Jesús Montes Estrada

De Wikipedia
Saltar a navegación Saltar a la gueta

Jesús Montes Estrada “Churruca” Naz el 4 d'abril de 1950 na cuenca minera del Nalón, en La Güeria Carrocera (Samartín del Rei Aurelio). D'oficiu metalúrxicu, foi trabayador del Naval y ye fíu y nietu de mineros (el so padre, conocíu como “Chus Pesetes” foi un hestóricu del Partíu Comunista d'España n'Asturies). Tien una hermana y un hermanu.

Dende bien pequeñu sienti como propios los ideales emancipatorios y antifranquistas qu'el so padre, el so güelu y otros miembros de la so familia practiquen y “pedriquen”: los ideales de la llibertá y el socialismu marxista; los ideales que teníen d'acabar cola dictadura y conducir España escontra la llibertá y la democracia, lo que-y dexó conocer a lluchadores antifascista de la talla de Horacio Fernández Inguanzo “el Paisanu”, allá por 1965.

En xunetu de 1968 treslládase a Xixón cola edá de 18 años, cola so familia, al barriu d'El Cotu (Xixón), tres la xubilación del so padre.

Afíliase al PCE y a CC.OO. en 1970. Dende 1971 hasta l'actualidá ye miembru del Comité local del PCA de Xixón. Ente los años 1972-1975 pertenez a la Coordinadora de Comisiones Obreres de Xixón y Asturies. A lo llargo de los años 70, en plena dictadura, foi deteníu en delles ocasiones (según nos 80, con gobiernu del PSOE, por motivos llaborales”), y pasó delles vegaes polos xulgaos xixoneses a declarar por denuncies de la policía. El 27 de setiembre de 1974 foi deteníu en Xixón pola Brigada Políticu-Social franquista y treslladáu a Uviéu pa ser “entrugáu” y darréu encarceláu na prisión del Cotu (Xixón) dende finales de setiembre hasta principios de payares de 1974, por razones de índole políticu-sindical. El tribunal d'Orde Públicu –TOP- (encargáu de xulgar a los antifranquistas) condérga-y a dos penes de cárcel de trés años caúna, por propaganda illegal y por posible asociación ilícita” respeutivamente.

Foi despidíu en septiembre de 1974 de Marítima del Musel por actividá sindical. Enantes a esa fecha, de manera ininterrumpida, forma parte, primero como miembru del Xuráu d'Empresa en Segundu Álvarez S.A. (Marítima del Musel), y, darréu, de Naval Xixón, hasta 1993.

El 29 d'avientu de 1974, ente los pocos llugares onde pudo trabayar, foi nuna axusta de Constructora Xixonesa, denominada GARMO.S.A, y el 15 de xineru de 1975, espulsáu nuevamente dempués d'un conflictu nos Astilleros de Xixón, en solidaridá con dellos collacios despidíos, y, de la mesma, pola negativa de la direición de Marítima del Musel a la so incorporación y la d'otru compañeru a la empresa.

En 1974 forma parte de la Xunta Democrática de Xixón (la Xunta Democrática foi proclamada ente otros, por Santiago Carrillo y Calvo Serer en París en xunu de 1974). Mientres tou esti tiempu hasta xineru de 1977 permanez despidíu formando parte de les denominaes “llistes ñegres” de la Brigada Políticu Social (BPS) siendo de la mesma reiteradamente despidíu de diversos talleres y empreses nes que tuvo oportunidá d'entrar a trabayar, a duelgu de la BPS.

Cola muerte del dictador el 20 de payares de 1975, llega a la xefatura del Estáu'l so socesor, el Príncipe Juan Carlos, que decreta una pequeña amnistía pa penes políticu-sindicales menores de cuatro años. Cuestiónésta que lu afecta positivamente pa eludir el so encarcelamientu. En xineru de 1977 incorpórase al so puestu de trabayu en Marítima del Musel dempués de ganar un xuiciu para la so incorporación nel Tribunal Central de Trabayu, Madrid.

