Menkalinan

De Wikipedia
Saltar a navegación Saltar a la gueta
Menkalinan
Menkalinan A/B/C
Constelación Auriga
Ascensión reuta α 05h 59min 31,7s
Declinación δ +44º 56’ 51’’
Distancia 82,1 años lluz
Magnitú visual +1,90 (+2,56 / +2,80 / +14,1)
Magnitú absoluta -0,11 (conxunta)
Lluminosidá 51 / 44 / ? soles
Temperatura 9350 / 9200 / ? K
Masa 2,38 / 2,29 / ? soles
Radiu 2,76 / 2,57 / ? soles
Tipu espectral A1IV / A1IV / MV
Velocidá radial -18,2 km/s

Menkalinan (β Aurigae / β Aur / 34 Aurigae)[1] ye la segunda estrella más brillosa de la constelación d'Auriga, namái superada por Capella (α Aurigae). El so nome provién del árabe منكب ذي العنان (mankib ðī-l-‘inān), «el costazu del cocheru».

Menkalinan ye un sistema estelar asitiáu a 85 años lluz del Sistema Solar. Los dos componentes principales, Menkalinan A y Menkalinan B, formen una binaria espectroscópica eclipsante, que'l so rellumu conxuntu bazcuya ente magnitú aparente +1,85 y +1,93 cada 47,5 hores, cuando una de les estrelles clisa parcialmente a la otra dende la perspectiva del observador terrestre. Por cuenta de la fuerte atracción gravitatoria, dambes estrelles tán aburuyaes y nun tienen forma esférica. Los dos son subxigantes de tipu espectral A1IV qu'empezaron a camudar, aumentando en rellumu, al escosar el so hidróxenu internu. Amodo tán abandonando la secuencia principal pa convertise en estrelles xigantes.[2]

Anque bien asemeyaos, les dos estrelles nun son idéntiques. Menkalinan A, con una temperatura efectivo de 9350 K, ye 51 vegaes más lluminosa qu'el Sol. Tien un radiu de 2,76 radios solares y una masa 2,38 vegaes mayor que la del Sol. Menkalinan B ye daqué más fría —9200 K— y relluma con una lluminosidá 44 vegaes mayor que la lluminosidá solar. El so radiu ye 2,57 vegaes más grande qu'el del Sol y tien una masa de 2,29 mases solares. La separación ente dambes estrelles ye de namái 17,60 ± 0,06 radios solares —0,08 UA—. Pa una metalicidá similar a la del Sol, la edá del sistema taría entendida ente 450 y 500 millones d'años.[3]

Una tercer estrella, Menkalinan C (CCDM J05596+4457P), paez orbitar alredor del brillante par AB. Ye una nana colorada de magnitú 14 que la so separación real cola binaria AB ye de siquier 330 UA. Dende ellí, el brillante par d'estrelles blanques apenes podría ser resueltu a simple vista.[2]

Menkalinan forma parte de la corriente d'estrelles de la Asociación estelar del sietestrellu.[4]

Referencies[editar | editar la fonte]