Ilesia de Santolaya de Benia

De Wikipedia
Saltar a navegación Saltar a la gueta
Ilesia de Santolaya de Benia
ilesia
Iglesia de Santa Eulalia - templo medieval del oriente de Asturias (6862837116).jpg
Llocalización
PaísFlag of Spain.svg España
AutonomíaFlag of Asturias.svg Principáu d'Asturies
Provincia provincia d'Asturies
Conceyu Onís
Parroquia Santolaya
Llugar Benia
Historia y usu
Orixe del nome Santolaya
Cambiar los datos en Wikidata

La ilesia de Santolaya de Benia llevántase nel marxe izquierda del ríu Güeña, na amplia vega que forma ésti al trevesar la capital del conceyu d'Onís, Benia (Asturies).

Alcuéntrase na arboleya del campu de la ilesia, al que s'accede dende la carretera xeneral y de cais que la comuniquen col restu del pueblu. La referencia documental más antigua d'esta ilesia alcuéntrase nel famosu Testamentum regis Ordoni, del 857, consideráu como falsu pola xeneralidá crítica diplomática; y na Nómina de les ilesies del obispáu d'Uviéu vuelve a citase la de "Santolaya d'Onís". Trátase d'un templu de considerables dimensiones que, pesie a sofrir grandes reformes, conserva interesantes elementos de la so fábrica medieval.

Morfoloxía[editar | editar la fonte]

L'esterior amuesa una suma de volúmenes gradiaos que revelen la distribución en planta. Consta d'una nave atayada por un cruceru, cubiertu a mayor altor, al que s'abren dos capielles llaterales de les que la del norte desorella esteriormente por dos contrafuertes de sillar.

La cabecera, cuadrada, destaca n'alzáu sobre los dos cuerpos que la flanqueén, alliniaos en planta col testeru. Un cabildru porticáu en forma de "U" protexe les muries norte, sur y oeste, atayáu al altor de la portada occidental por dos arcos apuntaos con dovelrs de piedra visto dispuestos tresversalmente. Ta cobiertu a una agua con armadura de madera y ábrese al norte y oeste nuna arquería apuntada encalada de fechura moderna, que se sustitúi nel lladral sur por un cenciellu murete zarráu con una reya. Percuerren esta muria dos contrafuertes y, nel estremu del pórticu, una puerta de mediu puntu de potentes sillares comunica cola capiella sur.

Bien próximu a esti llau del templu alcuéntrase'l recintu cementerial nel que se caltién una llábana del sieglu XVII, del que'l so allugamientu primitivu taría nel interior de la ilesia. En 1897, gracies a una donación, irguióse la gran torre del campanariu, adosada al imagronte, de seición cuadrada y trés pisos, abierta con una puerta apuntada na so parte inferior pa dar accesu a la portada occidental, que remata nún arcu corvu. Los caneciellos calteníos nos bistechos de nave remiten al orixe tardorrománicu, pero ensin dulda, l'elementu mas interesante del esterior ye la so magnífica portada norte (única nel Oriente d'Asturies), gótica y posiblemente del sieglu XIV. Ésta, enmarcada por panal de sillar y daqué en resalte con respectu al muriu de la nave, presenta una estructura abocinada, consiguida per aciu la multiplicación d'archivoltes llixeramente apuntaes, acovecíes por un guardapolvus. Les archivoltes posen en trés columnes de fuste llisu a cada llau, dispuestes ente codiyos, nes que les sos bases presenten una estructura tueru piramidal, sacante los dos interiores que son de tipu toscanu. La única decoración de la portada concéntrase nos capiteles corríos de seición poligonal, qu'amuesen un frisu de pámpanes en relieve. Éstos presenten restos de policromía acoloratada qu'atestigüen la esistencia de decoración pictórica nesta zona del templu. Cabe destacar la magnífica puerta de madera que zarra esta entrada principal, colos sos cuarterones decoraos con talles que, pol so estilu y repertoriu, permiten datala n'época barroca. L'interior de la ilesia caltién les proporciones y estructures gótiques, magar que s'aprecien les reformes llevaes a cabu n'etapes posteriores. Laa nave estrémase en trés tramos cobiertos con bóveda de cañón encalada y desorellaos por potentes pilastres adosaes a les muries, de que los sos capiteles prismáticos arrinquen arcos fachones apuntaos.

Nel tramu occidental allúgase la tribuna de madera tallao. Les muries de la nave, percorríos por una llinia d'imposta horizontal, articúlase al traviés de trés arcos ciegos de mediu puntu, que descansen en pilastres complexes. Esta parte del templu foi modificada a principios de sieglu XVIII, sustituyéndose la primitiva bóveda gótica pola actual, na que los sos dos arcos fachones más occidentales amuesen entá'l despiece de doveles planes, a diferencia del arcu que da pasu al cruceru, nel que la so lluz da l'anchor de la nave orixinal. Esti espaciu previu al santuariu caltién la so traza medieval, bien atestiguada pola bóveda estrellada que loc ubre, na que la so complexidá remite a un góticu tardíu. Nella, los puntos d'interseición de los nervios decórense con cinco claves nes que s'inscriben estrelles de seyes puntes, sacante nuna, ornada con una cruz dientro d'un rombu. Los fexes de nervios descansen nún muriu qu'emboca la cabecera; sobre dos espodaes semicolumnes que presenten interesantes capiteles esculpíos con relieves: dos pavos reales encaraos y dos grandes fueyes nel llau del evanxeliu y de la epístola, respeutivamente. Na zona opuesta a la cabecera, los nervios de la bóveda descansen en mensulielles que formen un cuerpu únicu colos capiteles corríos del arcu toral, que rematen en trés fexes de columnes adosaes, nes que les sos bases asemeyaen a les de la portada norte. El capitel del evanxeliu ta decoráu con dos lleones encaraos con cabeza humana, y el de la epístola representa un lleón pasante del que de los sos focicos sal una parra con fueyes y un recímanu con uves. A esti cruceru amestóse a finales del sieglu XVI dos capielles llaterales abiertes al traviés de dellos arcos de mediu puntu qu'arrinquen de pilastres con bases prismátiques y impostes gradiaes.

Ver tamién[editar | editar la fonte]

Referencies[editar | editar la fonte]

Enllaces esternos[editar | editar la fonte]