Llingua ghotuo
Ghotuo (tamién Otwa, Otuo) ye una llingua edoide de Nixeria falada nel Estáu d'Edo, principalmente nes árees Owan ya Akoko-Edo. Según datos de 1994, la llingua contaba con 9.000 falantes.
Forma parte de les llingües Yekhee dientro'l agrupación areal Centru-Norte nes llingües edoides. Estes pela so parte s'atopen dientro'l grupu Volta-Níxer, de les llingües atlántico-congoleses, en siendo estes últimes parte de la hipotetizada macrofamilia de llingües nixerocongoleses.
Gramática
[editar | editar la fonte]Morfoloxía del sustantivu
[editar | editar la fonte]Los sustantivos en Ghotuo tán compuestos por un prefixu y una raíz. Les raíces suelen consistir nes estructures "-V", "-CV", "- CVV", ya "-CVCV". Los prefixos consisten normalmente nes estructures "V-", "VV-", ya "CV-". En dambos tipos de morfema, "V" ya "CV" son les estructures más comunes. Los sustantivos col prefixu "u-" nel singular tienen un prefixu plural "i-" . Del mesmu mou, los sustantivos con un prefixu singular "o-" tienen un prefixu plural "i-" si la vocal de la raíz ye zarrada. Si la vocal nun ye zarrada, entós estos sustantivos tienen un prefixu “e-" nel plural. El prefixu "e-" tamién utilízase como prefixu plural si'l prefixu singular del sustantivu ye "ɔ-" y la vocal de la raíz nun ye zarrada.[1]
| Singular | Plural | Exemplu | Definición |
|---|---|---|---|
| u- | i- | ù-kì | lluna |
| o- | i- | ò-fì | buelga |
| o- | e- | ō-tíé | zreza |
| ɔ- | e- | ɔ-bè | enemigu, malváu |
| ɛ- | e- | ɛ-rùɛ | venáu, cérvidu |
| ɛɛ- | io- | ɛɛ-wè | nuez de cola |
| ɛɛ- | ee- | ɛɛ-kɛ ēē | güevu |
Los prefixos en Ghotuo nun tán determinaos puramente pola fonoloxía, defínense tamién pola clas gramatical del sustantivu.[1]
| Singular | Plural | Función | Exemplu | Definición |
|---|---|---|---|---|
| ɛɛ- | a- | partes del cuerpu | ɛɛ-ò | güeyu |
| a- | i- | (principalmente) oxetos fechos pol home | à-bì | una especie d’alfombra |
| a- | io- | à-mɛ | agua | |
| gha- | i- | inseutos ya paxarinos que s’atopen nes cases | ɡhā-hìhì | formiga |
| gha- | -io | utensilios ya animales | ɡhā-wà | perru |
| gho- | -i | ɡhò-kì | mercáu | |
| gho- | -e | ɡhō-bè | fueya, llibru |
Hai numberosos exemplos de sustantivos Ghotou con prefixos non empareyaos.[1]
| Prefixu | Exemplu | Definición |
|---|---|---|
| i- | ì-lhè | insultu |
| e- | ē-nhù | puré de ñame |
| ɛ- | ɛ-khɔ | vergoña |
| a- | à-fɛ | casa, llar |
| o- | ō-fà | avaricia |
| u- | ū-sɔ | cabeza |
| ghi- | ɡhì-kpō | frente |
| ɡha- | ɡhà-kpā | cabeza calva |
| gho- | ɡhō-ɛ | camín, carretera |
Los demostrativos fórmense emplegando prefixos. Por exemplu, el prefixu "ɔ-" utilízase cuando se refier a una entidá singular, mientres que "è-" emplégase pa entidaes en plural. La prefixación en Ghotuo úsase pa marcadores de concordancia; tolos sustantivos singulares comparten el mesmu marcador de concordancia, y al mesmu tiempu tolos sustantivos plurales comparten el so mesmu marcador. En dellos casos, la prefixación pue usase pa tresformar un verbu nun sustantivu astrautu. El verbu "ɟâ," que significa "rir", pue tresformase en "ē-ɟà", que significa “risa”, emplegando prefixos. Los sustantivos d’estáu tamién puen ser formaos emplegando'l prefixu "ɔnhi-" a un verbu d’estáu. La pallabra "obi," que significa "escuridá," pue tresformase a "ɔnhōbì", que significa "daquién o daqué negru". A vegaes, esti prefixu tamién pue aplicase a un alverbiu non ideófonicu. Por exemplu, "dùkɛ", que significa "curtiu", pue tresformase en "ɔnhī dùkɛ", esto ye "daquién o daqué baxu, curtiu". Los sustantivos tamién puen derivase de verbos n’oraciones de relativu. En Ghotuo, los verbos interactúen colos sustantivos pa formar el locativu. Si s’emplega como prefixu un conxuntu específicu de trés partes del cuerpu a otru sustantivu de llugar, se puen crear cláusules más complexes en Ghotuo. Estes partes del cuerpu son ūsɔ (mhì), que significa "cabeza", ūdò, que significa "estómagu", ya àvɔ, que significa "piernes". Un exemplu ye "ūdóvbàɡhì", que significa "dientro'l cuartu".[1]
