Lazulita

De Wikipedia
Saltar a navegación Saltar a la gueta
Lazulita

La lazulita ye un mineral del grupu de los Fosfatos. Ye un hidroxi-fosfatu d'aluminiu, fierro y magnesiu. Los sos cristales son de color azul intensu, carauterística pola que se-y punxo nome, que deriva de la pallabra árabe lazurd que significa "cielu" y del griegu litos, piedra.[1] Sinónimos pocu usaos d'esti mineral son: berkeyita, gersbyita, mollita, tetragophosphita y voraulita.

Malo de reconocer pol vezu de los cristales claramente bipiramidales. Nun tien de confundise col silicatu lazurita nin col carbonatu azurita, colos que nun tien nada que ver, namái se paecen los nomes etimológicamente porque los trés tienen color azul.

Afayada en 1795 en Salzburgo (Austria).

La lazulita ye una serie de solución sólida, nun estremu taría la "lazulita pura" rica en magnesiu ente que nel otru estremu taría la escorzalita rica en fierro.

Ambiente de formación[editar | editar la fonte]

Apaez en roques metamórfiques de tipo cuarcita, onde puede apaecer acomuñáu a minerales como sillimanita, cuarzu, pirofilita, moscovita, cianita, grupu de los granates, dumortierita o corindón.

Tamién puede atopase en roques ígnees: nos cantos de complexos de granitu y pegmatitas según en filones de cuarzu, onde apaez acomuñada a otros minerales como rutilo y andalucita.

Pola so durez ye tamién común atopala en depósitos aluviales.

Localización y estracción[editar | editar la fonte]

Atopáronse cristales d'hasta 5 cm de llongura en Xeorxa (Estaos Xuníos d'América), Suiza, Suecia y Austria. La variedá escorzalita ye bien abondosa en pegmatitas de Brasil.

Usóse como piedra preciosa ornamental, anque d'escasu valor.

Referencies[editar | editar la fonte]

  1. María Moliner, "Diccionario de uso del español".