Foi máximu responsable de CC.OO. de Marítima del Musel ente 1972 y 1984, momentu nel que se produz la fusión ente Duro Felguera y Grupu Oreyes. De 1984 a 1993 foi'l máximu responsable de CC.OO. en Naval Xixón, astilleru productu de la fusión antes comentada, cargu que tuvo que dexar por razones d'actividá política (cargu públicu).

Dende 1978 empiecen diverses “reconversiones” nos astilleros. La más importante con gobiernu del PSOE. Nesi momentu prodúcense fuertes movilizaciones de los trabayadores en defensa del sector naval y de los sos puestos de trabayu. Esta situación dura más de trés años (1984-87) y sáldase con un estudiante muertu, decenes de trabayadores lisiados, el zarru de trés puestos de trabayu y más d'un millar d'empleos direutos perdíos.

COMO INTERÉS…

La tarde del mesmu día de xineru de 1977 que s'incorpora al so puestu de trabayu, produzse en Madrid por elementos fascistes, l'asesinatu conocíu como “la matanza de Atocha”, dellos abogaos llaboralistes, militantes del PCE, fueron asesinaos y otros lisiados. A otru día produzse una fuelga en miles d'empreses del país, en Marítima del Musel tamién. Dempués de la famosa crisis de Perlora (19 na Conferencia del PCA, faise cargu de la responsabilidá orgánica del PCA de Xixón hasta 1981.

En xineru de 1983 hasta finales de 1991 foi Secretariu Xeneral del Metal de CC.OO. de Xixón (9 años).

Miembru de la Executiva Rexonal del Metal de CC.OO. d'Asturies, del Conseyu del Estáu de CC.OO. del Metal (1983-91). Miembru de la executiva de la Unión Rexonal de CC.OO. d'Asturies (1984-88).

Na actualidá ye conceyal d'IX nel Conceyu de Xixón, dende mayu de 1991. Voceru del Grupu Municipal dende xunetu de 2000.

Secretariu Xeneral del PCA de Xixón dende payares de 1994 a xineru de 2003.

Coordinador d'IX Xixón dende ochobre de 1998.

Miembru de la Executiva de I.O (13 miembros) d'Asturies dende marzu de 1995.

Miembru de la Presidencia y del Conseyu Políticu Autonómicu de I.O Asturies (1991).

Miembru del Comité Central del Partíu Comunista d'Asturies (PCA) dende 1992.

Tres les eleiciones municipales de mayu de 2003 y tres el pactu de gobiernu, ocupa la tercer tenencia d'alcaldía del Conceyu de Xixón (PSOE-IX-BA) y ostenta la Presidencia del Conseyu Municipal de Cooperación y Solidaridá Internacional y la Conceyalía de Cooperación y Solidaridá Internacional dende'l branu de 2006.

Amás ye'l conceyal encargáu nel Conceyu de Xixón de los asuntos rellacionaos cola Memoria Hestórica – Memoria Social.

Preséntase nuevamente de cabeza de llista en 2007, con un porcentaxe de votos na asamblea d'IX-Xixón celebrada'l 25 de payares de 2006 del 78% (n'Asamblea de 19/10/2002 para les eleiciones de 2003 foi escoyíu cabeza de llista con un porcentaxe del 74%). En dambes Asamblees foi, amás, reelexíu Coordinador d'IX-Xixón, cargu qu'ocupa dende ochobre de 1998.

Nes eleiciones del 25 de mayu de 2007 ye nuevamente escoyíu conceyal por Izquierda Xunida-Bloque por Asturies-Los Verdes. Na actualidá ostenta la Tercer Tenencia d'Alcaldía de Xixón, según la delegación de les vinientes árees: Cooperación y solidaridá Internacional, Política Llingüística, Cultura Tradicional y Memoria Hestórica y Social.