Melchor García Sampedro

De Wikipedia
Saltar a: navegación, buscar

Melchor García Sampedro tamién conocíu como San Melchor de Quirós (Ḷḷindes, 28 d'abril de 1821 - Nam-Dinh, Vietnam, 28 de xunetu de 1858) foi un obispu dominicu y el primer santu asturianu.

Biografía[editar | editar la fonte]

Nació nel llugar de Cortes, parroquia de Ḷḷindes, (Quirós), el 28 d'abril de 1821, siendo bautizáu al día siguiente na ilesia parroquial de San Esteban de Cienfuegos. La so neñez trescurre nos pueblos de Cortes y Arroxo a onde se tresllada la so familia.

En 1835 estudia Filosofía y Teoloxía na Universidá d'Uviéu. Nomáu pol Cabildu catedraliciu profesor del colexu diocesanu San Xosé, dexa la docencia y ingresa na Orden de Santu Domingo, con intención de ser misioneru nel Oriente, tomando los hábitos nel conventu d'Ocaña (Toledo), el 16 d'agostu de 1845.

Ordenáu sacerdote n'avientu de 1847 en Madrid, embarca en Cádiz na fragata Victoria'l 7 de marzu de 1848 y llega a Manila (Filipines), el so primer destín, el 25 de xunetu del mesmu añu. Nomáu llector de Filosofía nel colexu de Santu Tomás de la capital filipina, sólo lu desempeña hasta'l mes d'ochobre del citáu añu, embarcando entós rumbu a Macáu con destín a les misiones de Tung-Kin o Tonkín (Vietnam), onde llega en febreru de 1849. Allí tuvo estudiando la so cultura y dedicáu al serviciu pastoral.

Daes les sos notables cualidaes pal ministeriu y el gobiernu, bien ceo ye eleváu al serviciu de vicariu del grupu de misioneros, y el 16 de setiembre de 1855 l'obispu P. Sanjurjo conságralu obispu de Tricomía en Bui-Chu.

En perfecta armonía col so proyectu ministerial, entrégase al cuidao, formación y santificación de los fieles, dando con ello ocasión a ser públicamente conocíu y perseguíu pol emperador Tu Duc que decretara escontra los cristianos.

Depués de ser executáu monseñor Sanjurjo, García Sampedro, el so sucesor, ye deteníu'l 8 de xunetu de 1858 en Kieu-Lao y conducíu cargáu de cadenes a Nam-Dinh, capital de la provincia, onde lu someten a tormentos, tortures y tentaciones. Pero nun reniega de la so fe, polo que ye despedazáu públicamente'l día 28 del mesmu mes y añu.

Repatriaos trenta años depués los sos restos a Uviéu, onde se celebren solemnes honres fúnebres el 28 y 29 d'abril de 1889, son treslladaos a la capiella del Rei Castu de la catedral.

El papa Píu XII decláralu beatu'l 29 d'abril de 1951, depués d'un procesu de beatificación que tuvo llargu tiempu paráu y foi promovíu, cuasi un sieglo depués de la so muerte, pol maestru xeneral de la Orden, frai Manuel Suárez. Finalmente, ye proclamáu santu, xunto con otros mártires del Vietnam, el día 19 de xunetu de 1988 pol papa Xuan Pablu II.

Nel añu 1895, el poeta asturianu Teodoro Cuesta asoleyó la obra El Protomártir asturiano Fr. Melchor García Sampedro, que sería reeditada pola Academia de la Llingua Asturiana en 1988 na coleción Llibrería facsimilar col númberu 3.

Enllaces esternos[editar | editar la fonte]