Mary Somerville

De Wikipedia
15-03-2021 16:15
Mary Somerville
Vida
Nacimientu Jedburgh[1], 26 d'avientu de 1780[2]
Nacionalidá Bandera del Reinu Xuníu Reinu Xuníu de Gran Bretaña ya Irlanda
Muerte Nápoles[3], 28 de payares de 1872[4] (91 años)
Sepultura English Cemetery, Naples (en) Traducir
Familia
Padre William George Fairfax
Madre Margaret Charters
Casada con Samuel Greig (1804 – m. 1807)[5]
William Somerville (1812 – m. 1860)[6]
Fíos/es
Estudios
Llingües falaes inglés[7]
Profesora de Ada Lovelace
Oficiu matemática, escritora, científica, física, xeóloga
Premios
Miembru de Sociedá Filosófica Americana
Royal Astronomical Society (es) Traducir
Academia Pontaniana (es) Traducir[9]
Sociedad de Física e Historia Natural de Ginebra (es) Traducir[10]
Real Academia de Irlanda (es) Traducir[11]
Cambiar los datos en Wikidata

Mary Fairfax Greig Somerville (26 d'avientu de 1780, Jedburgh – 28 de payares de 1872, Nápoles) foi una matemática, astrónoma y científica escocesa autodidacta.[12][13] Ye citada davezu como "La Reina de les ciencies del sieglu XIX".[14]

Semblanza[editar | editar la fonte]

Mary Somerville
Medaya conmemorativa de Mary Somerville

Mary yera fía de William George Fairfax (oficial naval, qu'aportó a vicealmirante) y de la so segunda esposa Margaret Charters. El llar de la familia taba en Burntisland, nel condáu de Fife (Escocia). Foi la quinta de siete fíos, pero trés d'ellos morrieron bien mozos. A los sos dos hermanos varones dióse-yos una bona educación, pero a les moces malpenes se-yos enseñó a lleer. Sicasí, con diez años foi mientres un añu al colexu, y cuando retornó a la so casa, espertóse-y la pasión pola llectura. A pesar del enfotu de los sos padres por que s'adomara nes xeres doméstiques nuna escuela de señorites, cuntó col sofitu d'un de los sos tíos que l'animó por que deprendiera llatín.[12]

Cuando tenía unos trelce años, la familia treslladóse a Edimburgu, onde siguió coles sos clases pa completar la so formación como dama de clase alta, incluyendo costura, lleiciones de pianu o pintura. Foi'l so profesor de pintura, Alexander Nasmyth, quien la empecipió nel estudiu de les matemátiques, al decatase del interés de la moza polos Elementos d'Euclides cuando desplicaba un problema de perspeutiva a ún de los sos alumnos.[12] A partir d'esi momentu, la moza Mary dedicóse con gran interés al estudiu de l'álxebra nos llibros que-y facilitaba'l tutor del so hermanu anque ensin desdexar la so vida social pa satisfaer a los sos padres, nuna dómina na que les aspiraciones de les moces teníen de centrase en consiguir un bon home que-yos apurriera seguridá.

Casó en 1804, cuando tenía 24 años. El so home, Samuel Greig, yera un oficial naval que nun llegó a entender la pasión de la so muyer poles matemátiques. Mary quedó vilba a los trés años, cuando yá yera madre de dos fíos. Volvió dende Londres a Escocia, onde al traviés del profesor John Playfair entró en contautu col matemáticu William Wallace, col que collaboró na resolución de dellos problemes, polo que foi gallardoniada con una medaya de plata.[12]

En 1812 casó en segundes nupcies con William Somerville (inspeutor d'hospitales) qu'entendió y sofitó'l so interés pola ciencia. Pasó a morar n'Edimburgu, au amplió'l so círculu d'amistaes ente los científicos de la universidá, lo que-y fixo interesase por nueves disciplines, como la llingua griega, la botánica o la xeoloxía.

