | editar la fonte]

Nun ye un mou de xuegu como los anteriores, sinón un mou destináu a partíes y sirvidores en llinia u'l xugador sedrá cuasi invisible. Esti mou de xuegu permitirá al xugador poder ver como espeutador a los otros xugadores nun mapa de sobrevivencia u otros moos de xuegu, teniendo na barra d'atayos (hotbar n'inglés) un menú cenciellu pa poder cambiar de xugador ente otres coses. Introdúxose nes versiones beta de la versión 1.8 y pue actívase con /gamemode 3.

Moos de xuegu personalizaos[editar | editar la fonte]

Dellos usuarios o desendolcadores anímense a crear los sos moos de xuegu propios y aplíquenlos nos sirvidores o mapes de venturiega pa xugar nel mou Un xugador, pero por embargu, estos moos de xuegu suelen vese poco y la mayoría de los sirvidores modifiquen delles estensiones pa faer paecer que tienen un mou de xuegu personalizáu.

Tribes de mundios[editar | editar la fonte]

El mundiu principal (The Overworld)[editar | editar la fonte]

La triba de mundiu onde s'entama y asoceden la mayoría de socesos nel xuegu. Nél puen xenerase creatures seles, fosqueres (sobre manera pela nueche), o neutrales

La fin (The End)[editar | editar la fonte]

Ye la dimensión na qu'apaez el Cuélebre d'Ender (Ender Dragon n'inglés) y onde habiten los Homes d'Ender (Endermen n'inglés). Esta dimensión ta formada por namái dos tribes de bloques formando una islla: obsidiana (obsidian n'inglés) en forma de pilares con Cristales d'Ender (Ender Crystals n'inglés) enriba, y por un bloque non xenerable nomáu Piedra de la Fin (End Stone n'inglés). Si amorties al Cuélebre d'Ender, arriendes de ganar muncha esperiencia y poder tornar al mundiu pincipal, verás los créitos del xuegu.

Como curiosidá sábese que nes versiones tempranes del xuegu esti mundiu diba ser perdistintu de como lo ye anguaño, de fechu primiendo la tecla F3 podía vese na información de depuración el nome antiguu que se-y diba dar, The Sky (El cielu n'asturianu)

L'infiernu (The Nether)[editar | editar la fonte]

Triba de mundiu onde se xeneren Marmoques infernales (Ghasts n'inglés), Animes del Fueu (Blazes n'inglés) y Homes-gochu vivientes (Pigmen n'inglés). Nesta dimensión l'agua nun pue asitiase porque se vaporia, amás ye l'únicu llugar onde pue alcontrase cuarzu (quartz n'inglés).

Tribes de creatures[editar | editar la fonte]

Seles[editar | editar la fonte]

Gochos: Creatures que namái s'empleguen pa consiguir alimentu. Xenérense de mou natural, suelten chuletes de gochu crudes al morrer y si muerren amburaos suelten la comida cocinada. Na versión de PC críense con cenahories, pero na versión Pocket con pataques y remolaches.

Oveyes: Creatures que namái s'empleguen pa consiguir alimentu. Xenérense de mou natural, suelten corderu crudo y llana al morrer, y si muerren amburaos suelten la comida cocinada. Al emplegar les tisories puen tosquilase ensin falta d'amortiles darréu que la so llana rexenérase de mou natural. Si se tiñe una oveya con dalguna color, puen consiguise oveyes de colores qu'al faceles criar con otres saldrán corderos d'eses colores combinaes. Crien con trigu.

Vaques: Creatures que namái s'empleguen pa consiguir alimentu. Xenérense de mou natural, suelten filetes crudos y cueru al morrer, y si muerren amburaos suelten la comida cocinada. Puen criase con trigu.

Vaques-fungu: Xenérense de mou natural namái nel bioma Mushroom Island (Islla de fungos n'asturianu). Puen criase con trigu y con una escudiella "muciles". Si se "tosquila" una "Vaca-fungu" tresformaráse nuna vaca normal, polo que nun habrá mou de devolvela al so estáu orixinal.