La pallabra "ɔnhī" pue usase dacuando pa indicar los oríxenes d'una muyer casada. Por exemplu, la fras "ɔnhī ɣɔnhíɣõ" significa "una muyer Yoruba". La pallabra "ōnyẽ" úsase pa indicar qu'un individuu ye d'una determinada rexón Por exemplu, "ōnyẽ ìɡbò" significa "una persona igbo". "ɔnhī" y "onhi" tamién puen usase pa indicar tiempu. La pallabra "àmɛ", que significa "agua", cuando se tresforma a "ɔnhīɣèmɛ" significa "temporada de lluvia". Poner la forma "omhi" enantes d'un sustantivu pue tresformalo nun diminutivu. Si s'aplica a "ɛ-wè", que significa "cabra", conviértese en "omhi ɛwè", esto ye, "cabrín/cabrina". Lliteralmente, la pallabra "omhi" significa "neñu". Pue usase en sintagmes como "ōmhī mhɛ", que significa "el mio fíu". Les pallabres "vbāí", "kpɛɛkpɛ" ya "ɡbei" puen añadese a otros sustantivos pa espresar totalidá. Por exemplu, el sintagma "ítīsá ɡbēī" significa "tolos profesores".[1]
Los tonos puen ser dacuando emplegaos pa facer xerundios, sustantivos verbales ya complementos d'axente. Por exemplu, si s'añade un tonu baxu a la fras "ɔ dɛɡhōbè" que significa "él merca un llibru", tresfórmase n' "aquelli que merca un llibru". Esta regla solo s'emplega con oraciones simples con un verbu. N’oraciones con múltiples verbos, la lletra "m" amiéstase al cabu’l sustantivu. Los prefixos tamién puen emplegase pa espresar la pluralidá d'una fras. Por exemplu, el prefixu "i-" cuando s’emplega na fras "ɔwìƞʷàhɛkūhɛdā" tresfórmala en "ì wìƞʷàhɛkūhɛdā". Esto tresforma'l significáu d' "aquelli que llanza ropa al ríu", a "aquellos que llancen ropa al riu". Los nomes propios en Ghotuo son de cutiu frases u oraciones enteres, típicamente refiérense a circunstancies de nacencia, máximes filosófiques, o eventos de la vida del suxetu.[1]
Tonu
[editar | editar la fonte]Ghotuo ye una llingua tonal con trés tonos. Los trés tonos básicos en Ghotuo son altos, medianos y baxos. Esperimenta la baxada tonal escalada (downstep) nos niveles tonales baxu y mediu, lo que significa que nestos niveles, si dos sílabes tienen el mesmu tonu entós la segunda sílaba fáise más baxa que la primera. Un análisis sobro’l tonu en Ghotuo realizáu por Kolawole Adeniyi, un investigador de la Universidá Obafemi Awolowo, atopó que los falantes de Ghotuo tendíen a esaniciar el fenómenu de la baxada tonal escalada nel so discursu al falar con falantes non nativos. Esto indica qu’esti fenómenu en Ghotuo ye controláu pol falante.[2] El fenómenu de la baxada tonal automática (downdrift) tamién ta presente en Ghouto; los tonos medios y altos son progresivamente baxaos polos tonos baxos que los preceden. La baxada tonal automática nun s'amuesa automáticamente en cada pallabra Ghotuo con tonos medios o altos depués de tonos baxos. Sicasí, ta presente en cada pallabra onde un tonu baxu sigue a un tonu mediu o altu. Ghotuo contién tonos cayentes; el tonu baxu cai si ta asitiáu depués d'un tonu mediu o altu. Atópense tamién tonos medios y altos "cayentes" na llingua.[3]
Pallabres d'amuesa
[editar | editar la fonte]| Pallabra[1] | Significáu[1] |
|---|---|
| ɔ-kà | maíz |
| ūù-ghì | perros |
| ù-gì | cestu |
| ɛɛ-kɛ | güevu |
| ì-bia | neños |
| ɔ-kàkà | saltapraos |
| ghī-lhɛlhɛ | llingua |
- 1 2 3 4 5 6 7 8 «Ghotuọ Noun Morphology». Journal of the Linguistic Association of Nigeria 22 (2): páxs. 264–280. 2019. https://www.researchgate.net/publication/355432995.
- ↑ «The role of Discourse in the typology of downsteps: Evidence from Ebira and Ghotuo». International Society of Experimental Linguistics: páxs. 1–5. 2012. https://exlingsociety.com/wp-content/uploads/proceedings/exling-2012/05_0001_000207.pdf.
- ↑ Bogers, Koen; Hulst, Harry van der; Mous, Marten Walter de Gruyter GmbH & Co KG: The Phonological Representation of Suprasegmentals: Studies on African Languages Offered to John M. Stewart on his 60th Birthday. ISBN 978-3-11-086629-2.