Les ruines

De Wikipedia
Saltar a navegación Saltar a la gueta

Les Ruines ye una novela del escritor turonés Xandru Fernández, una de les de mayor acoyida ente'l públicu y la crítica de la lliteratura n'asturianu. La primer edición publicóla Ediciones Trabe nel 2004, mentes que nel 2012 la colección Mecánica Popular de Suburbia Ediciones publicó la segunda edición d'esti títulu clave de la lliteratura asturiana de los últimos tiempos. Les ruines ye la historia d'una familia y al mesmu tiempu ye la historia d'una época y un llugar que yá formen parte del pasáu. Una historia qu'empieza nos años de la guerra civil y acaba nos díes del fundimientu del Prestige, pero resumida nos sucesos d'un solu día de febreru de 1980.

Argumentu[editar | editar la fonte]

En plena guerra civil, a puntu de cayer el frente d'Asturies nes manes de les tropes franquistes, un aviador alemán afréllase col so caza nos montes qu'arrodien el Valle. El pá de Rosa rescata al pilotu manferíu y faise pasar por él pa salvar la vida d'un amigu. Xandru Fernández compón nesta novela una espléndida imaxe, coles sos peculiares maneres de tratu social, de la familia de Rosa l'Alemana (que debe l'alcuñu a aquel llonxanu episodiu de guerra), y del so home, Goyo Godina, militante antifranquista que muerre n’accidente de mina.

Alredor del Valle, un escenariu siempre presente, inclusu cuando los protagonistes viven yá a kilómetros de distancia, los fíos y nietos de Rosa, les muyeres, les amantes, los vecinos... componen un llaberintu de rellaciones nel que’l desarraigu, una enorme dificultá p'amar (o simplemente pa comunicase) y una violencia non siempre contenida, estructuren una novela onde’l pasáu regresa pa conformar el presente y pa incidir, de manera tráxica y a vegaes absurda, nel futuru, nuna obra que ye, ensin dulda, una de les grandes noveles contemporanies.

Recepción crítica[editar | editar la fonte]

Publicada per primer vez en 2004 por Ediciones Trabe, esta novela mereció’l Premiu de la Crítica de l'Asociación d'Escritores Asturianos y foi recientemente seleccionada polos llectores de Biblioastur como una de les diez grandes obres de la lliteratura asturiana del últimu mediu sieglu. La edición nueva de Suburbia, revisada y prologada pol autor, permítenos acceder de nuevu a un llibru que yera imposible d'atopar nes llibreríes dende hai años.