En 1814 finaron la so fía mayor y l'únicu fíu del so segundu matrimoniu, treslladándose la familia a Londres en 1816 cuando'l so home foi nomáu Inspeutor de la Xunta Médica del Exércitu, lo que-y facilitó ser escoyíu miembru de la Royal Society. Esta circunstancia fixo dable que col tiempu figuraren ente los sos amigos destacaos científicos, como George Airy, John Herschel, William Herschel, George Peacock o Charles Babbage, y que pudieren entrar en contautu con relevantes figures de la ciencia europea que visitaben la Sociedá de Londres, como Biot, Arago, Laplace, Poisson, Poinsot, o Émile Mathieu.[12]

En 1827, Lord Brougham fixo una solicitú en nome de la Sociedá pal Espardimientu de Conocencia Útil por que Mary Somerville traduxera La Mecánica Céleste de Laplace. Mary nun se llindó a vertir el testu del francés al inglés, sinón que dio una completa esplicación de les bases matemátiques usaes por Laplace, que daquella aínda nun s'espublizaren ente los científicos de Gran Bretaña. La traducción del llibru tuvo un gran ésitu de ventes, y recibió numberosos enponderamientos.[12]

En 1832 y 1833 moró un tiempu en París, au estrechó los sos llazos colos científicos franceses, y trabayó nel so siguiente llibru, "The connection of the physical sciences" (La conexón de les ciencies físiques), espublizáu en 1834. El so analís de les perturbaciones de la órbita d'Uranu incluyíu na sesta edición del llibru (1842), ye l'orixe de la investigación del astrónomu John Couch Adams que llevó al descubrimientu de Neptunu en 1846.[12]

Nel so círculu familiar yera frecuente la presencia de Lady Byron y de la so fía Ada Lovelace, a quien Mary Somerville sirvió d'estímulu pal estudiu de les matemátiques exerciendo mientres un tiempu como tutora y mentora.[15]

A partir de 1838, los problemes de salú de William Somerville llevaron al matrimoniu a treslladase a vivir nel sur d'Italia, a la gueta d'un clima meyor. El so home finaría en 1860. Mientres los 34 años que moró n'Italia, Mary espublizó obres matemátiques (qu'influyeron nos trabayos de James Clerk Maxwell), según el so "Physical geography" (Xeografía física) (1848), tratáu que siguió vixente hasta bien entráu'l sieglu XX.[12]

Foi una de les muyeres del so tiempu que con más pasión se dedicó al estudiu de les matemátiques y a la conocencia de les meyores científiques nuna dómina na que les muyeres apenes tenía accesu a la ciencia y na que les educaba pa ser primero de too esposes y madres. Popularizó l'astronomía y escribió un bon ensame d'ensayos. El so estilu, rigorosu y didáuticu, apurrió-y gran ésitu. Somerville foi escoyida pa la Real Sociedá Astronómica en 1835 (al empar que Caroline Herschel). Miembru honorariu de la Société de Physique et d'Histoire Naturelle de Genève en 1834, esi mesmu añu pasó a formar parte de la Real Academia d'Irlanda. Asina mesmu, en 1857 foi nomada miembru de la Sociedá Estauxunidense de Xeografía y Estadística y de la Sociedá Xeográfica Italiana en 1870. En 1869 foi gallardoniada cola Medaya d'Oru de la Royal Geographical Society[16] (conocida como "Medaya Victoria").[17] Tamién foi escoyida pa l'American Philosophical Society.[18]

Nos últimos díes de la so vida escribió: "Tengo 92 años..., la mio memoria pa los acontecimientos ordinarios ye feble, pero non pa les matemátiques o les esperiencies científiques. Inda soi capaz de lleer llibros d'álxebra cimera mientres cuatro o cinco hores pela mañana, ya inclusive de resolver problemes".

Finó en Nápoles en 1872. El Somerville College de la Universidá d'Oxford caltién viva la memoria del so llegáu dende 1879.[19]

Obra[editar | editar la fonte]

Biblioteca del Somerville College, Oxford
  • The Magnetic Properties of the Violet Rays of the Solar Spectrum.
  • Ensayos sobre la Refraición de los rayos solares.
  • Aición de los rayos solares sobre zusmios vexetales.
  • Esperimentos na tresmisión de los rayos químicos del espectru solar en distintos medios.
  • 1834 - La conexón de les ciencies físiques.
  • 1848 - Xeografía física.
  • 1869 - De la ciencia molecular y microscópico.
  • De la teoría de les diferencies.
  • Traductora de "La Mecánica Celeste" de Laplace.

Eponimia[editar | editar la fonte]

Ver tamién[editar | editar la fonte]

  • Somerville, Martha. Personal Recollections, From Early Life to Old Age, of Mary Somerville. Boston: Roberts Brothers, 1874. Reimpresión en AMS Press (xineru 1996), ISBN 0-404-56837-8.
  • Neeley, Kathryn A. Mary Somerville: Science, Illumination, and the Female Mind, Cambridge & New York: Cambridge University Press, 2001.

