Juan Bautista Vicini Burgos

Juan Bautista Vicini Burgos
Presidente de la República Dominicana
Vida
Nacimientu	Santu Domingu, 19 de xunetu de 1871
Nacionalidá	República Dominicana
Muerte	25 de mayu de 1935 (63 años)
Oficiu	entamador

Juan Bautista Vicini Burgos (19 de xunetu de 1871, Santu Domingu – 25 de mayu de 1935) foi una figura política dominicana. Sirvió como presidente de la República Dominicana ente 1922 y 1924 so la ocupación militar d'Estaos Xuníos.

Primeros años

Juan Bautista Vicini nació'l 19 de xunetu de 1871, fíu del industrial italianu Juan Bautista Vicini Canepa y la so amante María Burgos Brito. El so padre llegó a la República Dominicana mientres la puxanza de la industria azucrero, qu'aprovechó pa crear una operación respetable dientro d'un periodu relativamente curtiu de tiempu. Según l'autor holandés H. Hoetink nel so llibru El Pueblu Dominicanu, 1850-1900, el so padre yera propietariu de dos plantaciones de zucre en 1882 y, en 1893, yera'l dueñu de la fábrica de zucre «Angelina». La so rellación d'amistá col dictador Ulises Heureaux (Lilís) ayudólu a consolidar una fortuna respetable. Vicini heredó los negocios del so padre y foi a convertise nun empresariu d'ésitu, principalmente gracies a la so educación europea estricta. Vicini yera fluyíu n'español, italianu, inglés y francés a una edá bien nueva.

Presidencia provisional

La República Dominicana fora ocupada poles tropes estauxunidenses dende 1916 y, tres l'aprobación del plan Hughes-Peynado, Vicini foi un candidatu pal cargu de presidente provisional de la República Dominicana. Foi escoyíu presidente en 1922, y el so oxetivu principal yera facilitar la evacuación de les tropes estauxunidenses que taben presentes na República Dominicana. El día dempués de ser escoyíu, Vicini nomó a los cinco homes que formaron el so gabinete; los cualos foron:

1. José del Carmen Ariza, secretariu del Interior.
2. Cayetano Armando Rodríguez, secretariu de Xusticia ya Instrucción.
3. Eladio Sánchez, secretariu de Promoción y Comunicaciones.
4. Manuel Sanabia, secretariu de Salú y Caridá.
5. Pedro Pérez, secretariu d'Agricultura ya Inmigración.

Con estos pasos, Vicini aseguró a la retirada de les fuercies estauxunidenses en forma pacífica. A pesar de les sos bones intenciones, el réxime Vicini foi acosáu y primíu pol ferrial control del Plan Hughes-Peynado y poles fuercies estauxunidenses qu'aínda s'atopaben nel país. Asina y too, Vicini afitó les eleiciones más llimpies que la República Dominicana viera enxamás, nes qu'Horacio Vásquez ganó'l 15 de marzu de 1924 n'escontra de Francisco J. Peynado.

Cuando Vicini dexó la presidencia dempués de les eleiciones, volvió al so negociu azucreru y abandonó la política pol restu de la so vida. Al momentu de la so muerte, el 25 de mayu de 1935, Juan Bautista Vicini dexó a les sos parientes una de les empreses más grandes de zucre nel Caribe, que sigue funcionando a partir de 2010.

Enllaces esternos

• Juan Bautista Vicini Burgos (en quisqueyavirtual.edu.do).
• Juan Bautista Vicini Burgos (la Wikipedia n'inglés).