Luis López-Dóriga

Luis López-Dóriga
diputáu nes Cortes republicanes
canon (en)
Vida
Nacimientu	Uviéu, 23 de febreru de 1885
Nacionalidá	España
Muerte	Méxicu, 1965 (79/80 años)
Sepultura	Spanish Pantheon of Mexico (en)
Estudios
Llingües falaes	castellanu; francés; inglés; italianu; portugués; llatín; catalán
Oficiu
Oficiu	sociólogu, sacerdote católicu, filósofu, políticu, teólogu
Llugares de trabayu	Madrid y Granada
Emplegadores	Universidá de Granada
Miembru de	Exploradores de España (en)
Creencies
Relixón	Ilesia Católica
Partíu políticu	Partíu Republicanu Radical Socialista

Luis López-Dóriga Meseguer (23 de febreru de 1885, Uviéu – 1965, Méxicu) foi un sacerdote, teólogu, filósofu, sociólogu y políticu asturianu, sobrín del arzobispu de Granada José Meseguer y Costa y tíu del periodista Joaquín López-Dóriga^[1].

Biografía

Yera fíu d'Hilaria Meseguer Costa, de Vinaròs, y del médicu municipal López-Dóriga, del que pronto quedó güérfanu. La madre yera hermana del clérigu José Meseguer y Costa, qu'en 1905 foi nomáu arzobispu de Granada en sustitución de José Moreno Mazón. A Granada acompañó Luis al so tíu a los 20 años como «familiar» o persona de confianza, y foi desempeñando otros cargos y destinos na archidiócesis, llegando inclusive a profesor del Seminariu y vicecanciller de la so Universidá Pontificia. Estudió teoloxía y foi ordenáu sacerdote en 1908, siendo nomáu canónigu de la Catedral de Granada pol so tíu. Viaxó per Europa, onde realizó estudios de socioloxía n'Alemaña, llegando a dominar el francés, inglés, italianu, portugués, llatín y catalán. Yera doctor en filosofía, teoloxía y dambos derechos, maestru nacional, académicu de Belles Artes y profesor de socioloxía na Universidá Pontificia de Granada.

Creó centros obreros y el diariu La Gaceta del Sur. Tres la muerte del so tíu y principal sofitu'l 9 d'avientu de 1920, foi sustituyíu en 1921 pol obispu d'Almería Vicente Casanova y Marzol, quien dende entós vetó toles sos iniciatives. Manuel Azaña atraxo a López-Dóriga a la política. En 1922, apoyó a los obreros de la lletricidá y del gas en fuelga y a los tipógrafos de Gaceta del Sur, diariu católicu nel que exercía como conseyeru delegáu. D'esta forma perdió la confianza del cardenal Casanova, anque llegó a ser deán de la catedral gracies a la influyencia del duque de San Pedro de Galatino. En 1929 apoyó la creación del muséu de la Catedral de Granada.

Durante la II República foi diputáu en Cortes pol Partíu Republicanu Radical Socialista (PRRS) ente 1931 y 1933, fechu insólitu y complicáu pa un sacerdote destacáu, lo que-y valió penalidaes y sanciones canóniques por apoyar, a la so manera, diverses lleis que nun coincidíen col sentir y enseñances de la Ilesia: defendió col so votu la separación Ilesia-Estáu y el divorciu, lo que-y costó ser suspendíu a divinis, la perda del so cargu canónicu (1931) y la escomunión (1933). Tres dexar les Cortes, fizo oposición pa maestru na Escuela Normal de Granada. Una maestra, Josefina Roca-Fava, enamoróse d'él y casáronse; sobre ello escribió la escritora Stella Manaut. Durante la guerra civil pasó de Madrid a Valencia y ayudó a munches persones como cónsul honorariu en Perpignan (Francia) antes d'exiliase a Veracruz (Méxicu) y dempués a Méxicu capital.^[2]

En 1947, López-Dóriga, a pesar de tar escomulgáu, fiel a los sos principios católicos, dirixóse a Balbino Santos Olivera, arzobispu de Granada, pidiéndo-y permisu pa regresar. L'arzobispu perdonólu, pero negó-y el permisu.^[3] Luis López-Dóriga siguió viviendo en Ciudad de Méxicu, domiciliáu a principios de los años sesenta na cai Villalongin númberu 46, departamentu 7, hasta'l so fallecimientu en 1965 a los 80 años d'edá.^[4]

Referencies

↑ López Lacárcel, José María (2012). ASDE: Huellas, cien años de Scouts de España, páx. 69.
↑ Los curas republicanos que Franco asesinó y que la Iglesia quiere condenar al olvido
↑ Morillas Brandy, J. Antonio (2002), Luis López-Dóriga, el Deán republicano de Granada. Ed. Comares, ISBN 9788484445371, p. 143.
↑ Leandro Álvarez Rey (2009), Los diputados por Andalucía de la Segunda República, 1931-1939, diccionariu biográficu, Tomu 2, Centro de Estudios Andaluces (ed.), p. 372.

Enllaces esternos

[Huellas-1] López Lacárcel, José María (2012). ASDE: Huellas, cien años de Scouts de España, páx. 69.

[2] Los curas republicanos que Franco asesinó y que la Iglesia quiere condenar al olvido

[3] Morillas Brandy, J. Antonio (2002), Luis López-Dóriga, el Deán republicano de Granada. Ed. Comares, ISBN 9788484445371, p. 143.

[4] Leandro Álvarez Rey (2009), Los diputados por Andalucía de la Segunda República, 1931-1939, diccionariu biográficu, Tomu 2, Centro de Estudios Andaluces (ed.), p. 372.

[1]

[2]

[3]

[4]