Los Archiduques

De Wikipedia
Saltar a navegación Saltar a la gueta

Los Archiduques fueren el principal conxuntu asturianu de Rock na década de los 60, igüáu en Grau en 1963. Pesie a que fixeren discos per interesantes, los Archiduques pasaren a la historia de la música del Estáu Español por abellugar nes sos files a Tino Casal qu'axuntóse al grupu en 1967.

Historia[editar | editar la fonte]

En 1963 seyes músicos mozos de Grau dan los sos primeros pasos. Bien ceo algamen convertise nel conxuntu más solicitáu del país y nun-yos falten actuaciones per toda Asturies.

En 1965 algamen trescender la Cordalera ya interesar al sellu Columbia col que graben el so primer EP: “Le Ciel, le Soleil et la Mer / Nunca Digas Adiós / Escucha mi Canción / Fui al Cristu” (Columbia, 1965). Un disco enllenu balaes y con un instrumental más o menos llariegu na so cuarta pista. Poco dempués sacarán un segundu discu dalgo más evolucionáu que’l anterior.

El verdaderu cambéu va llegar por casualidá. En 1967 viaxen a Madrid para grabar un nueu discu, pero el cantante afáyase gravemente enfermu. Nel momentu caberu llamen a un mozu d'Uviéu, José Celestino -Tino Casal- que daquella tenía diecisiete años y cantaba nos Zafiros Negros. Tanto yos gusta que ye ficháu de sópitu. El single en cuestión ye: “No le Ames / Lamento de Gaitas” (Columbia, 1967) y convertirase nel más reconocíu de tola so carrera.

N’esi momentu otros componentes del grupu son: Armando Pelayo (muérganu), Pedro Bastarrica (batería), Tony (guitarra de punteu), Claudio (guitarra rítmica) y Tito (baxu).

El discu nun ye un gran éxitu, pero óise abondo pa que Los Archiduques seyan riquíos fuera del país, asitiándose’n Madrid mientres 1968 y autuando davezu na capital del Estáu. Nesi añu apaéz un nueu cenciellu: “Dimensión en Sol Mayor / Quiero Volar muy Alto” nel que’l grupu apúntase a la psicodelia imperante.

El discu nun recibiere bones crítiques el grupu torna a Asturies decepcionaos. Daquella versionaben nos direutos dellos cancios de los hermanos Ryan, ente elles “Eloise”, que abondos años sero sedría ún de los grandes éxitos de Tino como solista.

Los Archiduques mantiénense n’activu hasta 1971 nel que la marcha de Tino acabaría por esfacer el grupu. Amás de Tino Casal, l'único que siguió metíu de llenu nes xeres musicales foi Pedro, que armó los estudios Eolo y dirixó les primeres grabaciones de Ilegales.

Discografía[editar | editar la fonte]

1965 Le Ciel, le Soleil, la Mer / Nunca Digas Adiós / Escucha mi Canción / Fui al Cristu. Los Archiduques. Columbia.

1966 Si mi Padre Fuese Rey / Un Día / Nunca más / Te He Perdido. Los Archiduques. Columbia.

1967 No le Ames / Lamento de Gaitas. Los Archiduques. Columbia.

1968 Dimensión en Sol Mayor / Quiero Volar muy Alto. Los Archiduques. Columbia

1970 La Princesa y El Juglar / Linda. Los Archiduques. Columbia.

1982 Lamento de Gaitas / María Luisa. Los Archiduques Sociedad. Fonográfica Asturiana