Lan Caihe

Grabáu en madera de Lan Caihe.

Lan Caihe (chinu simplificáu: 蓝采和, chinu tradicional: 藍采和, pinyin: Lán Cǎihé, Wade-Giles: Lan Ts'ai-ho, Lam Choy Wah) ye una deidá china reverenciada polos taoístes. Ye'l menos conocíu de los ocho inmortales. La so edá y sexu son desconocíos, polo que se piensa que podría ser hermafrodita. Supuestamente vivió en tiempos de la dinastía Tang. Ye'l santu patrón de la horticultura y los floristes.

Na forma más popular represéntase-y como un mozu o neñu amuyeráu anque tamién puede ser un home vieyu o, nes pintures modernes, una muyer nueva. El so símbolu ye una cesta de bambú que dacuando lleva nel costazu colgando d'un azadón. Dientro hai flores acomuñaes cola llonxevidá, como biltos de bambú y pinu, cañes de cirolar ensin fueyes y crisantemos.

Ye conocíu pol so comportamientu estrafalariu y fora de les normes, vistíu con felpeyos. Pel hibiernu lleva pantalones curtios y camises fines y duerme sobre la nieve, esprendiéndose del so cuerpu nubes de vapor. Pel branu visti una gruesa chaqueta de llana y pantalones llargos. Usa un solu zapatu. Tamién se-y representa como una artista y baillarín caleyeru que regala a la xente probe'l dineru que gana. Nesti sentíu dizse qu'una vegada tuvo qu'amarutase de bruxa pa interpretar un papel, lo que sería l'orixe del tracamundiu sobre'l so sexu. Cuando ta borrachu improvisa cantares sobre la inmortalidá que naide puede entender.

Enllaces esternos

• The Eight Immortals (artículu n'inglés de Perceval Yetts, 1916)