Liébana

De Wikipedia
Saltar a navegación Saltar a la gueta
La Villa de Potes.jpg

Llébana (o La Llébana) ye una contorna histórica de Cantabria (España), una de les meyor definíes de la Comunidá Autónoma. Tien una estensión d'unos 570 kilómetros cuadraos y alcuéntrase nel suroeste de Cantabria, atestando coles provincies d'Asturies, Lleón y Palencia.

A pesar de que yá esiste una llei de comarcalización de Cantabria, ésta inda nun foi desenvuelta, polo tanto la contorna nun tien entidá real.[1]

Conceyos de la contorna[editar | editar la fonte]

Situación xeográfica[editar | editar la fonte]

Sienda de La Peña nos Picos d'Europa. El turismu activu ta bien asitiáu na contorna de Llébana. Na imaxe aprecia l'antiguu camín mineru que comunicaba'l pueblu Tresviso con Urdón, siendo una de les rutes de senderismo más importantes de Cantabria.

La contorna ta enclavada nos Picos d'Europa, la so orografía a manera de gran hoya ente murallones de piedra caliar fixo d'ella la meyor definida de Cantabria. De mal accesu, tratase d'una contorna rural que la so capital asitiase en Potes.

Ye una contorna montascosa zarrada, constituyida por cuatro abarganes (Valdebaró, Cereceda, Piedrasluengas y Cillorigo) que conflúin en Potes, centru de la contorna. Los sos principales ríos son el Deva, el Quiviesa y el Buyón. Nel so relieve serrapatosu destaca la roca caliar del periodu Carboníferu, afeutada por procesos kársticos. cayueles y arenisques apaecen nos fondos de los valles.

La so condición de gran valle zarráu, con grandes diferencies altitudinales y de fuertes pindios apurre una gran variedá de condiciones ambientales que causen un ensame de formaciones vexetales: encinas, sufreres, hayas, carbayos (Quercus robur, Quercus pyrenaica), praos de campera y tierres de cultivu. El so relieve zarráu fai que tenga una microclima distinta al del restu de la rexón, afeutáu por un clima atlánticu.

Asina, no fondero del valle de Llébana  esfrutase d'un clima mediterraneu, que se tresforma progresivamente y a midida que xubimos nun clima atlánticu húmedu hasta algamar carauterístiques subalpinas nos altos cumes de los Picos d'Europa. Les temperatures medies añales son de 28 °C pa les máximes y 8 °C nes mínimes, con un nivel pluviométricu menor al d'otres zones de Cantabria (800 mm añales frente a los 1.000-1.200 mm de media de la rexón).

Historia[editar | editar la fonte]

Imaxe de Peña Airosa en Llébana.

A finales del sieglu XII y principios del sieglu XIII figuren como tenentes de Llébana dellos girones: Rodrigo Gutiérrez Girón, Gonzalo Rodríguez Girón y Rodrigo González Girón.[2] Gonzalo sería'l señor más poderosu de la zona, yá que ostentaba tamién les tenencies de Pernía, Peñes Negres y Cervera.

A finales del sieglu XIV, el Rei Juan I de Castiella otorgó'l señoríu de Llébana al so primu Don Juan Téllez de Castiella, Señor d'Aguilar de Campoo y fíu del Infante Don Tello de Castiella.

A mediaos del sieglu XV, la posesión del señoríu de Llébana dio orixe a una de les frecuentes guerres nobiliaries d'aquel tiempu y, darréu, a un llargu pleitu ente los Marqueses d'Aguilar de Campoo, herederos de Don Juan Téllez de Castiella y los socesores del segundu matrimoniu de la so esposa, Doña Leonor de la Vega, los Duques del Infantado de la Casa de Mendoza. En 1576 los tribunales dictaron sentencia a favor de la casa del Infantado.

Na Edá Moderna llevó'l nome de Provincia de Llébana, gobernada por un correxidor y Xuntes, que fueron cofundadoras de la Provincia de Cantabria en 1778.[3]

Ente 1785 y 1833 formó parte de la Intendencia de Burgos.

En 1934 les fuercies d'esquierda asaltaron el cuartel de la Guardia Civil de Potes mientres la Revolución d'ochobre de 1934, deteniendo a los guardias y formando un Comité Revolucionariu, hasta qu'ante la meyora de fuercies gubernamentales dende La Hermida viéronse forzaos a fuxir escontra los montes.[4]

Actualidá[editar | editar la fonte]

Torre del Infantado, Potes.

La población total de la contorna algama la cifra de 5.860 habitantes, según datos del INE del añu 2006 (ver tabla). Según los datos del mesmu añu, los sos trés nucleos más poblaos, de mayor a menor, son: Potes (1.499), Cillorigo de Llébana (1.215) y Camaleño (1.088). Y los sos trés nucleos menos poblaos, de menor a mayor, son: Tresviso (76), Pesaguero (360) y Cabezón de Llébana (686).

La economía na contorna de Llébana camudó del sector primariu a la puxanza del turismu rural, frutu de la so importancia paisaxística y del reclamu que provoca'l Parque nacional de los Picos d'Europa. Sicasí, el desenvolvimientu que supunxo'l turismu afectó casi puramente a la llocalidá de Potes, cabecera comarcal, en desterciu de les #demás poblaciones del valle. Asina, la crecedera poblacional de los últimos años en Potes nun se ve reflexáu nos demás nucleos de población, que tán afeutaos por una evolución demográfica negativa.

Destacáu[editar | editar la fonte]

  • Picos d'Europa.
  • Monasteriu de Santu Toribio de Llébana.
  • Camín de Santiago del Norte: Ruta Vadiniense.
  • Ilesia de Santa María.
  • Ilesia de San Vicente.
  • Fiesta del Oruxu.

Galería[editar | editar la fonte]

Referencies[editar | editar la fonte]

  1. Ley 8/1999, de 28 d'abril, de comarcas de la Comunidad Autónoma de Cantabria. [1]
  2. Pernía: Ordenación territorial y mandatarios.
  3. Fondo: PROVINCIA DE LIÉBANA.
  4. Corman, Mathieu: Incendiarios de ídolos.

Enllaces esternos[editar | editar la fonte]