José-María Siles

De Wikipedia
Saltar a navegación Saltar a la gueta
José-María SilesPicto infobox character.png
Vida
Nacimientu

Almería1  de payares de 1951

[2] (68 años)
Nacionalidá Flag of Spain.svg España
Estudios
Estudios Universidá Autónoma de Barcelona
Llingües castellanu
Oficiu
Oficiu corresponsal de guerraperiodista
Emplegadores Televisión Española
IMDb nm0797968
Cambiar los datos en Wikidata

José María Siles (1  de payares de 1951Almería), más conocíu como José-María Siles, ye un corresponsal de guerra y periodista español.

Nos años últimos del franquismu dirixó teatru independiente y documentales de calter social. Dos de los sos curtiometraxes en súper 8, Anticrónicas de un pueblo (1974) y Buenos días, Portugal (1975), torgólos la censura franquista y anduvieron los circuitos independientes de cine alternativu[3] n'España.

Llueu de dos meses y mediu de que morriere Franco, en febreru de 1976, ta estudiando Periodismu na Universidá Autónoma de Barcelona cuando miles de persones salen a les cais pa glayar Llibertat, Amnistía i Estatut d'Autonomia nes primeres manifestaciones de magar finare la dictadura. Siles filmó personalmente aquelles manifestaciones pola democracia, pero'l documentu enxamás nun pudo pasar a la historia darréu que los "grises" frayáron-y la cámara de 16 mm que llevaba.

Dempués d'asoleyar les primeres entrevistes colos cabezaleros políticos que salen daquella de la clandestinidá entama a trabayar como redautor de nueche en Radio Francia Internacional. Sedrá la primer dómina d'un llargu camín que percorrería Berlín, Sarayevu, Nueva York, Port-au-Prince, Beirut o Kinshasa hasta finar en Bruxeles.

Les sos cróniques pa Televisión Española dende Alemaña son un sofitu pa percanciar los años últimos de la dixebra europea. Cuando cai la muria de Berlín, el 9 de payares de 1989, Siles informa en direuto a ún y al otru llau del Checkpoint Charlie. TVE ye l'únicu mediu español qu'ufre información d'esi momentu históricu dende los dos berlines. Años dempués José María reconoz qu'aquella nueche máxica pasó les horas más prestoses de tola so vida profesional.

En 1990 abre en Rabat la corresponsalía de TVE pal Magreb, coincidiendo cola llegada de los cascos azules a L'Aaiún, en llabor descolonizador. Vive darréu como corresponsal de guerra'l cercu de Sarajevo y la xuntura multiétnica de la ciudá. Más alantre cubrirá'l xuiciu de Slobodan Milošević, acusáu en L'Haya de crímenes escontra la humanidá.

Na so dómina como responsable de la corresponsalía de Nueva York ye testigu de la saga d'Elián González, el balserín cubanu; de la primer aventura americana de Pedro Almodóvar; y del escándalu de les butterfly ballots, que-y dan a Bush el trunfu nes eleiciones de les últimes presidenciales del mileniu. Enantes de tornar a Europa, pon la primer piedra de la delegación de TVE en Washington.

Dende les instituciones comunitaries de la Xunión Europea da anuncia de la llegada del euru, de l'ampliación al Este y de la llarga sienda hacia'l Tratáu de Lisboa. En Bruxeles vive tamién el cambéu de piel de l'Alianza Atlántica, qu'abre les sos puertes a los antiguos países comunistes del telón d'aceru y entama a participar en misiones de paz con Naciones Xuníes.

Como unviáu especial a mediu cientu de países destaquen les sos cróniques y reportaxes sobre El Congu, Haití y la última guerra d'El Líbanu.

José-María Siles ye llicenciáu en Ciencies de la Información.

Referencies[editar | editar la fonte]

  1. Afirmao en: Internet Movie Database. Data de consulta: 25 xunu 2019. Llingua de la obra o nome: inglés.
  2. Identificador BnF: 17033511h.
  3. Miguel Ángel Blanco Martín: El cine y su imagen.

Enllaces esternos[editar | editar la fonte]