Iniciativa pol Asturianu

De Wikipedia
Saltar a navegación Saltar a la gueta
Iniciativa pol Asturianu
Actu presentación Iniciativa 2011.jpg
XUNTA DIREUTIVA[1]
Presidente Iván Llera
Vicepresidente Xuan Fernandi
Secretariu Felicitas Fernández
Ayalguera Ana María Viesca Iglesias
Vocales Alexandru Ordiales, María Díaz Suárez, Ástor Llaneza y Claudia Gutiérre
DATOS
Fundación Ochobre de 2011
Disolución
Sede Hotel d'Asociaciones de Santuyanu, Avenida Fernández Ladreda, Númberu 48 - Uviéu
Oxetivos Normalización social del idioma y reconocimientu de los derechos llingüísticos de los falantes d'asturianu.
Sitiu web http://www.iniciativapolasturianu.org

Iniciativa pol Asturianu ye un coleutivu creáu en 2011 que trabaya pola normalización del idioma asturianu y pol reconocimientu de los derechos llingüísticos de los sos falantes.

L'ámbitu de trabayu de la organización ye l'actual territoriu de la comunidá autónoma d'Asturies, anque trabaya al traviés de la collaboración con otres organizaciones del dominiu llingüísticu asturlleonés nos territorios onde l'asturianu o asturlleonés ye llingua propia.

Esta asociación busca espacios de normalidá pa la llingua asturiana, al traviés d'aiciones concretes que-y permita llegar a alcuerdos con entidaes de tou tipu que supongan afitar l'usu del asturianu n'ámbitos nuevos. Asinamesmo procura consensos y alcuerdos sobre l'usu del idioma, pero tamién fai usu de campañes reivindicatives nes situaciones nes que ye necesario.

Oxetivos[editar | editar la fonte]

  • Movilizar a la sociedá asturiana pol futuru del idioma, dándo-y visibilidá al conflictu llingüísticu.
  • Recuperar pal asturianu l'espaciu central como llingua común de toles persones d'Asturies y de tol dominiu llingüísticu asturlleonés.
  • Afalar y collaborar con campañes de normalización llingüística.
  • Vixilar el cumplimientu de la llexislación llingüística vixente, defendiendo los derechos de los falantes a los que se-yos nieguen.
  • Trabayar pa la oficialización de tol corpus toponímicu tradicional asturianu, vixilando'l so usu per parte d'instituciones y empreses.
  • Controlar el cumplimientu de les polítiques llingüístiques comprometíes, asina como afalar mayores graos de compromisu llingüísticu per parte de les insituciones y otres entidaes.
  • Afalar la collaboración ente organizaciones de tol dominiu llingüísticu pa xenerar una conciencia ciudadana sobre la unidá del idioma y trabayar p'algamar oxetivos comunes.
  • Internacionalizar la conocencia del idioma y del conflictu llingüísticu, al traviés d'aiciones culturales y de la denuncia énte los organismos estatales ya internacionales de la situación irregular que viven los ciudadanos asturianos no que cinca a la cuestión llingüística. Amás de trabayar con otres comunidaes llingüístiques con situaciones asemeyaes en cualesquier llugar del mundu.
  • Afalar una reconocencia absoluta del asturianu como llingua oficial en tol territoriu asturianu, y xunto col eonaviegu o a fala na fastera correspondiente, amás de collaborar pa qu'esta reconocencia s'algame tamién nel restu de territorios onde l'asturianu ye llingua propia.
  • Reclamar un estatus xurídicu d'oficialidá pal asturianu dientro de los organismos europeos.

Referencies[editar | editar la fonte]

  1. Iniciativa pol Asturianu elige a Iván Llera para suceder a Inaciu Galán Iniciativa pol Asturianu elige a Iván Llera para suceder a Inaciu Galán https://www.lne.es/asturias/2019/06/23/iniciativa-pol-asturianu-elige-ivan/2492317.html

Enllaces esternos[editar | editar la fonte]

Ver tamién[editar | editar la fonte]