Caballos: Creatures que namái s'empleguen pa consiguir cueru. Con una Siella pa montar el xugador pue montalos. Críen con Mazanes d'oru y cenahories.

Pullos: Creatures que namái s'emplegen como animales de tresporte y carga, y que puen montase con una Siella pa montar. Pa facelos animales de carga namái fai falta amesta-yos un bagul.

Pitos/Pites: Triba de creatura que namái s'emplega pa consiguir alimentu. Xenérense de mou natural y puen criase con semiente normal. Al morrer suelten pitu crudo y si muerren amburaos suelten la comida cocinada.

Coneyos: Creatura que se xenera de mou natural y que pue criase con cenahories. Al morrer suelten coneyu crudo, cueru de coneyu y pie de coneyu, y si muerren amburaos suelten la comida cocinada.

Calamares: Creatures que nun faen nada, nin siquier al atacalos. Xenérense de mou natural nos llugares con agua. Al morrer suelten fardela de tinta.

Esperteyos: Son creatures que nun faen nada, nin siquier al atacalos. Xenérense de mou natural nes cueves. Nun puen criase y al amortilos namái suelten esperiencia.

Ocelotes: Creatures que se xeneren de mou natural y que puen criase con toa tirba de pexes crudos. Al morrer namái suelten esperiencia. Ataquen a los crípers de mou automáticu. Pa tresformalos en muxos namái hai que da-yos cualesquier triba de pexe crudo

Xaldos: Creatures que se xeneren nos puleos de mou natural y s'empleguen pa comerciar. Al amortilos nun suelten nada. Si los ataques o fuxen del personax o defendense.

Neutrales[editar | editar la fonte]

Gólems de fierro: Creatura que tien de xenerase y que si ta cerca d'un pobláu, protexerá a los xaldos de cualesquier amenaza. Si'l xugador lu ataca, volverase fosqueru hasta que nun lu vea. Al morrer puen soltar una flor y llingotes de fierro

Homes d'Ender: Estes creatures tienen la capacidá de teletresportase y pañar bloques. Pa lluchar escontra ellos el xugador tien de miralos direutamente o face-yos xestos. Xenérense de mou natural y nun puen tocar l'agua porque-yos fai dañu, de fechu col lloviu nun paren de teletresportase fasta qu'algamen un llugar secu y ensin lloviu.

Homes-gochu vivientes: Alcuéntrense nel Infiernu o nel Mundiu principal si hai un portal al Infiernu cierca. Nun ataquen a nun que'l xugador lo faiga. Xenérense de mou natural nel Infiernu o si-yos da un rayu a los gochos.

Llobos: Creatures que se xeneren naturalmente y que si'l xugador los ataca, vendrán toos en manada a defendese. Puen trallase pa llevalos de caza y ataquen de mou automáticu a les Cadarmes.

Fosqueres[editar | editar la fonte]

Muertos vivientes: Estes creatures escuerren al xugador y el so mou d'atacar ye golpiándolu. Xenérense de mou natural (con o ensin armadura o armes), o cuando intenten amortir a un Xaldu. Un Xaldu tresformáu en muertu viviente pue volvese Xaldu de nueves.

Cadarmes: Creatures que namái ataquen emplegando'l so arcu. Xenérense de mou natual (con armadura y arcu encantexáu o non). Al morrer suelten güesos, fleches y un arcu dañáu.

Crípers: Escuerren al xugador y el so mou d'atacar ye españando. Xenérense de mou natural.

Crípers llétricos: Igual que los Crípers, pero estos tienen un poder d'españíu mayor. Xenérense al da-y un rayu a un Críper normal.

Bruxes: Puen xenerase naturalmente o cuando a un Xáldu-y da un rayu. P'atacar usen brebaxes chisgadores y tienen la capacidá de defendese recuperando vida o tomando dalguna poción de resistencia.

Guardianes: Son creatures somarines qu'atacarán a cualesquier creatura que se-yos avere. Al sacalos del agua nun muerren ya intentarán de guetar un mou de volver al so habitat. Ente los guardianes, esiste un guardian más grande que ye tamién ún de los xefes del xuegu.

