Léonce Perret debuta como actor nel teatru, dempués nel cine, convirtiéndose en realizador de numberosos curtiumetraxes lo que-y apurre adulces una fuerte presencia nel panorama cinematográficu francés. De cutiu descritu como un vanguardista pola so manera de realizar les sos películes, supo apurrir al cine francés nueves téuniques d'encuadre, d'usu de la lluz y d'acompañamientu musical.
Foi figura emblemática de la sociedá Gaumont hasta 1917. Se exilia a los Estaos Xuníos onde apurre les sos conocencies y alquiriendo coles mesmes una gran esperiencia. Ye en suelu norteamericanu onde empieza a producir dalguna de les sos películes ente les que destaca Lest we forget (N'oublions jamais) de 1918, obra propagandística francesa que da al mundu l'espectáculu d'una Francia heroica y firida.
Más tarde de vuelta en Francia, realiza en 1923 Kœnigsmark que-y dexa adquirir cierta notoriedá nel contestu cinematográficu. En 1925, la so película Madame Sans-Gêne, adautación de la obra de teatru homónima, constitúi la primer coproducción francu-norteamericana. Descubridor de nuevos talentos, Léonce Perret collaboró con numberoses estrelles franceses y norteamericanes de la so dómina como Abel Gance, Gloria Swanson, Gaby Morlay, Arletty, Suzanne Grandais, Mae Murray o Huguette Duflos.
Una filmografía de Léonce Perret ye práuticamente imposible, yá que participó como actor, guionista, productor o direutor en más de 400 películes.[2] Les copies atópense principalmente na Filmoteca Gaumont, na Filmoteca Francesa, nos archivos de cine del Centru Nacional de Cinematografía y en delles filmoteques europees como'l Muséu de Cine Neerlandés (Nederlands Filmmuseum) n'Ámsterdam.
Léonce Perret escribió los guiones de la mayoría de les sos películes. Namái delles películes anteriores a 1913, esto ye de la so dómina de deprendimientu, nun fueron escritos por él sinón que na so mayoría son obra de Louis Feuillade, el so direutos artísticu nesta dómina; ente qu'otros guiones d'esta etapa deber a Abel Gance, Étienne Arnaud y Marcel Lévesque, colegues sos de la Sociedá Gaumont. De manera progresiva, a partir de 1911, Léonce Perret va llogrando l'enfotu de la Sociedá Gaumont pa dirixir los sos propios guiones.
Más tarde, a partir de 1917, escribe munchos guiones basaos en noveles, como Folie d'amour (1917), La treizième chaise (1919) o Kœnigsmark (1923). Tamién collaboró nos sos guiones con otros cineastes como Réné Champigny en Kœnigsmark o como'l norteamericanu Forrest Halsey en Madame Sans-Gêne.
En 1928, La Danseuse Orchidée ye resultáu del guión escritu por Jean-Joseph Renaud, siendo una de los escasísimas películes de posguerra nes que Léonce Perret nun intervién na escritura del guión.
Léonce Perret foi productor de bona parte de les sos películes a partir de la so estancia n'Estaos Xuníos, ye dicir dende 1917, fundando la so propia productora Perret Picture Inc. La Fayette, we come y The unknown love de 1918, según Twin Pawns o A.B.C. of love de 1919 son dalgunes de les sos películes producíes nos Estaos Xuníos.
De vuelta a Francia, va tener la oportunidá de producir delles películes cola sociedá Francu-Film (Morgane la Sirène y Printemps d'Amour de 1927, La Danseuse Orchidée, Poliche y La Possession de 1928, Quand nous étions deux de 1930, etc.)
123Afirmao en: autoridaes BNF. Identificador BnF: 145188703. Data de consulta: 10 ochobre 2015. Autor: Biblioteca Nacional de Francia. Llingua de la obra o nome: francés.
Francia
Datos: Q513293
Multimedia: Léonce Perret