José Ramón Zaragoza

De Wikipedia
José Ramón Zaragoza
Vida
Nacimientu Cangues d'Onís16 de marzu de 1874[1]
Nacionalidá España
Muerte Alpedrete29 de xunetu de 1949[1] (75 años)
Sepultura cementerio de San Justo (es) Traducir
Familia
Fíos/es Gerardo Zaragoza
Estudios
Estudios Academia de España en Roma (es) Traducir
Llingües falaes castellanu
Profesor de Gerardo Zaragoza
María Galán Carvajal
Oficiu pintor
Cambiar los datos en Wikidata

José Ramón Zaragoza Fernández (16 de marzu de 1874Cangues d'Onís – 29 de xunetu de 1949Alpedrete) foi un pintor asturianu.

Biografía[editar | editar la fonte]

Estudió na escuela d'artes y oficios d'Uviéu, y con dieciocho años participó na Esposición Nacional de 1892 con un cuadru tituláu Costums de la ribera. Na Esposición Nacional de 1897 llogró una mención honorífica col cuadru La lleición. Esi mesmu añu, pensionáu pola Diputación d'Asturies, ingresó na Escuela de San Fernando, na que foi discípulu de Menéndez Pidal. Nes Esposiciones Nacionales de 1901 y 1906 algama sendes segundes medalles colos cuadros El neñu enfermu, inspiráu nun poema n'asturianu de Xosé Caveda y Nava, y Orfeo nos infiernos.

Pensionáu pol Estáu, mediante oposición, vive en Roma de 1904 a 1910. Pinta en París y en Londres y viaxa por Holanda, Alemaña y la Bretaña francesa. D'esa escursión traerá cuatro retratos que presentó na Esposición Nacional de 1915. Na mesma ganó una primera medaya col Retratu de Mr. Th. S.. Acudió tamién a la Esposición Nacional de 1920, na que presentó dos retratos: el d'una señora y el de Pío Baroja, y otru llenzu tituláu Güeyos azules.

Na so citada xira pel estranxero ya algamara, en 1913, una segunda medaya na Esposición Universal de Múnich, y en 1914 una mención honorífica nel Salón de París. Na Rexonal de Belles Artes celebrada n'Uviéu, en 1916, espuso varios retratos de señores y unu de Tipos bretones y, en 1919, en xunión de Medina y Menéndez Pidal, contribuyó a xuntar na Casa Masaveu trenta llenzos de paisaxes, retratos y composiciones qu'impresionaron al públicu uvieín.

En 1923 realizó en Madrid una esposición personal nel Muséu d'Arte Modernu, na que presentó ventiocho cuadros. En 1925 ganó'l concursu pa pintar tres plafones con destín al nuevu edificiu del Círculu de Belles Artes. En 1928 foi nomáu, por oposición, profesor de la Escuela d'Artes y Oficios de Madrid, y en 1930, por concursu ente ex-pensionaos de Roma, profesor de les enseñances de pintura, na Escuela de San Fernando. Elixíu académicu de númberu de la Real de Belles Artes el 5 de xineru de 1948, nun llegó a tomar posesión.

Ente otros homenaxes, l'Institutu Xovellanos de Xixón fizo, en setiembre de 1976, una esposición na so acordanza, lo mesmo que'l Círculu de Belles Artes de Madrid, n'abril de 1977. El Muséu de Belles Artes d'Asturies posee Madreñeros, El neñu enfermu y Retratu de Luz Ojeda.

Referencies[editar | editar la fonte]

  1. 1,0 1,1 Afirmao en: Diccionario biográfico español. Identificador DBE: 23994/jose-ramon-zaragoza-fernandez. Apaez como: José Ramón Zaragoza Fernández. Data de consulta: 9 ochobre 2017. Editorial: Real Academia de la Historia. Llingua de la obra o nome: castellanu. Data d'espublización: 2011.
  • Nombres y cosas de las calles de Oviedo (1992) Ayuntamientu d'Uviéu ISBN 84-606-1.037-3