Cuélebre d'Ender: Ye'l xefe "final" del xuegu y que p'amortilu han rompese los Cristales d'Ender que tán enriba de los pilares d'obsidiana.

Pexes d'Ender: Apaecen namái cuando los Homes d'Ender se teletresporten o cuando'l xugador usa una Perlla d'Ender, amás tamién puen metese en delles tribes de bloques, como los Llepismes. Tienen ente un 5% y un 15% de posibilidaes d'apaecer.

El Coneyu asesín: Esta creatura namái pue xenerase pente comandos y ye mui poderosa *. Ataca al xugador automáticamente.

Wither: Ye un de los nomaos xefes. Esta creatura esnala, ye mui poderosa y pue mete-y al xugador l'efeutu "Escayedura". Al morrer suelta la Estrella infernal (Nether Star n'inglés).

Llepismes: Namái s'alcuentren metíos dientro de los bloques de piedra. Al apaecer atacarán direutamente al xugador.

Ánimes del fueu: Creatures que namái se xeneren nel Infiernu de mou xeneral o pente xeneradores. Nun puen tocar l'agua y disparen boles de fueu qu'amburen al xugador si les toca.

Suicides[editar | editar la fonte]

Gólems de ñeve: Estes creatures tienen d'invocase como'l Wither o'l Gólem de fierro, la so carauterística ye la de llanza-yos boles de ñeve (que nun faen dañu dalu) a les creatures fosqueres, convirtiéndolos asina en suicides.

Toes estes tribes de creatura suelten esperiencia quitante les creatures n'estáu bebé (ocelotes, llobos, coneyos, vaques, oveyes, pitos, pullos, caballos y gochos), y los xaldos.

Curiosidaes[editar | editar la fonte]

- Col oxetu "Etiqueta" pue nomase una oveya col nome "_Jeb" pa que camude los sos colores de mou continuu, faciendo asina como l'arcu la vieya.

Versión n'asturianu[editar | editar la fonte]

El videoxuegu ta tornáu pol grupu Tornes Ḷḷume qu'entamó colos llabores traducción el 2 d'avientu de 2013. La primer versión disponible del xuegu n'asturianu ye la 1.7.4.

Referencies[editar | editar la fonte]

  1. 1,0 1,1 Véase la reseña en Arribas, 2011
  2. 2,0 2,1 «Qué compra Microsoft al pagar 2.500 millones de dólares por el Minecraft». Consultáu'l 16 de setiembre de 2014.
  3. Gallegos, Anthony. IGN (ed.): «Minecraft Review — PC Review at IGN» (inglés). Consultáu'l 18 d'avientu de 2011.
  4. Romero, Josh. Video Games Blogger (ed.): «Minecraft Achievements Guied.» (inglés). Consultáu'l 3 de payares de 2012.
  5. Purchese, Robert. Eurogamer (ed.): «Minecraft 1.0 launch patch notes» (inglés). Eurogamer Network. Consultáu'l 23 de payares de 2011.
  6. 6,0 6,1 6,2 Garvani, Stephen (payares de 2010). GamesRadar (ed.): «Minecraft (PC) Guide/FAQ». Future plc. Consultáu'l 15 d'avientu de 2012.
  7. Ashdown, Jeremy (payares de 2010). IGN (ed.): «Esto es Minecraft» (inglés). Consultáu'l 2 de xineru de 2013.
  8. 8,0 8,1 Miller-Watt, Josh. GamesRadar (ed.): «Minecraft beginner's guide» (inglés). Future plc. Consultáu'l 24 d'ochobre de 2012.
  9. Meer, Alec (octubre de 2010). Rock, Paper, Shotgun (ed.): «BiomeShock: The New Minecraft Worlds» (inglés). Consultáu'l 2 de xineru de 2013.
  10. Phillips, Tom (enero de 2012). Eurogamer (ed.): «Minecraft jungle biome, creatures coming soon» (inglés). Eurogamer Network. Consultáu'l 2 de xineru de 2013.
  11. Markus Persson (9 de marzu de 2010). «Generación del terreno (primera parte)» (inglés). The Word of Notch. Archiváu dende l'orixinal, el 13 de xunu de 2012. Consultáu'l 21 de payares de 2011.