Otros artículos[editar | editar la fonte]

  • La ciencia tien nome de muyer.

Notes y referencies[editar | editar la fonte]

  1. ↑ Afirmao en: The Feminist Companion to Literature in English. Páxina: 1006. Autor: Virginia Blain. Llingua de la obra o nome: inglés. Data d'espublización: 1990.
  2. ↑ Afirmao en: MacTutor History of Mathematics archive. Data de consulta: 22 agostu 2017.
  3. ↑ Afirmao en: The Feminist Companion to Literature in English. Páxina: 1007. Autor: Virginia Blain. Llingua de la obra o nome: inglés. Data d'espublización: 1990.
  4. ↑ Afirmao en: SNAC. Identificador SNAC Ark: w62j6qzg. Apaez como: Mary Somerville. Data de consulta: 9 ochobre 2017. Llingua de la obra o nome: inglés.
  5. ↑ URL de la referencia: http://www-history.mcs.st-andrews.ac.uk/Biographies/Somerville.html.
  6. ↑ URL de la referencia: https://womensbios.lib.virginia.edu/featured%3fid=MARY_SOMERVILLE.html.
  7. ↑ Biblioteca Nacional de Francia. «autoridaes BNF» (francés). Consultáu'l 10 ochobre 2015.
  8. ↑ Afirmao en: Gold Medal Recipients. Autor: Royal Geographical Society. Editorial: Royal Geographical Society. Llingua de la obra o nome: inglés. Data d'espublización: 2022.
  9. ↑ Autor: Elisabetta Strickland. ISBN-10: 978-3-319-49192-9. Páxina: 67. Títulu: The Ascent of MarySomerville in 19th Century Society.
  10. ↑ «Mister Mary Somerville: Husband and Secretary» (3 agostu 2020).
  11. ↑ «Mister Mary Somerville: Husband and Secretary (English)» (3 agostu 2020).
  12. ↑ 12,0 12,1 12,2 12,3 12,4 12,5 12,6 12,7 O'Connor, John J.; Robertson, Edmund F., «Mary Somerville» (n'inglés), MacTutor History of Mathematics archive, Universidá de Saint Andrews, http://www-history.mcs.st-andrews.ac.uk/Biographies/Somerville.html .
  13. ↑ Mary T. Brück, Mary Somerville, mathematician and astronomer of underused talents, en: Journal of the British Astronomical Association, vol.106, non.4, 201–206.
  14. ↑ Alic, Margaret (1986). The Women's Press: Hypatia's Heritage: A History of Women in Science from Antiquity to the Late Nineteenth Century. ISBN 0-7043-3954-4.
  15. ↑ Zafra, Remedios (2013). «Formaciónː Tiempo propios y tiempos de muyeres (Mary Somerville).», (h)adas. Muyeres que crean, programen, prosumen y teclean.. Páxines d'Espluma, páx. 89.
  16. ↑ «Gold Medal Recipients». Royal Geographical Society. Archiváu dende l'orixinal, el 27 de setiembre de 2011. Consultáu'l 19 d'abril de 2015.
  17. ↑ Freeman, T. W. (1966), «Baker, J.N.L. The history of geography», Cahiers de géographie du Québec (Erudit) 10 Non 20: p. 352, http://www.erudit.org/revue/cgq/1966/v10/n20/020647ar.pdf, consultáu'l 26 de xunu de 2009 
  18. ↑ Oughton, M. (1978), Freeman, T. W; Oughton, M.; Pinchemel, P., eds., «Mary Somerville, 1780–1872», Geographers: biobibliographical studies (London and New York: Mansell) 2: pp. 109–11 
  19. ↑ «Mary Somerville» (inglés). Encyclopedia.com. Consultáu'l 26 de xunetu de 2017.
  20. ↑ «Somerville» (inglés). Gazetteer of Planetary Nomenclature. Flagstaff: USGS Astrogeology Research Program.
  21. ↑ Lutz D. Schmadel. «Dictionary of Minor Planet Names» (inglés). Springer Science & Business Media, 2013. Consultáu'l 26 de xunetu de 2017.
  22. ↑ Web de jpl. «(5771) Somerville».
Sacáu de «https://ast.wikipedia.org/w/index.php?title=Mary_Somerville&oldid=3989547»